00:00:00 IGIHE NETWORK KN KINYARWANDA EN ENGLISH FR FRANCAIS

REG y’Abagore yahize kwegukana irushanwa rya Zone V muri Tanzania

Yanditswe na Eric Tony Ukurikiyimfura
Kuya 18 Ugushyingo 2021 saa 07:25
Yasuwe :
0 0

Ikipe ya REG y’Abagore iheruka kwegukana Shampiyona ya Basketball mu Rwanda, irerekeza muri Tanzania ifite intego yo kwegukana irushanwa rya “FIBA Africa Zone V Club Championships” rizabera i Dar es Salaam, aho rizitabirwa n’amakipe umunani yo mu Karere ka Gatanu hagati ya tariki ya 18 n’iya 24 Ugushyingo 2021.

REG WBBC ihaguruka i Kigali saa Saba z’ijoro rishyira ku wa Kane, tariki ya 18 Ugushyingo 2021, ni imwe mu makipe umunani azakina iri rushanwa ry’Akarere ka Gatanu, kimwe na The Hoops yo mu Rwanda, yo yamaze kugera muri Tanzania.

Mu kiganiro n’abanyamakuru cyabaye ku wa Gatatu, tariki ya 17 Ugushyingo 2021, Umuyobozi w’Ikipe y’Abagore ya REG, Twizeyimana Albert Baudouin, yavuze ko intego bajyanye muri Tanzania ari ukwegukana irushanwa bazitabira.

Ati “Ntabwo tugiye i Dar es Salaam gutembera, tugiye tujyanye intego yo gutwara igikombe kandi birashoboka dukurikije uko ikipe yacu imeze, twongeyemo imbaraga zihagije, turebye amakipe tuzaba turi kumwe.”

“Imyiteguro tuyimazemo ibyumweru bibiri kuko tukimara gutwara igikombe twari tuzi ko tuzakina iyi mikino, abakinnyi bose twari kumwe.”

Yakomeje avuga ko impamvu batiriye Mugwaneza Charlotte usanzwe ukinira APR, Tetero Odile usanzwe ukinira IPRC Huye na Kiyobe Chantal ukina muri Kenya ari ukugira ngo bongere imbaraga muri iyi kipe yatwaye Shampiyona ya 2021 mu gihe yasobanuye ko impamvu badafite Tierra Monay Henderson bamaze kumvikana, ari uko hari imikino agifite mu ikipe asanzwemo muri Puerto Rico.

Umuyobozi wa Siporo muri Sosiyete y’Igihugu ishinzwe Ingufu (REG), Zawadi Geoffrey, yavuze ko impamvu ikipe igiye kugenda itinze ari uko habaye ikibazo cy’amatike y’indege.

Ati “Ikipe izagera muri Tanzania ejo saa Sita n’iminota 25 nyuma yo kunyura i Addis Ababa. Habayemo gukererwa kubera kubura indege igererayo igihe, abantu bose bagendeye hamwe.”

Yakomeje avuga ko ibyo bitazababuza gukora cyane ku buryo bagera ku ntego biyemeje kuko bagiye guharanira ishema ry’igihugu.

Ati “Abakinnyi barabizi ko atari ukwitabira gusa, ahubwo ari uguhatanira kubona itike y’irushanwa rizakurikiraho. Ntabwo ari REG igiye, ahubwo tugiye duhagarariye igihugu, tugiye guharanira ishema ryacyo, buri Munyarwanda wese aba afite iyo nshingano.”

Amakipe yose azitabira iri rushanwa rigiye kubera muri Tanzania ni REG, The Hoops (Rwanda), KPA, Kenya Equity Bank (Kenya), Gladiator (Burundi), Wolkite (Ethiopia), JKT na Don Bosco (Tanzania).

Ubwo iri rushanwa ryaherukaga kuba mu 2019, ryegukanywe na JKL Dolphins yo muri Uganda mu gihe APR BBC yatsindiwe na KPA muri ½.

Abakinnyi REG W BBC ijyana ni: Kamana Aisha Issa (c), Utamuliza Marie Chantal, Kantore Sandra, Rehema Shaban, Kabarere Jovite, Byukusenge Gloriose, Izerimana Diane, Umugwaneza Charlotte, Tetero Odile, Kiyobe Chantal, Muganza Nyota Mireille na Macuei Akon Rose Paul.

Staff igizwe na: Mukaneza Espérance, Bahige Jacques, Akimana Florence, Uwamahoro Césarie, Nshimiyimana Jean Claude, Ndayishimiye Bienvenue, Zawadi Geoffrey, Twizeyimana Albert Baudouin, Mpamo Thierry na Shema Nshuti Didier.

REG W BBC yatwaye Igikombe cya Shampiyona ya Basketball ni imwe mu makipe abiri agiye guhagararira u Rwanda muri Zone V
Umuyobozi w’Ikipe y’Abagore ya REG, Twizeyimana Albert Baudouin, yavuze ko batagiye muri Tanzania gutembera ahubwo bagiye gutwara igikombe
Umuyobozi wa siporo muri REG, Zawadi Geoffrey, yavuze ko bagiye guharanira ishema ry'Igihugu
Ikipe ya REG y'Abagore yakoresheje ikiganiro n'abanyamakuru mbere yo kwitabira irushanwa rya Zone V muri Tanzania

Amafoto: Shema Innocent


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .