00:00:00 IGIHE NETWORK KN KINYARWANDA EN ENGLISH FR FRANCAIS

Tunisia yegukanye irushanwa rya AfroBasket ku nshuro ya kabiri yikurikiranya

Yanditswe na IGIHE
Kuya 5 Nzeri 2021 saa 11:33
Yasuwe :
0 0

Ikipe ya Tunisia ya Basketball yegukanye irushanwa nyafurika rizwi nka AfroBasket ryabereye mu Rwanda ihigitse Côte d’Ivoire biba inshuro ya kabiri yikurikiranya iyi kipe itwara iki gikombe.

Tunisia yegukanye iki gikombe nyuma yo gutsinda Côte d’Ivoire amanota 78 kuri 75. Ni mu mukino wabereye muri Kigali Arena ku mugoroba wo kuri iki Cyumweru tariki ya 5 Nzeri 2021 witabirwa n’abanyacyubahiro batandukanye barimo na Perezida w’u Rwanda, Paul Kagame.

Ikipe ya Tunisia yashyikirijwe iki gikombe cyahatanirwaga ku nshuro ya 30 na Minisitiri wa Siporo, Munyangaju Aurore Mimosa.

Tunisia yegukanye igikombe cyo mu 2017 yacyisubije nyuma gutsinda Côte d’Ivoire amanota 78 kuri 75 mu mukino wari ishiraniro.

Iyi kipe yo mu Barabu yihariye uduce tubiri tubanza aho yadutsinze ku manota 25 kuri 18 na 22 kuri 16 mu gihe Côte d’Ivoire yatsinze tubiri twa nyuma ku manota 25 kuri 18 na 16 kuri 13.

Muri uyu mukino, Umunya-Tunisia Salah Mejri wanyuze muri Dallas Mavericks [2015-19] ikina muri Shampiyona ya Basketball muri Amerika [NBA] ni we witwaye neza aho yatsinze amanota menshi 22 mu gihe Souleyman Diabate wa Côte d’Ivoire yatsinze 20.

Tunisia yisubije iki Gikombe cya Afurika nyuma yo kwegukana igiheruka cyabereye mu 2017, yabaye ikipe ya mbere ibikoze nyuma ya Angola yagitwaye inshuro esheshatu hagati ya 1999 na 2009.

Muri rusange, Tunisia yegukanye igihembo cya gatatu muri Basketball mu myaka 10 (2011, 2017 na 2021).

Umukino wa nyuma wa Afro Basket wabaye nyuma y’uwo Sénégal yahuyemo na Cap Vert, ikanawutsinda ku manota 86 kuri 73, biyihesha kuba ikipe ya gatatu. Sénégal yisubije umwanya wa gatatu kuko no mu irushanwa riheruka mu 2017 yabigezeho itsinze Maroc amanota 73 kuri 62.

Mu bakinnyi bahembwe harimo Makram Ben Romdhane (Tunisia) watowe nk’umukinnyi mwiza w’irushanwa (MVP); Gorgui Dieng (Sénégal) yahawe igihembo cy’uwatsinze amanota menshi (120); Walter Tavares (Cap Vert) yahawe igihembo cy’uwarushije abandi gufata imipira itageze mu nkangara (Best Rebounder) aho yafashe imipira 80 mu gihe Carlos Morais (Angola) yabaye uwarushije abandi gutsinda amanota atatu aho yayatsinze inshuro 19.

Muri iri rushanwa hanatowe ikipe nziza igizwe na Makram Ben Romdhane (Tunisia), Omar Abada (Tunisia), Matt Costello (Côte d’Ivoire), Gorgui Dieng(Sénégal) na Walter Tavares (Cap Vert).

Mu gusoza Afro Basket 2021, Ishyirahamwe ry’Umukino wa Basketball muri Afurika “FIBA-Afrique” ryagenewe ishimwe, Liz Mills ukomoka muri Australia akaba Umutoza Mukuru wa Kenya ni we mugore rukumbi watoje ikipe y’abagabo muri Afurika. Abandi bagenewe ishimwe ni Stéphane Konaté (Côte d’Ivoire) na Radhouane Slimane bafite imyaka 41.

Côte d'Ivoire yagerageje kwigaranzura Tunisia mu minota ya nyuma ariko ntibyayihira. Umukino warangiye itsinzwe amanota 78 kuri 75
Tunisia yegukanye irushanwa rya AfroBasket ku nshuro ya kabiri yikurikiranya
Byari ibihe by'ibyishimo nyuma yo gushyikirizwa igikombe
Uhereye ibumoso: Radhouane Slimane (Tunisia), Umunya-Australia, Liz Mills utoza Kenya na Stéphane Konaté (Côte d’Ivoire) bahawe amashimwe
Perezida Kagame ari mu banyacyubahiro barebye umukino wa nyuma wa AfroBasket. Aha yari kumwe na Perezida wa FERWABA, Mugwiza Désiré
Tunisia yongeye kwandika amateka muri Basketball ya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .