CAN 2019: U Burundi bwatsinzwe na Madagascar, amahirwe yo kurenga amatsinda aragabanuka

Yanditswe na Eric Tony Ukurikiyimfura
Kuya 28 Kamena 2019 saa 11:49
Yasuwe :
0 0

Ikipe y’igihugu y’u Burundi ‘Intamba ku Rugamba’ yatakaje umukino wa kabiri yikurikiranya mu gikombe cya Afurika, aho yatsinzwe igitego 1-0 na Madagascar mu mukino washoboraga kuyiha amahirwe yo gukomeza mu mikino ya 1/8 y’iri rushanwa riri kubera mu Misiri.

Aya makipe yombi ari gukina iri rushanwa bwa mbere, yari akeneye amanota atatu ya mbere, cyane ku Burundi bwatsinzwe na Nigeria mu mukino ubanza mu gihe Madagascar yo yari yanganyije na Guinée muri iri tsinda B.

Intamba ku Rugamba z’u Burundi zagerageje kwiharira umupira mu mukino, ariko birangira amahirwe asekeye abanya-Madagascar.

Igice cya mbere cyarangiye amakipe yombi anganya ubusa ku busa, nubwo Madagascar hari uburyo bubiri yahushije bwo gutsinda umunyazamu Jonathan Nahimana agahagarara neza.

Ku munota wa 15, Carlous Andriamatsoro yateye ishoti rirerire ryafashwe n’umunyezamu w’u Burundi mu gihe Cédric Amissi yabonye uburyo bwiza ku ruhande rw’Abarundi, ubwugarizi bwa Madagascar buramuzibira mbere y’uko Ima Andriatsima ashaka gufungura amazamu n’umutwe umupira ukajya hanze.

Mu gice cya kabiri, amakipe yombi nta buryo bwinshi yabonye, aho mu minota 20 ya mbere habonetsemo coup-franc yatewe na Gaël Bigirimana umupira ugaca hejuru y’izamu. Uyu mukinnyi yongeye kubona uburyo nk’ubu ku munota wa 68, umunyezamu Adrian akuramo umupira.

Ku munota wa 76, Madagascar yabonye coup-franc yo hafi y’izamu maze Marco Ilaimaharitra ayitera neza mu ruhande umunyezamu w’intamba atari ahagazemo, atsindira igihugu cye igitego cyagihesheje intsinzi y’amateka.

Olivier Niyungeko utoza u Burundi, yakoze impinduka, yinjiza mu kibuga Mohamed Amissi na Laudit Mavugo, basimbuye Saido Berahino na Amissi Cédric, ariko ntibyagira icyo bihindura ku musaruro kuko amahirwe Mohamed Mossi yabonye akigera mu kibuga atayabyaje umusaruro.

Gutsindwa uyu mukino byasigiye umukoro ukomeye u Burundi bwashakaga gukora amateka yo kurenga amatsinda ku nshuro ya mbere muri iri rushanwa dore ko kugira ngo bubigereho busabwa gutsinda Guinée ibitego byinshi mu mukino uzaba ku Cyumweru maze bugategereza kureba niba bwaboneka mu makipe yabaye aya gatatu yitwaye neza.

Nigeria yamaze kubona itike ya 1/8, iyoboye itsinda B n’amanota atandatu ndetse izasoza imikino yo muri iri tsinda ihura na Madagascar ya kabiri n’amanota ane. Guinée ifite inota rimwe mu gihe u Burundi nta nota burabona.

Marco Ilaimaharitra yatsinze igitego cyabonetse muri uyu mukino ku mupira w'umuterekano
Abakinnyi ba Madagascar bishimira igitego cyahaye ikipe yabo intsinzi ya mbere mu gikombe cya Afurika
Nahimana Shassir aterana umupira Anicet Andrianantenaina wa Madagascar
Ngandu Omar ahanganiye umupira na rutahizamu wa Madagascar
Ngandu Omar azamuka mu kirere, aho yasumbye Pascal Razakanantenaina ku mupira w'umuterekano watewe ku ruhande rw'u Burundi
Jerome Mombri, Thomas Fontaine na Pascal Razakanantenaina bishimira intsinzi babonye imbere y'u Burundi
Olivier Niyungeko n'ikipe ye ntibabashije gutahukana intsinzi mu mukino wa kabiri bakinnye mu gikombe cya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza