Toronto Raptors yihimuye kuri Milwaukee Bucks muri Playoffs za NBA

Yanditswe na Eric Tony Ukurikiyimfura
Kuya 22 Gicurasi 2019 saa 12:07
Yasuwe :
0 0

Imikino ya nyuma ya Shampiyona ya Basketball muri Amerika, NBA, igeze ahakomeye mu gace k’Uburasirazuba, aho Toronto Raptors yatsinze Milwaukee Bucks amanota 120-102 mu mukino wabaye mu ijoro ryo kuri uyu wa Kabiri, banganya imikino 2-2.

Toronto Raptors yatsinze uyu mukino wa Kane hagati y’amakipe yombi, ibifashijwemo na Kyle Lowry w’imyaka 33, wayitsindiye amanota 25, harimo 18 yo mu duce tubiri tubanza.

Milwaukee Bucks yatsinzwe agace ka mbere ku manota 32-31 ndetse n’aka kabiri kuri 33-24. Iyi kipe yagoye Toronto Raptors mu duce tubiri twa nyuma, igabanya ikinyuranyo cy’amanota 19 yarimo mu gace ka gatatu, ariko na two idutakaza ku manota 29-26 na 26-21.

Khris Middleton wa Milwaukee Bucks ni we watsinze amanota menshi muri uyu mukino, aho yakoze agera kuri 30, asama imipira itandatu iva ku nkangara mu gihe yanatanze imipira irindwi yavuyemo andi manota kuri bagenzi be.

Ni ku nshuro ya kabiri muri uyu mwaka w’imikino Milwaukee Bucks itsinzwe imikino ibiri yikurikiranya.

Umukino wa gatanu hagati ya Milwaukee Bucks na Toronto Raptors uzabera kwa Milwaukee mu ijoro ryo ku wa Kane, aho ikipe izatanga indi gutsinda imikino ine, izahura na Golden State Warriors mu mikino ya nyuma.

Golden State Warriors yegukanye igikombe mu gace k’uburengerazuba nyuma yo gutsinda Portland Trail Blazers imikino 4-0, iserukira agace iherereyemo ku nshuro ya gatanu yikurikiranya.

Toronto Raptors yishyuye Milwaukee Bucks yari yatsinze imikino ibiri ibanza
Kyle Lowry wa Toronto Raptors agerageza gucenga Pat Connaughton wa Milwaukee Bucks
Umukino wa gatanu hagati y'amakipe yombi uzakinwa kuri uyu wa Kane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza