CAN 2019: Ibisobanuro by’amazina yahawe amakipe y’ibihugu ari gukina Igikombe cya Afurika

Yanditswe na Eric Tony Ukurikiyimfura
Kuya 26 Kamena 2019 saa 01:37
Yasuwe :
0 0

Igikombe cya Afurika kiri kuba ku nshuro ya 32 kirakomeje mu Misiri. Ibihugu 24 bikomeje guhatanira igikombe kizatangwa tariki ya 19 Nyakanga.

Amazina y’utubyiniriro aba afite kinini avuze cyane mu mupira w’amaguru wa Afurika, aho atari no kugira ngo ashimishe abafana gusa ahubwo atera ingufu n’abakinnyi.

Amazina y’amakipe, abafana bisize amarangi, imbyino zidasanzwe, vuvuzela n’ingoma ni bimwe mu bikomeje kuranga iri rushanwa rya Afurika rihanzwe amaso n’abatari bake.

Dore zimwe mu nyamanswa zitiriwe amakipe y’ibihugu ari gukina iri rushanwa:

Ibisiga (Kagoma)

Muri ibi byumweru bitatu igikombe cya Afurika kizamara, iri zina uzaryumva kenshi.

Ikipe y’igihugu ya Nigeria yambara imyenda y’icyatsi yahawe izina rya kagoma zo ku rwego rwo hejuru ‘Super Eagles’ kubera ko mu kirangantego cy’igihugu harimo igisiga.

Tunisia na yo izwi nka Les Aigles du Carthage bitewe n’amateka y’iki gihugu cyavuye mu gace ka kera kazwi nka Carthage mu gihe ikirango cy’igihugu cyayo nacyo harimo igisiga.

Hari kandi na Les Aigles du Mali na bo bafite igisiga mu kirangantego cyabo mu gihe Uganda ‘Cranes’ ari umusambi ndetse yatangiriye mu bicu itsinda Repubulika Iharanira Demokarasi ya Congo.

Intare

Ikipe y’igihugu ya Cameroun ni Les Lions Indomitables bisobanura intare zitavogerwa ndetse bishimangira ubushongore n’ubukaka bw’iyi kipe imaze kwegukana iri rushanwa inshuro enye zirimo n’igikombe giheruka gukinirwa mu 2017.

Iya Maroc ni Les Lions de l’Atlas bigendanye n’umusozi wa Atlas, aho yitiriwe intare ziba kuri uwo musozi uri muri iki gihugu cy’abarabu giherereye mu Majyaruguru ya Afurika mu gihe iya Sénégal ari Les Lions de la Teranga. Teranga ngo bisobanura urugwiro mu rururimi rw’iki wolof kivugwa muri iki gihugu.

Ikipe y’igihugu ya Côte d’Ivoire yitiriwe Inzovu ‘Les Elephants’ ndetse isobanura neza izina ry’iki gihugu cyamenyekanye cyane mu bucuruzi bw’amahembe y’inzovu.

Guinée ni Syli Nationale bisobanura Inzovu z’igihugu cyane ko bo bazifata nk’ikimenyetso cy’ubumwe n’imbaraga.

Ikipe y’gihugu ya Algérie yahawe izina rya Les Fennecs. Fennec ni akanyamaswa gasa n’umuhari kibera mu butayu bwa Arabia ndetse n’ubwa Sahara buturanye n’iki gihugu ngo kagenda nijoro kandi karya ibiryo byose. Kazwiho kugira amatwi maremare kandi gapima ikiro n’igice.

Madagascar izwi nka Barea, bumwe mu bwoko bw’amatungo yitwa Zebu ameze nk’ibimasa ahanini byifashishwa mu buhinzi. Umutwe w’imwe muri zo ukaba unaba mu kirangantego cy’iki gihugu cyibera mu nyanja.

Guinea-Bissau izwi nka Djurtus, amasega, ubwoko bw’imbwa z’agasozi buba muri iki gihugu.

Congo Kinshasa, izwi nka Léopards, ingwe na ho Abarundi bo ni Intamba ku rugamba.

Angola izwi nka Palancas Negras, Amasha y’imikara. Izi mpene z’inyagasozi ngo ziganje muri icyo gihugu.

Bénin izwi nk’inkima, Les Écureuils, utunyamaswa dukunda kwibera mu biti ndetse ni two duto mu ziri mu gikombe cya Afurika.

Zimbabwe, izwi nka The Warriors, indwanyi mu gihe Namibia yo izwi nka Brave Warriors, indwanyi z’inyamuhate

Abami bahanganye n’indwanyi

Ikipe y’igihugu ya Misiri izwi nka Les Pharaohs bisobanura abami bo muri iki gihugu, iri mu itsinda rimwe na Warriors cyangwa indwanyi za Zimbabwe.

Misiri ifite ibihangange nka Mohamed Salah wabaye umukinnyi w’umwaka muri Afurika, irashaka kwegukana igikombe cya Afurika ku nshuro ya munani.

Ghana na Kenya bagiye gushakira ahandi

Harambee Stars ya Kenya ni izina ry’Igiswahili rivuga guhuriza hamwe, akaba ari akabyiniriro kahawe ikipe yabo mu rwego rwo gusaba abakinnyi n’abatuye Kenya gutahiriza umugozi umwe bakagera ku ntego bihaye.

Bivugwa ko ryakoreshwaga nk’intero y’abanyakenya ubwo bubakaga inzira ya gari ya moshi mu gihe cy’Ubukoloni kugira ngo badacika intege kuko barakubitwaga cyane.

Black Stars ya Ghana ihagarariye inyenyeri y’umukara iri mu ibendera ry’iki gihugu ndetse iyi kipe ifatwa nk’iteza imbere ubumwe mu gihugu mu gihe Tanzania ni Taifa Stars bisobanura aba star b’igihugu.

Maurtanie ni Almoravide rimokoka ku bwami bw’aba Almoravides bwabayeho mu kinyejana cya gatanu n’icya gatandatu bukaba ubwami bw’abayisilamu bwigaruriye ibihugu bya Maghreb icyo gihe.

Afurika y’epfo, izwi nka Bafana Bafana bivuga abahungu mu Kizulu.

Abafana b’umupira w’amaguru bategereje itariki ya 19 Nyakanga ngo bamenye koko niba igisiga kizaguruka kigogoga ibicu, niba se intare zizatontoma cyangwa Abami bazongera kuyobora.

Ikirango cy'Igikombe cya Afurika 2019 gikoze mu ishusho y'abami ba Misiri ba kera 'Pharaohs'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza