00:00:00 IGIHE NETWORK KN KINYARWANDA EN ENGLISH FR FRANCAIS

REG yatsinze Patriots BBC mu mukino wa mbere w’iya nyuma ya Play-offs (Amafoto)

Yanditswe na Eric Tony Ukurikiyimfura
Kuya 30 Ukwakira 2021 saa 01:15
Yasuwe :
0 0

REG BBC yatsinze Patriots BBC amanota 66-63 mu mukino wa mbere w’iya nyuma ya Play-offs yatangiye gukinwa kuri uyu wa Gatanu, isigara isabwa gutsinda ku wa Gatandatu kugira ngo yegukane igikombe cya Shampiyona iheruka mu 2017.

Amakipe yombi yongeye guhurira ku mikino isoza Shampiyona ya Basketball iterwa inkunga na Banki ya Kigali Plc mu gihe mu mwaka ushize byasabye ko akiranurwa n’umukino wa karindwi.

Muri uyu mukino wabereye imbere y’abafana batari bake muri Kigali Arena, agace ka mbere karangiye REG BBC iri imbere n’amanota 25-18 ibifashijwemo n’abarimo Kaje Elie watsinze amanota arindwi.

Umukinnyi mwiza w’umwaka ushize w’imikino, Ndayisaba Ndizeye Dieudonné, ni we wari uhagaze neza muri iyi minota 10 ibanza, aho yinjije amanota icyenda.

Mu gace ka kabiri, REG yigeze gushyiramo ikinyuranyo cy’amanota icyenda ubugira kabiri, ariko Hagumintwari Steve atsinda amanota atatu yatumye hasigaramo ikinyuranyo cy’abiri mu minota ibiri ya nyuma. Shyaka Olivier yahise atsindira REG andi abiri, amakipe yombi ajya kuruhuka harimo ane (33-29).

Habura iminota itanu n’amasegonda 40 ngo agace ka gatatu karangire, REG yongeye gusubizamo ikinyuranyo cy’amanota icyenda mu gihe Shyaka Olivier yatsinze atatu hakajyamo 11 (49-38) mu minota ine ya nyuma.

Amasegonda 90 ya nyuma yafashije Patriots yayabonyemo amanota 10 mu gihe REG yayatsinzemo abiri, amakipe yombi yinjira mu minota 10 ya nyuma hasigayemo atatu (51-48).

Habura iminota itatu n’amasegonda 40, Kenneth Gasana yatsinze amanota atatu yatumye hasigaramo rimwe, ariko Shyaka na Kaje Elie batsinda atandatu.

Ni Bush Wamukota watsinze amanota abiri yatumye amakipe yombi anganya 63-63 mu masegonda 33 ya nyuma, ariko Shyaka Olivier atsinda izindi lancer franc ebyiri zakoze ikinyuranyo (65-63) hasigaye amasegonda 16.

Shyaka Olivier watsinze amanota menshi, 30, yatsinze lancer franc imwe muri ebyiri yahawe mu masegonda 10 ya nyuma, umukino urangira harimo ikinyuranyo cy’amanota atatu (66-63).

Umukino wabanje, wahuje amakipe y’abagore, REG itsinda The Hoops Rwanda amanota 74-47.

REG WBBC yahoze yitwa Ubumwe WBBC, yatsinze agace ka mbere ku manota 16-12 n’aka kabiri kuri 17-11, amakipe yombi ajya kuruhuka harimo ikinyuranyo cy’amanota 10.

The Hoops yagerageje kwihagararaho mu gace ka gatatu, igatsindwa ku kinyuranyo cy’amanota ane (17-13) ariko mu gace ka nyuma irushwa 13 (24-11).

Akon Rose Paul Macuei wa REG WBBC yatsinze amanota 20 muri uyu mukino, mugenzi we Jovithe Kabarere yanganyije 16 na Micomyiza Rosine wa The Hoops Rwanda.

Imikino ya kabiri izakinwa ku wa Gatandatu saa Kumi n’igice mu bagore na saa Moya mu bagabo.

Mu gihe amakipe ya REG yakongera gutsinda, azahita yegukana Shampiyona mu gihe natsindwa hazitabazwa umukino wa gatatu uzaba ku Cyumweru, tariki ya 31 Ukwakira 2021.

Abakinnyi n'abatoza ba REG BBC bifotoza mbere y'umukino
Ifoto y'abakinnyi n'abatoza ba Patriots BBC
Adonis Jovon Filet afite umupira hagati y'abakinnyi ba Patriots BBC
Adonis atwaye umupira ubwo yari asatiriwe na Nijimbere Guibert
Kaje Elie ashyira umupira mu nkangara
Bush Wamukota asama umupira ubwo yari asatiriwe na Post Keanau Dennis
Kenneth Gasana agerageza gutsindira kure
Beleck Bell atwara umupira nyuma yo gucika Hagumintwari Steve
Shyaka Olivier agerageza gutsinda amanota
Nshobozwabyosenumukiza Jean Jacques Wilson agerageza amanota atatu ubwo yari asatiriwe na Sagamba Sedar
Henry Mwinuka wagiye muri REG BBC amaze guhesha Patriots BBC ibikombe bibiri, atanga amabwiriza kuri Nshobozwabyosenumukiza
Post Keanau Dennis nta nota yatsinze mu minota isaga 11 yakinnye
Ndizeye Ndayisaba Dieudonné afite umupira ubwo yashakaga uko atambuka kuri Kami Kabange
Nijimbere Guibert ntiyorohewe n'uyu mukino yatsinzemo amanota atatu
Ndizeye asama umupira ubwo yari asatiriwe na Kaje Elie
Mugabe Aristide atwara umupira Niyonkuru Pascal 'Kaceka'
Wamukota Bush agerageza gutsinda nyuma yo gusumba Shyaka Olivier
Sagamba Sedar acika Nshobozwabyosenumukiza ubwo yari kumwe na Niyonsaba Bienvenu
Ogolla Benson utoza Patriots BBC
Abafana ba REG BBC bari bisize amarangi
Umukino warangiye abafana ba REG BBC ari bo bamwenyuye

Amafoto: Shema Innocent


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .