00:00:00 IGIHE NETWORK KN KINYARWANDA EN ENGLISH FR FRANCAIS

U Bwongereza bwayoboye Itsinda D rya EURO, Croatie isezerera Ecosse (Amafoto)

Yanditswe na Eric Tony Ukurikiyimfura
Kuya 23 Kamena 2021 saa 08:11
Yasuwe :
0 0

Igitego cya kabiri cya Raheem Sterling muri EURO 2020, cyafashije u Bwongereza gutsinda Repubulika ya Tchèque, buzamuka buyoboye itsinda D, aho buzahura n’imwe mu makipe yo mu Itsinda F ririmo u Bufaransa, u Budage, Portugal cyangwa Hongrie.

Muri uyu mukino usoza iyo mu Itsinda D wabereye i Wembley ku wa Mbere, u Bwongereza bwatangiye neza, ariko nyuma burushwa cyane n’ikipe y’Igihugu ya Repubulika ya Tchèque.

Raheem Sterling yafunguye amazamu ku gitego yinjije ku munota wa 12, ku mupira wahinduwe na Jack Grealish nyuma y’akazi gakomeye kakozwe na Bukayo Saka.

Grealish na Saka bahawe umwanya ubanza mu kibuga nyuma y’uko Mason Mount yishyize mu kato nyuma yo guhura na Billy Gilmour wa Ecosse, wasanganywe COVID-19.

U Bwongereza bwatsinze iki gitego nyuma y’iminota mike bwari bumaze buhushije ubundi buryo bwabonywe na Sterling, umupira yarengeje umunyezamu Tomas Vaclik ujya hanze.

Umunyezamu w’u Bwongereza, Jordan Pickford, yakuyemo umupira ukomeye watewe na Tomas Holes mu gice cya mbere ku buryo bwashoboraga gufasha Repubulika ya Tchèque kwishyura.

Kapiteni w’u Bwongereza, Harry Kane, akomeje kugorwa no kubona izamu ndetse yahushije igitego mu gice cya mbere ku mupira yateye ugakurwamo na Vaclik.

Jordan Henderson winjiye mu gice cya kabiri, yatsindiye u Bwongereza igitego cya kabiri, ariko umusifuzi wo ku ruhande yerekana ko habayeho kurarira.

Gutsinda uyu mukino byafashije u Bwongereza kuyobora Itsinda D n’amanota arindwi ndetse muri 1/8 buzahuza n’ikipe izaba iya kabiri mu Itsinda F ku wa Kabiri w’icyumweru gitaha.

Itsinda F risoza imikino yaryo ku ku wa Gatatu, aho u Budage buzakina na Hongrie naho u Bufaransa bukine na Portugal saa Tatu z’ijoro.

Uretse Repubulika ya Tchèque yizeye kuzamuka mu makipe yabaye aya gatatu yitwaye neza, indi kipe yabigezeho ni Croatia yatsinze Ecosse ibitego 3-1 mu wundi mukino wo mu Itsinda D, izamuka ifite amanota ane ku mwanya wa kabiri.

EURO 2020 irakomeza kuri uyu wa Kabiri hakinwa imikino isoza iyo mu Itsinda E saa Kumi n’ebyiri, aho Slovakia ikina na Espagne naho Suède ihure na Pologne.

Abakinnyi b'u Bwongereza bapfukamye mbere y'umukino mu gihe aba Repubulika ya Tchèque bakomeje guhagarara
Raheem Sterling yabanje guhusha uburyo bwiza ku mupira yarengeje umunyezamu, ujya hanze
Sterling yifashe mu mutwe nyuma yo guhusha uburyo bwiza mu minota ya mbere
Umupira wahinduwe na Jack Grealish ku munota wa 12, ni wo Raheem Sterling yinjije mu izamu
Ku nshuro ya kabiri muri EURO 2020, Raheem Sterling yongeye gufasha u Bwongereza kubona intsinzi
Kapiteni w'u Bwongereza, Harry Kane, amaze gukina imikino itatu atabona igitego
Kane yananiwe kwakira uburyo bwiza yahushije mu gice cya mbere
Umunyezamu w'u Bwongereza, Jordan Pickford, akuramo umupira ukomeye watewe na Tomas Holes
Jack Grealish asatiriwe na Lukas Masopust wa Repubulika ya Tchèque
Luke Shaw akura umupira kuri Jakub Jankto
Jordan Henderson yatsinze igitego mu gice cya kabiri, ariko cyangwa kuko hari habayeho kurarira
Jude Bellingham, Kane na Henderson bishimira igitego mbere y'uko umusifuzi agaragaza ko habayeho kurarira
Ikipe y'Igihugu y'u Bwongereza yazamutse iyoboye Itsinda D ndetse izahuza n'izaba iya kabiri mu Itsinda F

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .