Nduwantare watozaga Gicumbi FC yirukanywe

Yanditswe na Eric Tony Ukurikiyimfura
Kuya 27 Ukwakira 2019 saa 02:41
Yasuwe :
0 0

Ikipe ya Gicumbi FC yamaze gutandukana n’uwari umutoza wayo ukomoka mu Burundi, Nduwantare Ismaili Jean Marie Vianney, washinjwe umusaruro muke dore ko kugeza ku munsi wa gatanu wa Shampiyona iyi kipe nta nota irabona.

Nduwantare yahawe akazi na Gicumbi FC muri Nyakanga, aje gusimbura Banamwana Camarade wayifashije kuguma mu cyiciro cya mbere mu mwaka ushize, we wahise agirwa umutoza wungirije.

Gicumbi FC yitabaje uyu mugabo w’Umurundi kuko afite impamyabushobozi ya A itangwa na CAF mu byo gutoza mu gihe Banamwana we adafite ibi byangombwa bimwemerera gutoza mu cyiciro cya mbere.

Umusaruro ungana n’amanota 0 mu mikino itanu, watumye Nduwantare Ismaili Jean Marie Vianney yerekwa umuryango na Gicumbi nk’uko byemerejwe mu nama yahuje abanyamuryango b’iyi kipe kuri iki Cyumweru.

Uyu mutoza yaherukaga gusabwa gutsinda imikino ibiri muri itatu ubwo hahagarikwaga umutoza wungirije Banamwana Camarade mu minsi ishize, ashinjwa kuvangira umutoza mukuru.

Gicumbi FC yatsinzwe na Mukura Victory Sports ibitego 3-1 na Kiyovu Sports igitego 1-0 mu mukino wabaye ku wa Gatanu, byatumye Nduwantare atagera ku byo yari yasabwe nubwo yari agisigaje umukino wa Espoir FC mu yo yari yavuganye n’Ubuyobozi.

Ubuyobozi bwa Gicumbi FC bwahisemo gutandukana n’uyu mutoza bwari bwahaye amasezerano y’imyaka ibiri.

Ni ku nshuro ya kabiri, Nduwantare yari aje gutoza mu Rwanda nyuma yo kuba umutoza Aspor FC mu 2008 mbere y’uko asubira muri Prince Louis, ayifasha gusubira mu cyiciro cya mbere.

Yatoje kandi amakipe arimo Inter Stars, Flambeau de l’Est, Kayanza United, Delta Star na Les Jeunes Athletics.

Gicumbi FC yasoje umwaka ushize w’imikino iri ku mwanya wa 14, aho yakurikirwaga na Kirehe FC n’Amagaju FC zamanutse mu cyiciro cya kabiri, abenshi bemeza ko bigoye ko uyu mwaka izongera kurokoka kutamanuka.

Iyi kipe yabaye iya kabiri yirukanye umutoza muri uyu mwaka mushya w’imikino nyuma ya Olivier Ovambe Mathurin wirukanwe na Mukura VS.

Mu mwaka ushize w’imikino, Gicumbi FC nabwo yirukanye Bizimana Abdu ‘Bekeni’ nyuma y’umunsi wa munani, aho yari ifite amanota abiri gusa.

Hakizimana Charles Alias Macari ni we wagizwe Umutoza w’agateganyo wa Gicumbi FC mu gihe bivugwa ko Ruremesha Emmanuel ari we ushobora guhabwa izo nshingano burundu.

Gicumbi FC yatandukanye n'uwari umutoza mukuru wayo Nduwantare Ismaili Jean Marie Vianney

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza