00:00:00 IGIHE NETWORK KN KINYARWANDA EN ENGLISH FR FRANCAIS

Euro 2020: U Butayilani bwatangiranye intsinzi mu irushanwa ryafunguwe na Andrea Bocelli (Amafoto na Video)

Yanditswe na Umwali Zhuri
Kuya 12 Kamena 2021 saa 10:39
Yasuwe :
0 0

U Butaliyani bwafunguye Euro 2020 butsinda Turikiya ibitego bitatu ku busa mu mukino wabereye kuri Stadio Olimpico aho umuhanzi Andrea Bocelli ufite ubumuga bwo kutabona ariko uzwi nk’umwe mu bari ku Isi bafite ubuhanga mu kuririmba “ténor” ariwe wasusurukije abakurikiye itangirwa ry’iri rushanwa.

Imikino ya Euro yatangiye saa tatu z’ijoro ku isaha y’i Kigali. U Butaliyani bwari mu rugo, bwakiriye Turikiya buyitsinda buyirusha ku kigero cyo hejuru nubwo igice cya mbere cyarangiye amakipe yombi anganya ubusa ku busa.

U Butaliya butozwa na Roberto Mancini bwafunguye amazamu mu gice cya kabiri kigitangira ku mupira wahinduwe ku ruhande rw’iburyo maze Merih Demiral akitsinda.

Ciro Immobile wari umaze igihe kinini adatsindira u Butaliyani, yaje kubonera igihugu cye igitego cya kabiri cyabonetse ku munota wa 66 mu gihe Lorenzo Insigne yaje gushimangira intsinzi ku munota wa 79 umukino urangira utyo.

Ni umukino wihariwe cyane n’u Butaliyani ariko Turikiya yakinaga isa n’iyugarira igobokwa n’umuzamu wayo Ugurcan Cakir inshuro zitari nke.

Ibirori byo gufungura iri rushanwa byasusurukijwe na Andrea Bocelli, umwe mu bahanga Isi ifite muri muzika. Ni umugabo ufite ubumuga bwo kutabona uvuka mu Mujyi wa Tuscany mu Butaliyani.

Yaririmbye imwe mu ndirimbo zifite amateka ku Isi yitwa Nessun Dorma (Ntihagire usinzira). Ni na yo yaririmbwe mu gikombe cy’Isi mu 1990 na Luciano Pavarotti na we ufatwa nk’umwe mu baririmbyi bakomeye Isi yagize, witabye Imana mu 2007. Ni na we wamurikiye Isi impano ya Bocelli.

Iyi ndirimbo yaririmbwe ku mukino wa nyuma w’igikombe cy’Isi cyabereye mu 1994 i Los Angeles, mu 1998 i Paris na 2002 i Yokohama.

Kuri Stadio Olimpico hari hateraniye abafana 16.000.

Imikino iteganyijwe kuri uyu wa Gatandatu harimo uza guhuza u Busuwisi na Pays de Galles saa cyenda z’amanywa, urabera muri Azerbaïdjan. Undi ni uwa Danemark iri buhure na Finlande saa kumi n’ebyiri kuri Stade yitwa Parken.

Uwa gatatu w’umunsi, urahuza u Bubiligi n’u Burusiya saa tatu z’ijoro kuri Stade de Saint-Pétersbourg.

Mu gufungura iyi mikino, abavuza ingoma bamanutse mu mitaka bagana mu kibuga rwagati
Byari ibicika kuri Stadio Olimpico i Roma...
Bocelli ni umwe mu bahanga muri muzika Isi ifite uyu munsi
Nessun Dorma, imwe mu ndirimbo zanditse amateka ku Isi ni yo yafunguye iri rushanwa
Calhanoglu yananiwe gufasha ikipe yo gusatira u Butaliyani nk'uko asanzwe abigenza muri AC Milan
Demiral yitsinda akoresheje igituza nyuma yo kunanirwa kuzibira umupira wari uhinduwe na Berardi
Jorginho yishimana na Insigne nyuma yo gutsinda igitego cya gatatu
Byari ibyishimo ku Ikipe y'Igihugu y'u Butaliyani yatsindiye imbere y'abafana bayo
Immobile yishimira igitego yatsindiye u Butaliyani nyuma y'igihe kinini ataboneza mu rushundura
Abakinnyi ba Turikiya bababajwe no gutsindwa umukino ufungura iri rushanwa
Mancini yishimana na Kapiteni w'ikipe ye, Giorgio Chiellini

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .