CAN 2019: Ba Adama Traoré babiri bafashije Mali kunyagira Mauritania, Tunisia inganya na Angola (Amafoto)

Yanditswe na Eric Tony Ukurikiyimfura
Kuya 25 Kamena 2019 saa 08:44
Yasuwe :
0 0

Ikipe y’igihugu ya Mali yatangiye neza mu gikombe cya Afurika gikomeje kubera mu Misiri, aho yanyagiye na Mauritanie ibitego 4-1 birimo bibiri byatsinzwe n’abakinnyi bitiranwa, ba Adama Traoré banasimburanye muri uyu mukon wo mu itsinda E wabereye mu Mujyi wa Suez.

Uburyo bwa mbere mu mukino bwabonetse ku munota wa gatanu, aho umunyezamu wa Mali Djigui Diarra atumvikanye neza na bagenzi be, byashoboraga kuvamo kwitsinda igitego, ariko umupira bawushyira muri koruneri.

Mauritanie iri gukina iki gikombe cya Afurika ku nshuro ya mbere, yatangiye umukino iri kugaragaza urwego rwiza, ariko isubira nyuma ubwo yari imaze gutsindwa igitego cya mbere cyabonetse ku munota wa 37 w’umukino gitsinzwe na Abdoulay Diaby ku ishoti rikomeye yatereye muri metero nka 25.

Nyuma y’iminota umunani, Mali yahawe penaliti ku ikosa Diallo yakoreye kuri Lassan Coulibaly mu rubuga rw’amahina, Moussa Marega atsinda igitego cya kabiri kuri iyi penaliti.

Igice cya kabiri cyatangiranye impinduka ku ruhande rwa Mauritanie, aho umutoza Corentin Martins yinjijemo Moulay Ahmad ‘Bessam’ kugira ngo ikipe ye igire amaraso mashya, ariko Mali ni yo yahise ibona igitego ku munota wa 55, gitsinzwe na Adam Traoré ‘Noss’ ukinira Monaco, ku mupira yahawe na Diadie Samasekou.

Mauritanie yabonaga ko nta kindi ikiramira uretse gushaka ibitego, yashoye abakinnyi bose imbere, ndetse yashoboraga gutsinda igitego ku munota wa 70 ubwo Adama Ba yacengaga umunyezamu Djigui Diarra, ariko Molla Wague arahagoboka, akuraho umupira mbere y’uko Ba atsinda.

Mauritanie yabonye igitego cy’amateka mu gikombe cya Afurika ku munota wa 72. Ismaël Diakité yakorewe ikosa mu rubuga rw’amahina, umusifuzi atanga penaliti yinjijwe neza na El Hacen El Id.

Ibyishimo by’abanya-Mauritanie ntibyamaze akanya kuko nyuma y’iminota ibiri yatsinzwe igitego cya kane, gitsinzwe na Adam Traoré usanzwe ukinira Metz, uyu akaba yinjiye ku munota wa 61 asimbura bazina we, Adama Traoré wa Monaco.

Undi mukino wabanje muri iri tsinda, warangiye Tunisie yanganyije na Angola igitego 1-1. Youssef Msakni yatsindiye Tunisie kuri penaliti yo ku munota wa 34, igitego cyishyuwe na Djalma ku munota wa 73.

Mauritanie izakina na Angola mu mukino wa kabiri wo mu itsinda E uzakinwa ku Gatandatu mu gihe Tunisie yo izaba yahuye na Mali ku wa Gatanu saa 16:30.

Ubwo Tunisie yafunguraga amazamu

Reba igitego cyo kwishyura ku ruhande rwa Angola

Umunyezamu Suleiman Brahim akorera ikosa kuri rutahizamu wa Mali, Moussa Marega
Rutahizamu wa Mali Moussa Doumbia ashaka uburyo atambuka kuri Bakary Ndiaye wa Mauritanie wajyanye ikirenge ngo amukureko umupira
Abdoulaye Diaby yishimira igitego cya mbere cyabonetse muri uyu mukino ku ruhande rwa Mali
Moussa Marega atsinda igitego cya kabiri cya Mali
Moussa Marega yishima igitego cya kabiri yatsindiye igihugu cye kuri penaliti
Adama Traore wa Monaco watsinze igitego cya gatatu
Adama Traore acenga Aly Abeid na Abdoul Ba ba Mauritania
Adama Traore wa Metz yinjiye mu kibuga asimbuye bazina we mu gice cya kabiri
Adama Traore wa Metz nyuma yo gutsinda igitego cya kane cya Mali
Abakinnyi ba Mali babyinnye bishimira gutangira neza mu gikombe cya Afurika kiri kubera mu Misiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza