00:00:00 IGIHE NETWORK KN KINYARWANDA EN ENGLISH FR FRANCAIS

REG BBC yegukanye Igikombe cya Shampiyona, ibona itike ya BAL 2022 (Amafoto)

Yanditswe na Eric Tony Ukurikiyimfura
Kuya 31 Ukwakira 2021 saa 01:00
Yasuwe :
0 0

REG BBC ni yo izahagararira u Rwanda mu irushanwa rya Basketball Africa League 2022 nyuma y’uko yegukanye Igikombe cya Shampiyona ya Basketball kuri uyu wa Gatandatu, itsinze mukeba Patriots BBC amanota 64-49 mu mukino wa kabiri wa play-offs wabereye muri Kigali Arena.

Amakipe yombi yahuye kuri uyu wa Gatandatu nyuma y’umunsi umwe ahuriye mu mukino wa mbere na wo wari watsinzwe na REG BBC ku wa Gatanu.

Patriots BBC yitwaye neza mu gace ka mbere, igatsindamo amanota 14-11 mu gihe aka kabiri karangiye REG BBC iri imbere n’ikinyuranyo cy’inota rimwe (27-28).

Mu gace ka gatatu, Adonis Filer na Shyaka Olivier bagize uruhare mu gufasha REG gushyiramo ikinyuranyo cy’amanota 10 (38-48) mu gihe umukino warangiye harimo 15 (49-64).

Gutsinda uyu mukino byatumye REG BBC igeza intsinzi 2-0 zari zikenewe mu mikino itatu ishoboka kugira ngo ikipe ihite yegukana igikombe.

Iyi kipe y’Ikigo cy’Igihugu gishinzwe ingufu ni yo izahagararira u Rwanda mu irushanwa rya Basketball Africa League rizaba ku nshuro ya kabiri mu mwaka utaha wa 2022.

REG BBC yaherukaga igikombe cy’iyi Shampiyona iterwa inkunga na Banki ya Kigali Plc mu 2017 mu gihe Patriots BBC yatwaye bitatu byaherukaga gukinirwa.

Abakinnyi bitwaye neza bashimiwe

Umukinnyi mwiza wa Shampiyona (MVP) yabaye Shyaka Olivier wa REG BBC naho abagize ikipe y’umwaka ni Adonis Filer (REG), Belleck Bell (REG), Ndizeye Ndayisaba Dieudonné (Patriots), Shyaka Olivier (REG) na Wamukota Bush (Patriots).

Umukinnyi wazamuye urwego kurusha abandi ni Romain Murenzi Kizito wa UGB, uwahize abandi mu kugarira yabaye Kamndoh Betoudje Frank wa Shoot For Stars. Mbanze Brian wa RP IPRC Huye ni we watsinze amanota menshi naho Ndizeye Dieudonné aba uwahize abandi mu gutsinda amanota atatu.

Umutoza w’umwaka yabaye Mwinuka Henry wa REG BBC naho Umusifuzi w’umwaka yabaye Ruhumuriza Jean Sauveur.

The Hoops na REG WBBC zirisobanura mu mukino wa gatatu

Mu bagore, REG WBBC yari yatsinze umukino wa mbere ku wa Gatanu, yananiwe gutsinda uwa kabiri ku wa Gatandatu.

The Hoops Rwanda ifite igikombe giheruka, byayisabye amasegonda atatu ya nyuma kugira ngo itsinde REG WBBC amanota 46-44, byatumye hazitabazwa umukino wa gatatu ku Cyumweru, tariki ya 31 Ukwakira 2021 saa Kumi n’ebyiri.

Abakinnyi n'abatoza ba REG BBC bifotoza mbere y'umukino
Ifoto y'abakinnyi n'abatoza ba Patriots BBC
Ndizeye Ndayisaba Dieudonné ntiyahiriwe n'uyu mukino yatsinzemo amanota arindwi
Kenneth Gasana watsinze amanota 16, atwaye umupira
Henry Mwinuka yitegura kwinjiza Nshobozwabyosenumukiza mu kibuga
Kenneth Gasana n'abatoza ba Patriots BBC bishimira amanota iyi kipe yari imaze gutsinda mu gace ka mbere
Bush Wamukota atsinda amanota nyuma yo gusumba abakinnyi ba REG BBC
Nshobozwabyosenumukiza Jean Jacques Wilson agerageza gucika Sagamba Sedar
Adonis Filer ahanganiye umupira na Kenneth Gasana
Beleck Bell atwaye umupira muri uyu mukino yatsinzemo amanota 11
Abafana bari bitabiriye muri Kigali Arena
Byageze aho abatoza ba Patriots BBC babura ibisubizo
Shyaka Olivier yongeye kwigaragaza muri uyu mukino yatsinzemo amanota 22
Byari ibyishimo ku bakinnyi ba REG BBC barimo Shyaka Olivier ubwo umukino wari urangiye
Mwinuka yashyizwe mu birere nyuma yo guhesha REG BBC igikombe yaherukaga mu myaka ine ishize
Henry Mwinuka wagiye muri REG BBC amaze guhesha Patriots BBC ibikombe bibiri, ashyikiriza igihembo cy'Umutoza w'umwaka
Wamukota (ibumoso), Shyaka, Ndizeye, Bekeck na Adonis (iburyo) ni bo bakinnyi bitwaye neza muri Shampiyona yasojwe
Ndizeye Ndayisaba Dieudonné yahembwe nk'umukinnyi wahize abandi mu gutsinda amanota atatu
Shyaka Olivier yahembwe nk'Umukinnyi mwiza w'umwaka w'imikino wa 2020/21
Patriots BBC yahawe miliyoni 1,5 Frw nyuma yo kuba iya kabiri
Perezida wa FERWABA, Mugwiza Désiré, ashyikiriza REG BBC sheki ya miliyoni 2 Frw
Abakinnyi ba REG BBC bishimira igikombe bashyikirijwe na Minisitiri wa Siporo, Munyangaju Aurore Mimosa
REG BBC izahagararira u Rwanda muri BAL 2022

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .