APR FC ikomeje kwiharira ibikombe byo mu Rwanda

APR FC yaraye yegukanye igikombe cy’Amahoro ku nshuro yayo ya karindwi nyuma yo gutsinda Police FC ibitego 2-1, mu mukino wa nyuma w’icyo gikombe wabereye I Remera kuri Stade Amahoro, kuri uyu wa Gatatu tariki 4 Nyakanga.

APR FC ubu ni yo kipe yihariye ibikombe byombi byo muri uyu mwaka, icya shampiyona y’u Rwanda ndetse n’iki cy’Amahoro.
Muri uwo mukino buri kipe yari ifite inyota yo kuzamura igikombe, igice cya mbere cyarangiye amakipe yombi anganya ubusa ku bundi.

Igice cya kabiri cyatangiye amakipe yombi ahuzagurika, ku munota wa 20 w’igice cya kabiri ni ho Police FC yaje kubona penaliti yatewe neza na Kagere Meddie ivamo igitego, nyuma y’aho ku munota wa 34 w’umukino icyo gitego cyaje kwishyurwa na Mugiraneza Jean Baptista “Miggi” agitsindishije umutwe.

Iminota 90 y’umukino yarangiye amakipe yombi anganya kimwe ku kindi, hongerwaho iminota 30 kugira ngo igikombe kibone nyiracyo.

Iminota y’inyongera yatangiye APR FC irusha Police FC gusatira izamu, nk’aho Seleman yahushije igitego ku buryo bwiza yari abonye. Iminota 15 y’igice cya mbere cy’inyongera yarangiye zikinganya kimwe ku kindi ndetse bigaragara ko abakinnyi benshi bananiwe. Iminota 15 y’igice cya kabiri cy’inyongera nyuma yatangiye Police FC ihanahana neza imipira, ariko yajyera ku izamu ikawutakaza.

Ku munota wa 26 w’igice cya kabiri cy’iyo minota y’inyongera nibwo APR FC yaje kubakosora ku gitego cyiza cyatsinzwe na Karekezi Olivier wari winjiyemo asimbuye.

Umukino warangiye Police FC itsinzwe bibiri kuri kimwe na APR FC, bikaba bibaye ubugira kabiri Police FC ijyera ku mukino wa nyuma w’igikombe cy’Amahoro igatsindwa na APR FC.
Ikipe ya Rayons Sports niyo yegukanye umwanya wa gatatu, nyuma yo gutsinda AS Kigali kuri penaliti, kuko bari banganyije ibitego 2 kuri 2.