CAN 2019: Cameroun yanganyije na Ghana, RDC n’u Burundi birasabwa ibitangaza

Yanditswe na Eric Tony Ukurikiyimfura
Kuya 30 Kamena 2019 saa 07:36
Yasuwe :
0 0

Cameroun ifite Igikombe cya Afurika giheruka, yanganyije na Ghana ubusa ku busa mu mukino w’umunsi wa kabiri wabaye kuri uyu wa Gatandatu, amakipe yose yo mu itsinda F akomeza kugira icyizere cyo gukomeza muri 1/8.

Muri uyu mukino wabereye mu Mujyi wa Ismailia, amakipe yombi yagerageje gusatirana, ariko nta buryo bwinshi bugana mu izamu bwabonetse.

Kwabena Owusu yashoboraga guhesha Ghana amanota atatu nyuma y’umunota umwe asimbuye André Ayew, ariko ishoti rikomeye yateye ryakubise umutambiko w’izamu rijya hanze. Nyuma y’ubu buryo na Andrew Yiadom yateye umupira ukomeye ukurwamo n’umunyezamu André Onana.

Amakipe yombi yakabaye yagiye mu karuhuko Cameroun iri mbere n’igitego kimwe, ni nyuma y’uko Richard Ofori yarokowe na Jonathan Mensah wakoze akazi gakomeye akura umupira kuri Toko Ekambi ku munota wa 35.

Ku mupira watakajwe na Baba Rahman Badu, Karl Toko Ekambi yawifatiye maze awutanga kuri Christian Bassogog wateye ishoti rikomeye mu izamu, Oforo arirambura awukubita ibipfunsi ubwo haburaga iminota itanu ngo 45 ibanza irangire.

Ghana yari yakoze impinduka hakiri kare, ku munota wa 14, ubwo Christian Atsu wavunitse amaze gutera ishoti hanze, yasimburwaga na Samuel Owusu, yahushije kandi uburyo burimo ishoti rya Thomas Partey na Jordan Ayew mu gice cya mbere.

Umutoza wa Cameroun itaratsindwaho na Ghana mu Gikombe cya Afurika, Clarence Seedorf, yakoze impinduka zimufasha mu busatirizi, akuramo myugariro Gaetan Bong yinjiza Eric Choupo-Moting mu gihe ku ruhande rwa Ghana, Kwesi Appiah yakutemo Kwadwo Asamoah hakajyamo Asamoah Gyan.

Ghana yari ihagaze neza mu minota ya nyuma, ariko umukino warangiye nta kipe ibashije kureba mu izamu ry’iyindi.

Undi mukino wabaye muri iri tsinda, warangiye Bénin inganyije na Guinée Bissau ubusa ku busa bituma imikino isoza itsinda izaba ku wa Kabiri, izaba ifite kinini ivuze aho Cameroun izahura na Bénin mu gihe Ghana izahura na Guinée Bissau.

Cameroun iyoboye itsinda n’amanota ane, Ghana na Bénin ziranganya amanota abiri mu gihe Guinée Bissau ifite inota rimwe ku mwanya wa nyuma.

Umukino wo mu itsinda E wabaye kuri uyu wa Gatandatu, warangiye Mauritanie inganyije na Angola ubusa ku busa. Mali ifite amanota ane, Tunisia na Angola zikagira amanota abiri mu gihe Mauritanie ifite inota rimwe. Imikino isoza iri tsinda yo izaba ku wa Kabiri.

Kuri iki Cyumweru haratangira imikino isoza amatsinda mu rya A na B, ahategerejwe ibitangaza ku makipe ya Repubulika Iharanira na Demokarasi ya Congo n’u Burundi.

Mu itsinda A, Misiri ya mbere yanabonye itike ya 1/8, irakina na Uganda ya kabiri n’amanota ane mu gihe Zimbabwe ifite inota rimwe ikina na RDC ifite ubusa, aho isabwa gutsinda ibitego byinshi kugira ngo itegereze amahirwe yo kuzaboneka mu makipe ane muri atandatu ya gatatu yitwaye neza. Imikino yombi irakinirwa rimwe saa 21:00.

Mu itsinda B, Nigeria ya mbere n’amanota atandatu, yanabonye itike ya 1/8, irakina na Madagascar ifite amanota ane mu gihe Guinée ifite inota rimwe yisobanura n’u Burundi bwatsinzwe imikino ibiri bwakinnye ndetse nabwo busabwa bimwe na RDC ngo butegereze amahirwe ya 1/8. Iri tsinda ryo rirakina saa 17:00.

Kubera iki hazitabazwa amakipe yitwaye neza?

CAN 2019 ni yo ya mbere yitabiriwe n’amakipe 24 kuko ubusanzwe yari 16 yabaga agabanyijwe mu matsinda ane.

Uyu mwaka, amakipe yagabanyijwe mu matsinda atandatu. Mu makipe ane agize itsinda rimwe, abiri ya mbere ni yo azahita abona itike ya 1/8, bityo amakipe 12 arenge amatsinda.

Kugira ngo haboneke andi makipe ane atuma aba 16 yakina 1/8, hazitabazwa kureba amakipe ane yabaye aya gatatu, yitwaye neza kurusha ayandi mu matsinda yose uko ari atandatu.

Clinton Njie wa Cameroun atera umupira n'umutwe nyuma yo gusumba Yiadom wa Ghana wari kumwe na mugenzi we Jonathan Mensah
Kunganya kwa Cameroun na Ghana byatumye buri kipe yo mu itsinda F ikomeza kugira icyizere cyo kurenga amatsinda ikagera muri 1/8

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza