CAN 2019: Nigeria yabaye igihugu cya mbere kigeze muri 1/8

Yanditswe na Eric Tony Ukurikiyimfura
Kuya 26 Kamena 2019 saa 09:52
Yasuwe :
0 0

Igitego cyo ku munota wa 73 cyatsinzwe na Kenneth Omeruo cyafashije Nigeria kuba igihugu cya mbere kibonye itike ya 1/8 cy’igikombe cya Afurika gikomeje kubera mu Misiri, nyuma yo gutsinda Guinée igitego 1-0 mu mukino wa kabiri wo mu itsinda B.

Muri uyu mukino wabereye mu Mujyi wa Alexandria kuri uyu wa Gatatu, umutoza wa Nigeria, Gernot Rohr yakoze impinduka, Odion Ighalo, Ahmed Musa, Leon Balogun na Moses Simon babanza mu kibuga mu gihe babanje hanze ku mukino batsinzemo u Burundi.

Ku ruhande rwa Guinée, umutoza Paul Put na we yabanjemo Naby Keïta ndetse ni wo mukino wa mbere akinnye guhera tariki ya 1 Gicurasi, mu gihe ikipe yashakaga uburyo yabona amanota atatu ya mbere mu irushanwa.

Guinée yagaragaje inyota yo gutsinda hakiri kare, ibona uburyo bw’ishoti rigana ku izamu ku munota wa kabiri, Ibrahim Cissé agerageje aya mahirwe umunyezamu Daniel Akpeyi awukuramo mbere y’uko bagenzi be bakiza izamu.

Ahagana ku munota wa 10, Alex Iwobi yatakaje umupira mu kibuga hagati, Amadaou Diawara awuhereza Sory Kaba ariko Balogun arahagoboka.

Nigeria yabonye uburyo bwa mbere bugana ku izamu ku munota wa 13 ubwo Wilfred Ndidi yatereshaga umutwe kuri koruneri yari itewe na Peter Etebo, umupira uca hejuru y’izamu. Ighalo na we yateye ishoti ryafashe inshundura ntoya ubwo yari aherejwe na Ndidi.

Mu gice cya kabiri, Nigeria yashyize igitutu gikomeye kuri Guinée, ibona ubundi buryo kuri Iwobi wateye ishoti , umunyezamu wa Guinée agashyira umupira muri koruneri.

Umutoza Paul Put yakoze impinduka ku munota wa 70, akuramo Naby Keïta, asimburwa na Alhassane Bangoura. Nyuma y’iminota itatu gusa, Nigeria yahise ibona igitego cyatsinzwe na Omeruo wazamutse mu kirere ashyira umutwe ku mupira yari ahawe na Moses Simon wateye koruneri.

Gutsinda uyu mukino byafashije Nigeria kuyobora itsinda n’amanota atandatu mu gihe Syli Nationale yasigaye isabwa gutsinda umukino izahuramo n’u Burundi kugira ngo yizere gukomeza.

Undi mukino wa kabiri muri iri tsinda uzaba kuri uyu wa Kane, aho u Burundi na Madagascar ziri gukina iri rushanwa ku nshuro ya mbere zizesurana.

Imikino isoza iri itsinda izaba ku Cyumweru, aho u Burundi buzakina na Guinée mu gihe Nigeria izahura na Madagascar.

Kenneth Omeruo yasumbye abakinnyi ba Guinee abatsindana igitego ku mupira wari uvuye muri koruneri
Kenneth Omeruo amwenyura nyuma yo gufasha igihugu cye gufungura amazamu mukino bahuyemo na Guinee
Myugariro wa Nigeria Kenneth Omeruo yishimira igitego hamwe na bagenzi be
Naby Keita ntiyorohewe n'abakinnyi ba Nigeria barimo Wilfred Ndidi
Issiaga Sylla wa Guinea atanga umupira Odion Ighalo wa Nigeria
Abafana ba Guinee bari bafite icyizere ko ikipe yabo ishobora gutsinda ariko ntibyakunze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza