00:00:00 IGIHE NETWORK KN KINYARWANDA EN ENGLISH FR FRANCAIS

Euro: U Bwongereza bwasanze Denmark muri ½ (Amafoto)

Yanditswe na Habimana Sadi
Kuya 4 Nyakanga 2021 saa 01:04
Yasuwe :
0 0

Mu mukino woroheye ikipe y‘Igihugu y’u Bwongereza, rutahizamu Harry Kane na myugariro Harry Maguire bayifashije gutsinda Ukraine basanga Denmark muri ½ .

Ni umukino wabanjirijwe n’uwahuje Denmark na Repulika ya Tchèque. Uyu mukino wari witabiriwe n’abantu ibihumbi 16 na 306 ubera kuri Baku Olimpia Stadionu mu Butaliyani.

Hakiri kare ku munota wa gatanu Denmark yari ibonye igitego cyatsinzwe na Thomas Delaney ku mupira mwiza yari ahawe na Jens Stryger Larsen. Bidatinze iyi kipe yahise ibona igitego cya kabiri ku munota wa 42 cyatsinzwe na Kasper Dorberg ku mupira wari uhinduwe na Joakim Maehle wawutangiye iburyo.

Denmark yayoboye umukino mu minota 45 y’igice cya mbere. Mu gice cya kabiri, Repulika ya Tchèque yaje ishaka kwishyura ibitego yari yatsinzwe ndetse ku munota wa 49 ibona igitego cyatsinzwe na Patrik Schick ku mupira yari ahawe na Vladmir Coufar.

Denmark yongeye gusatira, ariko Repulika ya Tchèque nayo ikomeza kwihagararaho kuko yahise ihagarara neza mu bwugarizi bwayo. Ku munota wa 59 n’uwa 60 umutoza wa Denmark yakoze impinduka akuramo Kasper Dorberg na Mikkel Damsgaard basimburwa na Yussuf Poulsen na C. Noergaard.

Nyuma yo gukomeza gushaka igitego cyo kwishyura kuri Repulika ya Tchèque, Denmark nayo igakomeza gucunga neza ibitego byayo bibiri, umukino warangiye itahanye intsinzi iyigeza muri ½ .

Umukino wundi wahise ukurikiraho ni uwahuje u Bwongereza na Ukraine. Uyu mukino woroheye cyane u Bwongereza biciye kuri kapiteni wabwo, Harry Kane ukinira Tottenham.

Ni umukino woroheye u Bwongereza kuko Harry Kane yabutsindiye igitego ku munota wa kane ku gitego yatsindishije ukuguru kw’iburyo ahawe umupira na Rahem Sterling. Nyuma yo kubona iki gitego hakiri kare, u Bwongereza bwazamuye icyizere buyobora umukino nubwo iminota 45 yarangiye ari 1-0.

Bakigaruka mu gice kabiri, Harry Magwire ukina mu bwugarizi bw’u Bwongereza yahise atsinda igitego cya kabiri ku mupira wa Luke Shaw. Bidatinze u Bwongereza bwahise bubona izamu ku gitego cyatsinzwe na Harry Kane nanone ku mupira wari utanzwe na Luke Shaw.

Umutoza w’u Bwongereza, Gareth Southgate yahise akora impinduka akuramo Declan Rise na Luke Shaw basimburwa na Jordan Henderson na Kieran Trippier. Ibintu byongeye kuba bibi kuri Repulika ya Tchèque ku munota wa 63 ubwo Henderson yabonaga izamu ahawe umupira na Mason Mount.

U Bwongereza bwongeye gukora impinduka bukuramo Rahem Sterlin na Kalvin Phillips basimburwa na Marcus Rashfod na Jude Bellingham. Izi zari impinduka zigamije kuruhutsa abakinnyi kuko nubundi abatoza babona bamaze kwizera intsinzi.

Southgate yongeye gukora impinduka ku munota wa 73 ubwo kapiteni, Harry Kane wasimbuwe na Dominique Calvert-Lewin. Mu gihe Ukraine yakoze impinduka ebyiri gusa ubwo yakuragamo Serge Krivtsovic na Serhiy Sydorchuk, basimburwa na Viktor Tsigankov na Evergen Makarenko ariko ntacyo izi mpinduka zamaze.

Iminota 90 yarangiye, u Bwongereza bwegukanye itsinze bwisanga bugomba kuzahura na Denmark muri ½. Espagne yo izahura n’u Butaliyani.

Imikino yose ya ½ izakinwa ku wa kabiri tariki ya 6 no ku wa gatatu tariki ya 7 Nyakanga.

Denmark yaherukaga muri 1/2 cy'Igikombe cy'i Burayi mu 1992
Byari ibyishimo kuri Denmark
Agahinda kari kenshi kuri Repulika ya Tchèque
Agahinda ntikica kagira nabi disi!
Jadon Sancho waguzwe na Manchester United, yigaragaje muri uyu mukino yari yagiriwe icyizere cyo kubanzamo
Harry Kane niwe wafunguye ku ruhande rw'u Bwongereza
Harry Kane na bagenzi ubwo bishimiraga igitego
Jordan Henderson ubwo yishimiraga igitego cya kane yari atsindiye u Bwongereza
Andriy Shevchenko utoza Ukraine na Gareth Southgate utoza u Bwongereza, nyuma y'umukino bakoranye mu ntoki
Luke Shaw yagarutse mu bihe bye byiza
Thomas Delaney wa Denmark niwe wabaye umukinnyi witwaye neza kurusha abandi ubwo basezereraga Repulika ya Tchèque
Harry Kane niwe wabaye umukinnyi witwaye neza ku mukino u Bwongereza bwasezereyemo Ukraine
Abakinnyi ba Ukraine nyuma y'umukino bagiye gushimira abafana babo
Harry Maguire nawe yatsindiye u Bwongereza igitego
Gareth Southgate yagiye gushimira abafana b'u Bwongereza bari baje kubashyigikira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .