00:00:00 IGIHE NETWORK KN KINYARWANDA EN ENGLISH FR FRANCAIS

Umukino w’u Bwongereza na Ukraine waciye agahigo

Yanditswe na Bukuru JC
Kuya 5 Nyakanga 2021 saa 04:32
Yasuwe :
0 0

Umukino u Bwongereza bwanyagiyemo Ukraine ibitego 4-0 muri ¼ cy’Igikombe cy’u Burayi (EURO 2020), waciye agahigo ko kurebwa n’abantu benshi kuri televiziyo mu Bwami bw’u Bwongereza muri uyu mwaka wa 2021, aho wakurikiwe n’abasaga miliyoni 20,9.

BBC yatangaje ko uyu mukino wabaye ku wa Gatandatu, tariki ya 3 Nyakanga 2021, ari cyo gikorwa cyarebwe n’abantu benshi kiri kuba muri uyu mwaka wa 2021.

Abagera kuri miliyoni 20,9 ni bo benshi barebye uyu mukino uri kuba mu gihe 81,8% bawurebye wose ubwo u Bwongereza bwatsindaga Ukraine ibitego 4-0, bugakatisha itike ya ½. Hiyongeraho kandi ko warebwe n’abasaga miliyoni 5,2 kuri iPlayer n’urubuga rwa internet rwa BBC.

Umunyamakuru wayo, Gary Lineker, yavuze ko nta kabuza aka gahigo kazakurwaho bidatinze.

Ati “Ndikwiyumvamo ko aka gahigo kazakurwaho na none vuba aha.”

Ubwo u Bwongereza buzaba bukina na Danemark muri ½ cya EURO 2020 ku wa Gatatu, umukino uzerekanwa kuri ITV mu gihe umukino wa nyuma wo uzaca kuri BBC na ITV tariki ya 11 Nyakanga.

Imibare y’abarebye umukino w’u Bwongereza na Ukraine watambutse kuri miliyoni 20,6 barebye uwa 1/8 wabuhuje n’u Budage, ugaca kuri BBC.

Undi mubare uri hejuru w’abakurikirana umukino waherukaga kugaragara mu matsinda ubwo u Bwongereza bwakinaga na Ecosse, warebwe n’abagera kuri miliyoni 20 kuri ITV.

EURO 2020 izakomeza ku wa Kabiri, tariki ya 6 Nyakanga 2021, hakinwa umukino wa mbere wa ½, aho Espagne izahura n’u Butaliyani saa Tatu z’ijoro.

Harry Maguire yishimira igitego yatsindiye u Bwongereza ku mukino wa Ukraine
U Bwongereza buzahura na Danemark mu mukino wa 1/2 cya EURO 2020 uzaba ku wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .