Perezida wa Misiri yategetse ko ikipe y’Igihugu y’Umupira w’Amaguru izajya itozwa n’abenegihugu

Yanditswe na Eric Tony Ukurikiyimfura
Kuya 1 Kanama 2019 saa 10:29
Yasuwe :
0 0

Perezida wa Misiri, Abdel Fattah El-Sisi, yategetse ko ikipe y’igihugu y’Umupira w’Amaguru izajya itozwa n’umutoza w’umwenegihugu nyuma y’uko asanze nta kidasanzwe abanyamahanga bayigezaho.

Ibi uyu muyobozi wa Misiri yabitangaje kuri uyu wa Gatatu ubwo yari mu mwiherero w’iminsi ibiri wahurije hamwe urubyiruko rwo mu Misiri, rwiga ku iterambere ry’igihugu.

Perezida Sisi wasubizaga ibibazo bitandukanye byabajijwe n’urubyiruko ruri hagati y’imyaka 16 na 30, yavuze ko Misiri itazongera gutozwa n’umunyamahanga.

Ati” Ntabwo tuzongera guha akazi umunyamahanga, dufite abatoza bahagije b’abanya-Misiri.”

Perezida Sisi yavuze ko yafashe iki cyemezo nyuma yo kubiganiraho na Minisitiri w’Urubyiruko na Siporo, Ashraf Sobhi.

Misiri imaze kwegukana igikombe cya Afurika inshuro zirindwi, yasezerwe na Afurika y’Epfo mu irushanwa ry’uyu mwaka yari yakiriye, ubwo yatsindwaga igitego 1-0 muri 1/8.

Muri izi nshuro zirindwi, eshanu muri zo, iri rushanwa ryatwawe n’abenegihu, aho mu 1959, Misiri yatozwaga na Mourad Fahmy, mu 1962 na Pál Titkos, mu 1986 na Mike Smith, mu 1998 yatozwaga na Mahmoud El-Gohary mu gihe Hassan Shehata yatwaye iri rushanwa inshuro eshatu ubwo yatozaga Misiri hagati ya 2006 na 2010.

Ubwo Misiri yari imaze gusezerewa mu kwezi gushize, uwari Perezida w’Ishyirahamwe ry’Umupira w’Amaguru, Hani Abou Rida yareguye mu gihe umutoza w’umunya-Mexique, Javier Aguirre yahise yirukanwa bukeye bwaho.

Abarimo Hassan Shehata, Ehab Galal, Hossam Hassan, Hossam El Badry na Tarek El Ashry ni bo bazavamo umwe uhabwa ikipe ya Les Pharaohs.

Perezida wa Misiri Abdel Fattah El-Sisi ubwo yakiraga ikipe y'igihugu mbere y'Igikombe cya Afurika bakiriye mu minsi ishize
Perezida Sisi yasuye kandi Les Pharaohs ku kibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza