00:00:00 IGIHE NETWORK KN KINYARWANDA EN ENGLISH FR FRANCAIS

Christian Eriksen agiye gushyirwamo akuma gafasha umutima we gutera neza

Yanditswe na Zigiranyirazo Bajecteur
Kuya 18 Kamena 2021 saa 01:27
Yasuwe :
0 0

Umukinnyi w’ikipe y’Igihugu ya Denmark, Christian Eriksen, agiye gushyirwamo agakoresho gafasha umutima gutera nyuma y’aho agize ibibazo by’ubuzima ubwo yari mu kibuga mu mpera z’icyumweru gishize.

Ku wa Gatandatu w’icyumweru gishize ni bwo ikipe y’Igihugu ya Denmark yahuriye mu mukino wa Euro 2020 n’iya Finland, ariko mu buryo butunguranye ku munota wa 42, Christian Eriksen afatwa n’indwara y’umutima agwa amarabira.

Nyuma yo kwitabwaho akakazanzamuka, Morten Boesen, umuganga mu Ikipe y’Igihugu ya Denmark, yemeje ko uyu mukinnyi w’imyaka 29 agiye gushyirwamo akuma kazwi nka ICD (Implantable Cardioverter Defibrillator) kazajya gafasha umutima we gutera neza mu gihe ahuye n’ikibazo nk’icyo yari yagize mu buryo butunguranye.

ICD ifasha umuntu urwaye umutima, ikagenzura uburyo utera niba ari buhoro cyangwa se vuba ku buryo nta kibazo cy’uburwayi imiterere yawo yamugiraho. Iyo aka kuma ubwako kumvise ikibazo mu mikorere y’umutima nko gutera buhoro, kahita gatanga igisubizo ku buryo utera mu buryo busanzwe.

Uyu muganga yari aherutse gutangaza ko Christian Eriksen yasaga n’uwapfuye hanyuma ahabwa ubuvuzi bwafashije umutima we kongera gutera.

Ubwo yari kwa muganga, Erksen yoherereje ubutumwa abakinnyi bakinana ndetse n’abantu bose bari bahangayikishijwe n’ibyago bitunguranye byari byamugwiriye mu mukino warangiye bagenzi be batsinzwemo na Finland igitego 1-0.

Ubwo hatangwaga amakuru yerekeye uyu mukinnyi ku wa Kane, muganga Boesen yagize ati “Nyuma yo gukorerwa ibizamini bitandukanye hanzuwe ko agomba guhabwa ICD. Aka gakoresho ni nkenerwa nyuma yo gufatwa n’indwara y’umutima ituma uhita utera mu buryo budasanzwe.”

Boesem yakomeje avuga ko Eriksen yemeye icyo gitekerezo cyatanzwe n’abaganga nk’igisubizo ndetse uwo mugambi unashimangirwa n’inzobere mu buvuzi ku rwego rw’igihugu no ku rwego mpuzamahanga nk’umuti ukwiriye w’icyo kibazo.

Uyu muganga w’ikipe y’igihugu ya Denmark yasabye abantu bose kutivanga mu kibazo cya Christian Eriksen.

Ati “Turashishikariza buri wese guha amahoro Christian n’umuryango we kandi ntihagire uwivanga mu buzima bwite bwabo mu gihe kiri imbere.”

Umukinnyi uri gukinira u Buholandi muri Euro ya 2020, Daley Blind, wanakinanye na Christian Eriksen mu ikipe ya Ajax, na we yashyizwemo aka kuma ka ICD nyuma yo kugira ikibazo cy’umutima mu 2019.

Christian Eriksen agiye gushyirwamo agakoresho gafasha umutima gutera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .