Umukinnyi wa Cameroun yakuwe mu bakina CAN kubera uburwayi bwatuma apfira mu kibuga

Yanditswe na Eric Tony Ukurikiyimfura
Kuya 24 Kamena 2019 saa 09:04
Yasuwe :
0 0

Rutahizamu wa Cameroun, Diederrick Joël Tagueu, yakuwe mu bakinnyi bazakina Igikombe cya Afurika cy’uyu mwaka kiri kubera mu Misiri nyuma yo gusanganwa uburwayi bw’umutima bushobora gutuma apfira mu kibuga.

Umuganga w’ikipe y’igihugu ya Cameroun, William Ngathcou, yemeje ko Diederrick Joël Tagueu w’imyaka 26 kuri uyu wa Mbere yagaragayeho uburwayi bw’umutima bushobora kumugiraho ingaruka zitari nziza akomeje gukina.

Uyu mukinnyi ukinira Maritimo FC mu cyiciro cya mbere muri Portugal, yari mu bakinnyi umutoza Clarence Seedorf yari yahisemo kwitabaza muri iki gikombe cya Afurika kiri kuba ku nshuro ya 32, ariko kugira ngo akinire igihugu cye bwa mbere mu irushanwa rikomeye nk’iri, azategereza ubutaha.

Diederrick Joël Tagueu ukomoka mu gace ka Nkongsamba, yatsinze ibitego birindwi mu mikino yakiniye Maritimo muri uyu mwakaw’imikino, ariko amakuru yatanzwe n’abaganga ba Cameroun, avuga ko afite ikibazo cy’uburwayi bw’umutima bushobora kugira ingaruka ku buzima bwe, aho bwa mbere bwari bwamugaragayeho bari kwitegura iri rushanwa muri Qatar.

Cameroun yamenyesheje Impuzamashyirahamwe y’umupira w’Amaguru ku mugabane wa Afurika, CAF, uburwayi bw’uyu mukinnyi na gahunda yo kumusimbuza bitarenze mu masaha 24 mbere y’umukino iki gihugu kizahuramo na Guinée Bissau kuri uyu wa Kabiri mu Mujyi wa Ismaila.

Iki gihugu gifite igikombe cya Afurika giheruka, kizakina uyu mukino kidafite kandi myugariro w’iburyo, Fai Collins Ngoran kubera amakarita abiri y’umuhondo yabonye mu mikino yo gushaka itike y’iri rushanwa ryatangiye ku wa Gatanu.

Diederrick Joel Tagueu, intizanyo ya Cruzeiro muri Maritimo, ntabwo agikinnye CAN 2019 kubera uburway bw'umutima bushobira gutuma apfira mu kibuga
Cameroun yatwaye CAN 2017, izatangira guhagarara ku gikombe yegukanye ihura na Guinée Bissau kuri uyu wa Kabiri saa 17:00
Diederrick Joël Tagueu yakuwe mu bakinnyi bazakinira Cameroun muri CAN 2019 iri kubera mu Misiri
Diederrick Joël Tagueu ari kumwe na Minisiti wa siporo muri Cameroun Narcisse Mouelle Kombi, umuganga w'ikipe n'umutoza Clarence Seedorf

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza