CAN 2019: Ikoranabuhanga rya VAR rigiye gutangira gukoreshwa

Yanditswe na Eric Tony Ukurikiyimfura
Kuya 9 Nyakanga 2019 saa 03:44
Yasuwe :
0 0

Ikoranabuhanga ry’amashusho ryifashishwa mu misifurire rizwi nka “VAR” [Video Assistant Referee], rigiye gutangira gukoreshwa mu Gikombe cya Afurika kiri kubera mu Misiri, guhera mu mikino ya ¼ izatangira gukinwa kuri uyu wa Gatatu.

Ubwo umushinga wo kuzana iri koranabuhanga mu Gikombe cya Afurika wemezwaga, ryagombaga gukoreshwa muri ½ , ariko rizatangira gukoreshwa muri ¼, aho ryitezweho kugabanya ibyemezo bimwe by’abasifuzi bitavugwagaho rumwe.

Uburyo bwa penaliti yimwe u Burundi mu matsinda, imipira yakozwe n’abakinnyi ba Ghana mu mukino wabaye kuri uyu wa Mbere ni bimwe mu byemezo bitavuzweho rumwe bimaze kugaragara muri rushanwa riri kuba ku nshuro ya 32.

VAR ntiyakundaga gukoreshwa kuri uyu mugabane, ariko nyuma y’uko Wyadad Casablanca yikuye mu kibuga ivuga ko yibwe muri CAF Champions League, Ishyirahamwe ry’Umupira w’Amaguru ku Isi, FIFA, ryasabye Impuzamashyirahamwe y’uyu mukino muri Afurika, CAF, kujya ryifashishwa.

Perezida wa CAF, Ahmad Ahmad, yanze ko iri koranabuhanga rya VAR rikoreshwa mu mikino ibanza kuko ngo akenshi bigorana ko abantu bahita baryiyumvamo.

Muri Werurwe uyu mwaka, abasifuzi ba CAN 2019, barimo umunyarwanda Hakizimana Louis, bakoze amahugurwa ya mbere kuri iri koreshwa ry’amashusho mu gufata imyanzuro mu kibuga.

Iri koranabunga ryakoreshejwe mu gikombe cy’Isi cya 2018 cyabereye mu Burusiya nyuma yo kwemeza ikoreshwa ryayo n’Inama ya FIFA yabaye muri Werurwe uwo mwaka ndetse kuri ubu rikoreshwa mu marushanwa atandukanye.

Ikoranabuhanga ry’amashusho “VAR” [Video Assistant Referee], rifasha umusifuzi (cyangwa itsinda ryabo) utari mu kibuga gufatanya n’uyoboye umukino mu gufata ibyemezo byo mu bihe bine gusa bikomeye mu gihe umukino uba uri kuba.

Ibyo byemezo harimo kwemeza cyangwa guhakana ikosa niba igitego cyinjiye mu izamu mu gihe bishidikanywaho; umwanzuro kuri penaliti; kwemeza ko umukinnyi ahabwa ikarita itukura ako kanya ndetse rikanakoreshwa mu gihe habayeho kwibeshya umusifuzi akaba yasohora umukinnyi utari uwakosheje.

VAR yakoreshejwe bwa mbere ku mugabane wa Afurika ubwo Wydad AC yo muri Maroc yegukanaga CAF Super Cup itsinze TP Mazembe yo muri Repubulika Iharanira Demokarasi ya Congo igitego 1-0 tariki ya 24 Gashyantare 2018.

Shampiyona y’u Bwongereza ni imwe mu marushanwa akomeye ataratangira gukoreshwamo ubu buryo, ariko amakipe yaho yamaze kubitorera, rikazakoreshwa umwaka utaha w’imikino.

Uko amakipe azahura muri ¼ cya CAN 2019 iri kubera mu Misiri

  • Tariki ya 10 Nyakanga- Sénégal vs Bénin (Stade du 30 Juin, 18:00 )
  • Tariki ya 10 Nyakanga- Nigeria vs Afurika y’Epfo (Cairo, 21:00)
  • Tariki ya 11 Nyakanga - Algérie vs Côte d’Ivoire (Suez, (18:00)
  • Tariki ya 11 Nyakanga - Madagascar vs Tunisie (Al Salam, 21:00)
Ikoranabuhanga rya VAR riratangira gukoreshwa mu Gikombe cya Afurika guhera kuri uyu wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza