00:00:00 IGIHE NETWORK KN KINYARWANDA EN ENGLISH FR FRANCAIS

EURO 2020: U Butaliyani bwatsinze umukino wa gatatu, u Busuwisi butegereza ibizava mu yandi matsinda (Amafoto)

Yanditswe na Eric Tony Ukurikiyimfura
Kuya 20 Kamena 2021 saa 09:53
Yasuwe :
0 0

Ikipe y’Igihugu y’u Butaliyani yasoje imikino yo mu Itsinda A rya EURO 2020, itsinda Pays de Galles y’abakinnyi 10 igitego 1-0, gusa ibihugu byombi bizamukana muri 1/8.

Nyuma y’uko u Butaliyani bubonye itike yo kurenga itsinda mu mikino ibiri ya mbere, kuri iki Cyumweru umutoza wabwo, Roberto Mancini, yakoze impinduka umunani mu bakinnyi babanje mu kibuga.

Iyi kipe yari imbere y’abafana bayo mu Mujyi wa Roma, yatsinze igitego kimwe rukumbi cyabonetse mu mukino ku munota wa 39, cyinjijwe na Matteo Pessina ku mupira yakozeho ari mu rubuga rw’amahina nyuma yo guterwa na Marco Verratti.

Pays des Galles yasigaye ari abakinnyi 10 mu kibuga guhera ku munota wa 55 ubwo Ethan Ampadu yahabwaga ikarita itukura kubera gukandagira Federico Bernardeschi.

Gutsinda uyu mukino byashimangiye kuzuza imikino 30 u Butaliyani budatsindwa mu gihe kandi bumaze imikino 11 yikurikiranya butinjizwa igitego.

Nubwo Pays de Galles yatsinzwe, yazamutse ari iya kabiri mu Itsinda A n’amanota ane, izigamye igitego kimwe mu gihe u Busuwisi bwatsinze Turikiya ibitego 3-1, bwagize amanota ane n’umwenda w’igitego kimwe.

U Busuwisi buzategereza kureba uko mu yandi matsinda bizarangira kugira ngo bumenye ko buzazamuka mu makipe ane yabaye aya gatatu, azabona itike ya 1/8.

Muri 1/8, u Butaliyani buzahura n’ikipe izaba iya kabiri mu Itsinda C mu mukino uzabera i Wembley ku wa Gatandatu mu gihe Pays de Galles izahura n’ikipe ya kabiri mu Itsinda B mu mukino uzabera i Amsterdam kuri uwo munsi.

Imikino ya EURO 2020 izakomeza ku wa Mbere tariki ya 21 Kamena, ahateganyijwe isoza Itsinda B guhera saa Tatu z’ijoro, aho Finland izakina n’u Bubiligi naho u Burusiya bukine na Denmark.

Mbere yaho gato, guhera saa Kumi n’ebyiri, hazaba habaye imikino ibiri isoza itsinda C ubwo Macedonia izaba ikina n’u Buholandi naho Ukraine ikine na Autriche.

Danny Ward ntiyageze ku mupira watewe na Pessina ukavamo igitego cy'u Butaliyani
Matteo Pessina yishimira igitego kimwe rukumbi cyabonetse muri uyu mukino
Ethan Ampadu yahawe ikarita itukura nyuma y'iminota 10 igice cya kabiri gitangiye, azira gukandagira Federico Bernardeschi
Aaron Ramsey aburana ku musifuzi Ovidiu Hategan wahaye Ampadu ikarita itukura
Gareth Bale ahumuriza Ethan Ampadu nyuma yo gusohorwa mu kibuga hashize iminota 10 mu gice cya kabiri
Gareth Bale agerageza ishoti rikomeye mu gice cya kabiri
Bale yifashe mu mutwe nyuma yo kubona umupira yateye ujya hejuru y'izamu
Habura umunota umwe ngo umukino urangire, Salvatore Sirigu yasimbuye Gianluigi Donnarumma mu izamu ry'u Butaliyani
Umunyezamu Danny Ward yarokoye Pays de Galles kenshi
Ikipe y'Igihugu y'u Butaliyani yujuje imikino 30 idatsindwa irimo 11 itinjijwemo igitego
Nubwo yatsinzwe, Pays de Galles yabonye itike ya 1/8 ndetse izakina umukino wayo ku wa Gatandatu i Amsterdam

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .