CAN 2019: Amakuru avugwa mbere y’umukino wa nyuma uhuza Sénégal na Algérie

Yanditswe na Eric Tony Ukurikiyimfura
Kuya 19 Nyakanga 2019 saa 07:46
Yasuwe :
0 0

Kuri uyu wa Gatanu ni bwo hamenyekana igihugu cyegukana Igikombe cya Afurika cy’uyu mwaka kimaze ibyumweru bitatu gihatanirwa mu Misiri. Umukino wa nyuma urahuza Sénégal na Algérie guhera saa 21:00 kuri Stade Mpuzamahanga ya Cairo.

Ni ku nshuro ya mbere Algérie yageze ku mukino wa nyuma kuva yegukanye iri rushanwa mu 1990 ubwo yatsindaga Nigeria 1-0 mu gihe Sénégal iheruka gutsindirwa ku mukino wa nyuma wa 2002 na Cameroun kuri penaliti, itegerejweho kwegukana iri rushanwa ku nshuro ya mbere.

Umutoza wa Sénégal, Aliou Cissé ukina uyu mukino adafite myugariro ngenderwago Kalidou Koulibaly ufite amakarita abiri y’umuhondo, yavuze ko kugera ku mukino wa nyuma byari intego bihaye kuva ku munsi wa mbere ubwo yahabwaga ikipe mu myaka itanu ishize.

Ati” Nishimiye kuba ku mukino wa nyuma. Uyu ni umusaruro w’imyaka itanu yuzuye kuko kuva ku munsi wa mbere ubwo twahabwaga ikipe, intego yari ukugera ku mukino wa nyuma. Imyaka 17 yari ishize tuhageze, bamwe mu bakinnyi banjye bari bato, byaratugoye kongera kubigeraho, turashaka gushimisha abaturage bacu.”

Uyu mutoza yavuze ko kuba ikipe ye yaratsinzwe na Algérie 1-0 mu matsinda byarangiye ndetse bibaho mu mupira w’amaguru.

Krépin Diatta wavuze mu izina ry’abakinnyi ba Sénégal, na we yavuze ko intego bafite ari ugutanga ibishoboka byose bakegukana iki gikombe.

Djamel Belmadi utoza Algérie, yavuze ko intego ikipe ye ifite ari ukwegukana iri rushanwa kugira ngo ihe abaturage ibyishimo.

Ati” Turabizi uko iwacu bimeze ariko twishimira ko batubaye inyuma. Intego dufite ni ukwitwara neza kuri uyu mukino tugatwara igikombe kugira ngo dushimishe abaturage bacu. Umukino tuwiteguye nk’uko twabikoze ku yindi, nizeye ishyaka ry’abakinnyi banjye.”

Adlène Guédiora wari uhagarariye abakinnyi ba Algérie mu kiganiro n’abanyamakuru, yavuze ko mu byafashije ikipe yabo kwitwara neza ku isonga harimo guhuza nk’ikipe, ashimangira ko bashaka gutwara iri rushanwa baheruka akiri muto.

Ni ku nshuro ya gatanu amakipe atozwa n’abenegihugu ahuriye ku mukino wa nyuma

Mu nshuro 32 Igikombe cya Afurika kimaze kuba, iyi ni iya gatanu abatoza babiri bahuriye ku mukino wa nyuma buri umwe atoza igihugu avukamo.

Uko byagenda kose umutoza w’umwenegihugu ararara yegukanye iri rushanwa, yiyongere ku bandi 11 babikoze mu myaka yashize.

Izindi nshuro enye umukino wa nyuma wa CAN wahuriweho n’abatoza b’abenegihugu ni mu 1962, 1965, 1978 no mu 1998.

Abatoza 11 b’abenegihugu batwaye Igikombe cya Afurika ni: Mourad Fahmy (Misiri - 1959), Yidnekatchew Tessema (Ethiopie – 1962), Charles Gyamfi (Ghana – 1963, 1965 no mu 198), Adolphe Bibanzoulo (Congo – 1972), Fred Osam-Duodu (Ghana – 1978), Abdelhamid Kermali (Algérie – 1990), Yeo Martial (Côte d’Ivoire – 1992), Clive Barker (Afurika y’Epfo– 1996), Mahmoud El Gohary (Misiri – 1998), Hassan Shehata (Misiri – 2006, 2008 no mu 2010) na Stephen Keshi (Nigeria – 2013).

Sadio Mané vs Riyad Mahrez

Uyu mukino urahurirwamo n’abakinnyi bakomeye batandukanye, ariko abahanzwe amaso cyane ni Sadio Mané wa Sénégal na Liverpool ndetse na Riyad Mahrez wa Algérie na Manchester City.

Sadio Mané utarahiriwe n’iri rushanwa dore ko yahushije penaliti ebyiri, afite ibitego bitatu, aho asabwa gukora ibishoboka akanganya na Odion Ighalo wa Nigeria wasoje iri rushanwa afite ibitego bitanu.

Kwegukana iri rushanwa kuri uyu rutahizamu wa Sénégal na Liverpool yatwaye UEFA Champions League, biramwongerera amahirwe yo kuba umukandida mwiza mu guhatanira Ballon d’Or y’uyu mwaka.

Undi mukinnyi witezwe uyu munsi ni Adam Ounas wa Algérie na we umaze gutsinda ibitego bitatu muri iri rushanwa.

Umukino wahinduriwe umusifuzi

Umusifuzi w’umunya-Cameroun Alioum Alioum (cyangwa Alioum Néant) ni we wagiriwe icyizere cyo kuyobora uyu mukino wa nyuma.

Uyu mugabo w’imyaka 37 ni ku nshuro ya gatanu asifura muri CAN nyuma yo kwitabira amarushanwa ya 2012, 2013, 2015 na 2017.

Muri iri rushanwa riri kuba, yayoboye imikino ibiri irimo uwa mbere wahuje Misiri na Zimbabwe (1-0) n’uwo Côte d’Ivoire yatsinzwemo na Maroc igitego 1-0.

Ku wa Kabiri Impuzamashyirahamwe y’Umupira w’Amaguru muri Afurika, CAF, yari yatangaje ko uyu mukino uzayoborwa na Victor Gomes wo muri Afurika y’Epfo ariko byarangiye ahinduwe.

Abakinnyi bashobora kubanza mu kibuga ku mpande zombi:

Sénégal: Alfred Gomis, Salif Sané, Sabaly, Cheikou Kouyaté, Gassama, Saivet, Ndiaye, Ismaila Sarr, Gana Gueye, Sadio Mané, Niang.

Algérie: M’bolhi, Mandi, Zeffane, Benlamri, Bensebaini, Guédioura, Belaili, Bennacer, Feghouli, Mahrez, Bounedjah.

Riyad Mahrez na Sadio Mane ni bamwe mu bitezwe muri uyu mukino wa nyuma wa CAN 2019
Umunya-Cameroun Alioum Alioum ni we wahawe gusifura uyu mukino
Umutoza wa Sénégal Aliou Cissé ni we wahushije penaliti ubwo igihugu cye cyatsindwaga na Cameroun mu 2002
Djamel Belmadi utoza Algérie

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza