00:00:00 IGIHE NETWORK KN KINYARWANDA EN ENGLISH FR FRANCAIS

Umukobwa wavuzwe mu ifungwa rya Davis D yirukanishije Kwizera Olivier mu Amavubi

Yanditswe na Bukuru JC
Kuya 20 Kanama 2021 saa 12:55
Yasuwe :
0 0

Umunyezamu Kwizera Olivier yasezerewe mu Ikipe y’Igihugu ‘Amavubi’ nyuma y’uko yagaragaye aganira kuri ‘Instagram live’ na Kayesu Shalon Manzi wigeze gufungisha abahanzi Davis D, Kevin Kade ndetse na Thierry ufotora.

Kwizera Olivier yari mu mwiherero w’Amavubi ari kwitegura imikino ya Mali na Kenya izaba mu ntangiriro z’ukwezi gutaha, yaraye agiye kuri ‘Instagram live’ aganira na Kayesu Shalon Manzi.

Kayesu Shalon ni umukobwa ufite imyaka 18 y’amavuko ndetse isaga kuko yayujuje ku itariki 23 Ukuboza 2020, ubu akaba yiga mu mwaka wa kane w’amashuri yisumbuye mu bijyanye n’ubukerarugendo.

Muri Gicurasi, havuzwe inkuru y’ifungwa ry’abahanzi Davis D, Kevin Kade ndetse na Thierry ufotora, icyo gihe byavugwaga ko bakurikiranweho icyaha cyo gusambanya umwana w’umukobwa ufite imyaka 17 (utaruzuza imyaka y’ubukure ukurikije amategeko y’u Rwanda) ari we uyu Kayesu.

Mu kiganiro uyu mukobwa yagiranye na Kwizera ku wa Kane mu ijoro, harimo kumubaza amakuru ye n’ikimuhugije muri iyi minsi mu gihe kandi yamusabye kuririmba, uyu munyezamu aririmba indirimo zirimo ‘Catepilla’ ya Bruce Melody.

Kuri uyu wa Gatanu, tariki ya 20 Gicurasi 2021, Kwizera yahise asezererwa mu Ikipe y’Igihugu kubera imyitwarire idahwitse kuko ubwo yakoraga icyo kiganiro hari mu masaha ya saa tanu z’ijoro.

Ishyirahamwe ry’Umupira ry’Umupira w’Amaguru mu Rwanda (FERWAFA) nta cyo riravuga ku myitwarire y’uyu mukinnyi ndetse ubwo IGIHE yageragezaga kuvugisha umuvugizi waryo, ntiyitabye telefoni ye ngendanwa.

Bamwe mu babonye amashusho y’ikiganiro cy’aba bombi, bavuze ko Kwizera Olivier yaba yarihutishijwe, yongera guhamagarwa nyuma y’iminsi mike afunguwe nyuma yo gukatirwa igifungo cy’umwaka umwe usubitse kubera gukoresha ibiyobyabwenge, agasezera gukina ndetse agahita yisubiraho nyuma y’iminsi 21.

Gatera John yagize ati “Sinzi impamvu abantu bakomeje guhatiriza umukinnyi we ku bwe werekanye ko afite ikibazo cy’imitekerereze akanasezera ariko abantu bagakomeza kumwumvisha ko agishoboye, nta musaruro yatanga mu ikipe yose yakinira. Umupira wacu ukwiye kubamo abanyamwuga.”

Uwitwa MC Theos, we yavuze ko Kwizera yakabaye abanza kujya mu bigo bimufasha kongera kumera neza nyuma y’uko ubwo yigeze kwemerera urukiko ko amaze iminsi afata imiti imufasha kuva ku biyobyabwenge.

Ati “Uyu musore bari kumushakamo byinshi adafite. Abanze ajye mri ‘Rehab’ noneho agaruke ameze neza. Munyumve neza buri wese yakoresha Social media [imbuga nkoranyambaga] ni ibisanzwe, ariko akwiye gutekereza aho ari n’inshingano afite ndetse na reputation [ahahise] yari afite.”

Gusa, hari n’abandi bagaragaje ko nta nka yaciye amabere kuko kuganira n’umuntu nta kazi byishe.

Uwitwa Serge Merci yagize ati “Hanyuma akazi yishe ni akahe? Hari imyitozo yishe? Igipangu se yasimbutse? Kuba ari hariya si gereza, afite uburenganzira nyine bwo gukoresha ‘social media’ icya ashaka.”

Umunyamakuru wa Siporo kuri Radio/TV1, Jah d’Eau Dukuze, na we ari mu bagaragaje ko ibyo Kwizera yakoze nta kosa ririmo kuko mu mwiherero atari muri gereza.

Ati “Ariko rero umwiherero w’Ikipe y’Igihugu si gereza! Umuntu afite uburenganzira bwo kuruhuka mu gihe cyose atishe gahunda y’imyitozo. Turi kwiyicira abakinnyi bacu. Ubanza duhora turekereje tubashakaho amakosa! Keretse umukino uri bube bukeye bwaho.”

Ubwo yagarukaga ku mpamvu yahamagaye Kwizera Olivier, umutoza Mashami Vincent yavuze ko ari wo mwanya wo kumuba hafi mu bibazo yagize, aho kumutererana.

Ati “Olivier ni Umunyarwanda, ni umukinnyi w’umupira w’amaguru, afite byinshi, impano arayifite kandi nta wuyishidikanyanya. Nta mpamvu yo kumwangisha abandi cyangwa kumucira imanza, si ko kumwubaka cyangwa gutuma aba umugabo kandi ntitwamugira igicibwa. Ni igihe cyiza cyo kumwegera ngo tumuhanure.”

Kwizera Olivier ni umwe mu banyezamu b’Abanyarwanda bagaragaza impano yihariye mu mupira w’amaguru ariko na we akaba akunda kurangwa n’imyitwarire ivugisha benshi.

Nyuma y’uko Ikipe y’Igihugu itsindiwe ku mukino wa nyuma wa CECAFA na Uganda mu 2015, Kwizera Olivier wakiniraga APR FC icyo gihe, yashyize ifoto kuri Instagram, yamugaragazaga aryamye mu mafaranga n’amadolari, aho yari iherekejwe n’amagambo y’Icyongereza agira ati “Kigali no bank”, bisobanura ngo “I Kigali nta banki”.

Iyi foto yaje ikurikira indi y’imbwa yari aherutse gushyira ku rukuta rwe rwa Facebook, akayiherekeresha amagambo agira ati “Rimwe na rimwe imbwa ziryana ntacyo zakugira”.

Ibi byose ntibyashimishije Abanyarwanda batari bake ndetse n’uwari umutoza w’Amavubi, Johnny McKinstry, wavuze ko azamufatira ibihano.

Icyo gihe, Kwizera yasabye imbabazi ndetse atangariza urubuga rwa internet rwa FERWAFA ko agiye gufunga konti (kwizeraolivier92) kuri Instagram ndetse n’iyo yari afite kuri Facebook.

Muri Nzeri 2018, Kwizera Olivier yifashishije inyandiko ya Karius watanze Liverpool ku mukino wa nyuma wa UEFA Champions League yatsinzwemo na Real Madrid ibitego 3-1, ubwo yasabaga imbabazi Abanyarwanda.

Icyo gihe, uyu munyezamu yakoze ikosa rikomeye ubwo yashakaga gucenga rutahizamu Jonathan Kodjia agahusha umupira wafashwe n’uyu rutahizamu wa Côte d’Ivoire agatsinda igitego mu mukino u Rwanda rwatsinzwemo ibitego 2-1 kuri Stade ya Kigali mu gushaka itike ya CAN 2019.

Mu gusaba imbabazi, Kwizera yifashishije amagambo ya Loris Karius wahoze akinira Liverpool mbere y’uko atizwa muri Beskitas (ubu ageze muri Union Berlin). Uyu munyezamu w’Umudage na we yigeze gusaba imbabazi nyuma yo gutsindisha Liverpool ku mukino wa nyuma wa Champions League ya 2018.

Kwizera yagize ati “Sindabasha gusinzira kugeza ubu. Ibyo nakoze biracyambunga mu mutwe. Ndasaba imbabazi abakinnyi bagenzi banjye, kuri mwe bafana ndetse n’abatoza. Ndabizi ko nakoze ikosa rikomeye ryatumye mubabara. Murakoze kandi tuzagarukana imbaraga.”

Gutsindwa igitego nk’iki, ntibyari bishya kuri Kwizera dore ko yanatsinzwe icyo bisa muri Shampiyona ya Afurika y’Epfo ubwo yakiniraga Free State Stars ikanganya na Cape Town City ibitego 2-2 muri Kanama 2018, ku munota wa nyuma.

Ubwo Rayon Sports yanganyaga na Gasogi United igitego 1-1 muri Gicurasi 2021, hari abafana ba Rayon Sports batishimiye uko umunyezamu Kwizera Olivier yitwaye kuri penaliti yavuyemo igitego cyo kwishyura.

Gusa, ibyo ntacyo byari bitwaye cyane, ahubwo icyatumye bamwe batangira kumutera icyizere ni uburyo yatorotse umwiherero w’iyi kipe mu Nzove, ajya kuvugana n’andi makipe byavuzwe ko ari Police FC na APR FC.

Muri uko gutoroka ni bwo Kwizera yumvikanyeho ubusinzi no gukoresha ikiyobyabwenge cy’urumogi kugeza ubwo yatabwaga muri yombi n’Urwego rw’Ubugenzacyaha, RIB, muri Kamena.

Ku wa 6 Nyakanga, Urukiko rw’Ibanze rwa Kicukiro rwamuhanishije igifungo cy’umwaka umwe usubitse nyuma y’uko we na bagenzi be barindwi bahamijwe icyaha cyo gukoresha ikiyobyabwenge cy’urumogi mu gihe kuri uyu wa 22 Nyakanga, ari bwo yatangaje ko atazakomeza gukina umupira w’amaguru kuko hari ibindi agiye gukora.

Ku wa 12 Kanama 2021, yareruye avuga ko yisubiyeho. Mu magambo ye yijeje Abanyarwanda ko atazongera kubatenguha, ngo asubire mu makosa yahozemo.

Mu butumwa yanyujije ku rukuta rwe rwa Instragram yagize ati “Nyuma yo kubitekerezaho, nafashe umwanzuro wo kugaruka. Ndizera ko ngifite byinshi byo gutanga muri Club no mu ikipe y’igihugu. Nanejejwe n’ubutumwa bushyigikira buvuye kuri buri umwe. Hari byinshi nakoze bitashimishije umuryango Nyarwanda gusa ndabasezeranya ko bitazasubira ukundi. Mwarakoze ku bw’urukundo mwakomeje kungaragariza muri uru rugendo kuva natangira gukina umupira w’amaguru.”

U Rwanda ruri kwitegura umukino wa Mali uzabera i Agadir muri Maroc ku wa 1 Nzeri 2021 ndetse n’uwa Kenya uzabera i Kigali ku wa 5 Nzeri, mu mikino ibiri ibanza yo mu itsinda E ryo gushaka itike y’Igikombe cy’Isi cya 2021 kizabera muri Qatar.

Kwizera wari mu mwiherero w'Amavubi, yaraye agiye kuri 'Instagram live' aganira na Kayesu Shalon Manzi
Kwizera Olivier yahamagawe mu Ikipe y'Igihugu 'Amavubi' amaze ibyumweru bitatu atangaje ko yasezeye gukina

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .