CAN 2019: Hitegwe iki mu mikino ya kimwe cya kabiri?

Yanditswe na Eric Tony Ukurikiyimfura
Kuya 14 Nyakanga 2019 saa 11:11
Yasuwe :
0 0

Imikino y’Igikombe cya Afurika kiri kubera mu Misiri igeze ahakomeye, aho kuri iki Cyumweru harara hamenyekanye amakipe azakina umukino wa nyuma muri iri rushanwa riri kuba ku nshuro ya 32.

Uyu munsi Sénégal irakina na Tunisie guhera saa 18:00 mu gihe Algerie yisobanura na Nigeria guhera saa 21:00 muri ½.

Mu mikino itanu imaze guhuza Sénégal na Tunisie mu Gikombe cya Afurika, buri imwe yatsinze umukino umwe, zinganya indi itatu. Sénégal yatsinze uheruka guhuza ibihugu byombi ku bitego 2-0 muri Gabon mu 2017.

Nigeria na Algérie zifitanye amateka akomeye dore uko ubwo Nigeria yegukanaga iri rushanwa bwa mbere mu 1980, yatsinze Algérie ibitego 3-0 mu gihe na Algerie yegukanye iri rushanwa inshuro imwe mu 1990, itsinze Nigeria 1-0.

Uyu uraza kuba umukino wa cyenda amakipe yombi ahuriyemo muri iri rushanwa ndetse ni wo uciye agahigo ko kwisubiramo cyane mu Gikombe cya Afurika.

Muri aya makipe uko ari ane yabashije kugera muri ½, Nigeria ni yo yegukanye iri rushanwa inshuro zirenze imwe (1980, 1994 na 2013).

Alex Iwobi wa Nigeria usanzwe ukinira Arsenal mu Bwongereza, avuga ko amakipe yose yageze muri iki cyiciro yabikoreye.

Ati ”Yose uko ari ane afite ubushobozi bwo kwegukana iri rushanwa. Twese dufite abakinnyi beza. Ntabwo namenya ikipe ihabwa amahirwe muri aka kanya.”

Amazina akomeye asigaye mu Gikombe cya Afurika

Rutahizamu wa Sénégal, Sadio Mané, ni umwe mu bakinnyi bafite izina rikomeye usigaye muri iri rushanwa, aho mu minsi ishize yatangaje ko umudali wa UEFA Champions League aheruka guhabwa muri Liverpool azawusimbuza uw’igikombe cya Afurika ashaka gutwarana na Les Lions de la Teranga.

Mané kuri ubu anganya ibitego bitatu n’abarimo Adam Ounas wa Algérie, Odion Ighalo wa Nigeria na Cédric Bakambu watahanye na Repubulika Iharanira Demokarasi ya Congo.

Andi mazina akomeye asigaye muri iri rushanwa ni Idrissa Gana Gueye na Kalidou Koulibaly bombi ba Sénégal; Wahbi Khazri, Ferjani Sassi na Youssef Msakni ba Tunisie.

Riyad Mahrez wa Manchester City, Ounas wa Napoli na Sofiane Feghouli wa Galatasaray bari kumwe na Algérie muri iri rushanwa mu gihe Nigeria ifite abarimo Alex Iwobi, Wilfred Ndidi, Odion Ighalo na Samuel Chukwueze.

Ibihangange byarasezerewe

Amakipe yegukanye iri rushanwa kenshi, Misiri, Cameroun na Ghana yose yamaze gusezererwa atarenze 1/8, Nigeria isigara ari yo kipe ifite ibigwi mu yageze kure kugeza ubu, aho iheruka kwegukana irushanwa rya 2013.

Sénégal yigeze gukora amateka yo kugera muri ¼ cy’Igikombe cy’Isi, ntiratwaraho Igikombe cya Afurika ndetse ibihe byiza yagize muri iri rushanwa ni ubwo yageraga ku mukino wa nyuma mu 2002, igatsindirwa kuri penaliti na Cameroun.

Tunisia yegukanye iri rushanwa mu 2004 ubwo yari yaryakiriye ndetse yari kumwe n’u Rwanda mu itsinda. Algérie yo yaritwaye inshuro imwe, mu 1990.

Umukino wa nyuma uzaba ku wa Gatanu w’icyumweru gitaha kuri Stade Mpuzamahanga ya Cairo mu gihe umwanya wa gatatu uzahatanirwa mbere y’iminsi ibiri kuri Stade du 30 Juin. Imikino yombi izajya itangira saa 21:00.

Ninde uhabwa amahirwe?

Sénégal ni yo ya mbere ihabwa amahirwe yo kwegukana iri rushanwa ku nshuro ya mbere, igakurikirwa na Algérie.

Algérie yagize ibihe byiza muri iri rushanwa, itsinda imikino itatu yo mu itsinda harimo n’uwo yatsinzemo Sénégal igitego 1-0.

Muri 1/8 yakomeje imaze kunyagira Guinée ibitego 3-0 mu gihe muri ¼ byayisabye kwitabaza penaliti kugira ngo isezerere Côte d’Ivoire ndetse ni yo kipe yageze muri ½ yaranayoboye itsinda ryayo.

Sénégal yabaye iya kabiri mu itsinda inyuma ya Algérie ndetse ihura na Uganda na Bénin muri 1/8 na ¼, zombi izitsinda igitego 1-0.

Nigeria yari inyuma ya Madagascar mu itsinda B nyuma yo gutsindwa n’iki gihugu kitabiriye irushanwa bwa mbere igitego 1-0, ariko yatsinze Cameroun na Afurika y’Epfo mu bindi byiciro byo gukuranamo.

Tunisie yazamutse mu itsinda E nta mukino itsinze uretse kunganya inshuro eshatu ndetse yakomeje imbere ya Ghana muri 1/8 habanje kwitabazwa penaliti mu gihe yanyagiye Madagascar ibitego 3-0 muri ¼.

Algerie na Nigeria zigiye guhura ku nshuro ya cyenda mu Gikombe cya Afurika ndetse zahuriye ku mukino wa nyuma inshuro ebyiri
Tunisie na Sénégal buri imwe yatsinze indi inshuro imwe muri eshanu zabahuje mu Gikombe cya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza