Patriots yakosoye REG BBC mu mukino wa mbere wa Playoffs Finals (Amafoto)

Yanditswe na Eric Tony Ukurikiyimfura
Kuya 9 Kanama 2019 saa 11:52
Yasuwe :
0 0

Patriots BBC yitwaye neza mu mukino wa mbere muri irindwi ishobora kuyihuza na REG BBC muri Playoffs 2019 zigamije gushaka ikipe izatwara shampiyona y’Abagabo uyu mwaka, itsinda amanota 67-58.

Uyu mukino wabereye muri Kigali Arena yafunguwe ku mugaragaro na Perezida Kagame kuri uyu wa Gatanu, aho wakurikiye uwahuje The Hoops na APR WBBC.

Imbere y’abatari bake bari muri iyi nzu y’imikino ifite ubushobozi bwo kwakira abantu ibihumbi 10 bicaye neza, REG BBC yagaragaje imbaraga nkeya uyu munsi bitandukanye n’uko yari isanzwe ikina.

Agace ka mbere k’umukino karangiye Patriots BBC irusha REG BBC inota rimwe (18-19) mu gihe mu ntangiriro z’aka kabiri, Ruzigande Ally na Ndizeye Dieudonné bombi batsinze amanota abiri yatumye hajyamo ikinyuranyo cy’amanota atanu.

Patriots BBC ibifashijwemo na Ruzigande, yashyizemo ikinyuranyo cy’amanota 10 ubwo haburaga umunota umwe n’amasegonda 53 ngo agace ka kabiri karangire, ariko ntacyo REG BBC yigeze ihinduraho kuko amakipe yombi yagiye kuruhuka ari 29-39.

REG BBC y’umutoza Ngwijuruvugo Richard Patrick yasaga n’aho ntacyo yiteguye gukosora, maze yongerwa andi manota arindwi y’ikinyuranyo mu gace ka gatatu (39-56).

Mu minota itatu ya nyuma y’umukino, umutoza Henry Mwinuke utoza Patriots BBC wari wamaze kwizera gutsinda umukino, yakuyemo Makiadi Ongea Michael na Hagumintwari Steve, yinjizamo Bukuru Joseph na Hakizimana Lionel.

REG BBC yarushwaga amanota 14 muri iyi minota, ibifashijwemo na Kami Kabange na Nshobozwabyosenumukiza Jean Jacques Wilson, yagabanyije ikinyuranyo, umukino urangira irushwa amanota icyenda (58-67).

Ndizeye Dieudonné wa Patriots BBC yatsinze amanota 18 muri uyu mukino mu gihe Kami Kabange wa REG BBC we yatsinzemo amanota 14.

Umukino wa kabiri uzakinwa tariki ya 30 Kanama 2019 muri Petit Stade, aho Patriots BBC ariyo izakira REG BBC mu gihe mu bagore, APR WBBC izaba icakirana na The Hoops.

Ikipe izatanga indi gutsinda imikino ine ni yo izagukana shampiyona y’uyu mwaka haba mu bagabo cyangwa mu bagore.

Abitabiriye ifungurwa rya Kigali Arena basusurukijwe binyuze mu myidagaduro itandukanye
Ku nshuro ya mbere Kigali Arena yakiriye imikino yabimburiwe na Baskteball
Patriots BBC yaje yiteguye uyu mukino wa mbere
REG BBC na yo yari yiteguye guhangana
Amakipe yombi yatangiye guhanganira Igikombe kizegukanwa n'izatsinda imikino ine muri irindwi ishoboka
Abakunzi ba Basketball bari bambaye imyenda ya Banki ya Kigali bari baje ku bwinshi
Umukino uhuza Patriots na REG BBC aba ari ishiraniro
Umutoza wa Patriots BBC, Henry Mwinuke, atanga amabwiza ku bakinnyi be
Ruhamiriza Jean Sauveur, Ikirezi Samuel na Shema Nshuti Didier ni bo bayoboye uyu mukino
Nkurunziza Walter nyuma yo gutambuka kuri Hagumintwari Steven mu gihe Kaje Elie (wambaye 13) yashakiraga inzira mugenzi we
Kubwimana Kazingufu Ally adunda umupira ubwo ikipe ye yasatiraga Patriots BBC
Nkurunziza Walter wa REG BBC ashyira umupira mu nkangara
Hagumintwari Steven ashaka uko arenza umupira Nkurunziza Chris Walter wa REG BBC
Hagumintwari Steven ashaka uko arenza umupira Nkurunziza Chris Walter wa REG BBC
Kami Kabange atsindana amanota Kasongo Junior wa Patriots BBC

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza