00:00:00 IGIHE NETWORK KN KINYARWANDA EN ENGLISH FR FRANCAIS

Tunisia ifite igikombe giheruka yatangiye neza muri Afrobasket 2021 (Amafoto)

Yanditswe na Eric Tony Ukurikiyimfura
Kuya 24 Kanama 2021 saa 01:10
Yasuwe :
0 0

Ibifashijwemo na Salah Mejri wigeze gukinira Dallas Mavericks muri NBA, ikipe y’Igihugu ya Tunisia ifite igikombe giheruka, yatangiye neza muri Afrobasket 2021 iri kubera muri Kigali Arena, itsinda Guinea amanota 82-46 mu mukino wa mbere wo mu itsinda B.

Kuri uyu wa Kabiri, tariki ya 24 Kanama 2021, ni bwo hatangiye Igikombe cya Afurika cy’abagabo muri Basketball “AFROBASKET 2021” kiri kuba ku nshuro ya 30.

Umukino wabimburiye iyindi muri Kigali Arena, wahuje Tunisia ifite igikombe giheruka na Guinea, ibihugu byombi biri mu Itsinda B hamwe Misiri ndetse na Centrafrique.

Tunisia yiganjemo abakinnyi bageranye na US Monastir ku mukino wa nyuma wa Basketball Africa League (BAL) muri Gicurasi, yatsinze agace ka mbere ku manota 17-09 mu gihe aka kabiri karangiye harimo ikinyuranyo cy’amanota 21 (41-20).

Salah Mejri wigeze gukinira Dallas Mavericks yo muri NBA, kuri ubu akaba nta kipe afite, yatsinze amanota 17 muri uyu mukino Tunisia yatsinzemo 82-46 arimo 21-14 mu gace ka gatatu na 20-12 mu gace ka gatatu.

Michael Roll wa Tunisia yatsinze 14, mugenzi we Omar Abada atsinda 10 mu gihe umukinnyi wa Guinea watsinze amanota menshi ari Ibrahiman Doumbouya winjije atandatu.

Undi mukino wo muri iri tsinda rya kabiri ugiye guhuza Misiri na Centrafrique guhera saa Saba n’igice.

Kuri uyu munsi wa mbere w’irushanwa, hateganyijwe kandi imikino ibiri yo mu itsinda A, aho u Rwanda rukina na Repubulika Iharanira Demokarasi ya Congo saa Kumi n’ebyiri mu gihe Angola ikina na Cap-Vert saa Tatu z’ijoro.

Abakinnyi ba Guinea bifotozanya n'abatoza babo
Ikipe y'Igihugu ya Tunisia yifotoza mbere y'umukino
Achref Gannouni wa Tunisia atwara umupira Daouda Didson Conde wa Guinea
Kapiteni wa Tunisia Makram Ben Romdhane agerageza gutsinda mu gihe Tidjan Keita yashakaga gukuraho umupira
Makram Ben Romdhane ahanganye na Cheikh Sekou Conde
Umunya-Tunisia Salah Mejri w'imyaka 35 yigeze gukinira Dallas Mavericks muri NBA na Real Madrid yo muri Espagne
Salah Mejri yatsinze amanota 17 muri uyu mukino
Tidjan Keita wa Guinea yatsinze amanota atanu muri uyu mukino
Tunisia na Guinea byabimburiye ibindi bihugu 16 byitabiriye Afrobasket 2021
Umutoza wa Tunisia Dirk Bauemann atanga amabwiriza ku bakinnyi be mu karuhuko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .