RIB yataye muri yombi abafana bakekwaho gukubita umukinnyi wa Gicumbi FC bamushinja amarozi

Yanditswe na Eric Tony Ukurikiyimfura
Kuya 3 Ukuboza 2019 saa 10:40
Yasuwe :
0 0

Urwego rw’Igihugu rushinzwe Ubugenzacyaha (RIB) rwataye muri yombi abafana bikekwa ko ari ab’Ikipe ya APR FC bakurikiranyweho gukubita rutahizamu wa Gicumbi FC, Umunya-Ghana uzwi nka Tchabalala, bamushinja amarozi.

Tchabalala yakubiswe ubwo yari asanzwe mu rwambariro rwo kuri Stade Mumena ubwo abandi bari mu mukino w’Umunsi wa 12 wa Shampiyona wahuje Gicumbi FC na APR FC kuri uyu wa Kabiri.

Uyu mukino wavuzwemo amarozi, warangiye amakipe yombi anganyije igitego 1-1.

Ubwo abanyamakuru basangaga uyu Munya-Ghana mu rwambariro, ari gutaka cyane, yavuze ko atazi abamukubise n’icyo bamuzizaga.

Yagize ati ’’Ntabwo nzi icyo nakoze, nabonye bankubita. Nababwiye ko ndi umukinnyi bo barankubita, ariko ntabwo nabamenye, ntabwo nzi icyo nakoze rwose.’’

RIB ibinyujije ku rukuta rwayo rwa Twitter yatangaje ko yataye muri yombi abakekwaho gukubita uyu mukinnyi ndetse kuri ubu hari ibyo bari kubazwa kuri Stasiyo ya Polisi ya Nyamirambo.

Amakuru ajyanye n’imyirondoro y’abo bafana ntarashyirwa ahabona.

Uyu mukinnyi uzwi nka Tchabalala nta byangombwa afite byo gukinira Gicumbi FC nyuma y’uko ataboneye ku gihe ibyangombwa bimwemerera gukora mu Rwanda nk’umunyamahanga.

Amakuru agera kuri IGIHE avuga ko kuri ubu ari mu ikipe nyuma yo guhabwa amasezerano, ariko akaba adakora imyitozo ndetse ari gushaka amafaranga azamusubiza iwabo hamwe n’undi mugenzi we bazanye muri Gicumbi FC.

Umunya-Ghana uzwi nka Tchabalala, yakubitiwe mu rwambariro rwa Gicumbi FC akekwaho amarozi
Tchabalala yatwawe mu maboko nyuma yo gukubitwa n'abantu bataramenyakana
Gicumbi FC ya nyuma yahagamye APR FC mu mukino waketswemo amarozi. Abakinnyi ba Gicumbi FC babanje kunyanyagiza ibisa n'umunyu mu mazamu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza