CAN 2019: Uganda yatunguye RDC, ibona intsinzi ya mbere mu myaka 41

Yanditswe na Eric Tony Ukurikiyimfura
Kuya 22 Kamena 2019 saa 08:33
Yasuwe :
0 0

Ikipe y’igihugu ya Uganda yabonye intsinzi ya mbere mu gikombe cya Afurika mu myaka 41, ni nyuma yo gutsinda Repubulika Iharanira Demokarasi ya Congo ibitego 2-0 mu mukino wo mu itsinda A. Uganda yaherukaga intsinzi muri iri rushanwa mu 1978.

Muri uyu mukino wabereye muri Stade Mpuzamahanga ya Cairo, Uganda yafunguye amazamu ku gitego cyatsinzwe na Patrick Henry Kaddu n’umutwe ku munota wa 14 nyuma yo guherezwa na Farouk Miya wateye koruneri.

Uganda yari yabanje kurema uburyo butandukanye muri uyu mukino, igaragaza inyota yo gutsinda umukino hakiri kare, aho Farouk Miya yateye umupira ukomeye kuri coup-franc, abanye-Congo bagakiza izamu.

Repubulika Iharanira Demokarasi ya Congo yabonye coup-franc yo muri metero nka 20 ku ikosa Emmanuel Okwi yakoreye kuri Issama Mpeko, rihanwa na Cedric Bakambu wateye umupira ufatwa neza na Denis Onyango.

Nyuma y’iminota ibiri, Kaddu yashoboraga gutsindira Uganda ikindi gitego, umupira yateresheje umutwe nyuma yo guhindurwa na Bevis Mugabi uca ku ruhande.

Repubulika Iharanira Demokarasi ya Congo yongeye guhusha uburyo burimo ubwabonywe na Mpoku mbere y’uko abakinnyi bafata akaruhuko ko kunywa amazi kubera ubushyuhe bwinshi buri mu Misiri.

Habura iminota itanu ngo igice cya mbere kirangire, Uganda yashoboraga guhabwa penaliti ubwo umunyezamu Ley Matampi yakururaga Farouk Miya, umusifuzi arabyirengagiza mu gihe Cedric Bakambu yabonye ubundi buryo bwiza ku ruhande rw’abanye-Congo, umupira ushyirwa muri koruneri na Onyango.

Nyuma y’iminota itanu amakipe yombi avuye kuruhuka, Emmanuel Okwi yatsindiye Uganda igitego cya kabiri n’umutwe, giturutse ku mupira w’umuterekano watewe na Farouk Miya.

Marcel Tisserand na Jonathan Bolingi bananiwe gutsindira igihugu cyabo mu minota yakurikiye mbere y’uko umutoza Florent Ibenge akora impinduka, Chancel Mangulu Mbemba asimburwa na Jacques Mughoma mu gihe Yannick Bolasie yasimbuwe na Britt Assombalonga.

Ku ruhande rwa Uganda, Patrick Kaddu yasimbuwe na Allan Kyambadde, Lumala asimburwa na Isaac Muleme mu gihe Timothy Awany yasimbuye Farouk Miya.

Uganda yaherukaga gutsinda umukino mu gikombe cya Afurika ubwo yatsindaga Nigeria ibitego 2-1 mu mikino ya ½ mu 1978.
Uganda yahise iyobora itsinda A n’amanota atatu inganya na Misiri yatsinze Zimbabwe igitego 1-0 mu mukino wafunguye irushanwa kuri uyu wa Gatanu.

Muri iri tsinda, bazongera gukina ku wa Gatatu, aho Uganda izakina na Zimbabwe mu gihe Misiri izakina na Repubulika Iharanira Demokarasi ya Congo.

Abakinnyi babanjemo ku mpande zombi:

Uganda: Denis Onyango, Bevis Mugabi, Godfrey Walusimbi, Jjuuko Mrushid, Hassan Wasswa Mawanda, Mike Azira, Emmanuel Arnold Okwi, Khalid Aucho, Faruku Miya, Patrick Henry Kaddu, Abdul Lumala.

Repubulika Iharanira Demokarasi ya Congo: Ley Matampi Ngumbi, Issama Mpeko Djos, Marcel Jany Tisserand, Paul Jose Ebunge Mpoku, Yannick Yala Bolasie, Elia Lina Meschack, Arthur Fuka Masuaku Kawela, Christian Luyindama Nekadio, Cedric Bakambu, Merveille Bope Bokadi na Chancel Mangulu Mbemba.

Uganda yatsinze Repubulika Iharanira Demokarasi ya Congo mu mukino w'itsinda A wabaye kuri uyu wa Gatandatu
Abakinnyi ba Uganda bishimira igitego muri uyu mukino wa mbere igihugu cyabo gitsinze kuva mu 1978
Abafana baherekeje amakipe mu Misiri ntabwo ari benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza