NBA: Golden State Warriors yegukanye igikombe isuzuguye LeBron James na bagenzi be

Yanditswe na Manzi Rema Jules
Kuya 9 Kamena 2018 saa 07:41
Yasuwe :
0 0

Golden State Warriors yegukanye igikombe cya shampiyona muri Amerika itsinze Cleveland Cavaliers ya LeBron James imikino ine ku busa, isubiramo amateka yaherukaga mu myaka 11 ishize.

Shampiyona ya mbere ikunzwe ku Isi muri basketball yasojwe mu rukerera rwo kuri uyu wa Gatandatu tariki 9 Kamena 2018, Golden State Warriors itsinda Cleveland Cavaliers ku manota 108 kuri 85 ihita yegukana igikombe.

Muri uyu mukino, Cleveland Cavaliers yari mu rugo imbere y’abafana basuzuguwe bikomeye kuko itigeze ibasha gutsinda n’agace kamwe; aka mbere ikaba yagatsinzwe ku manota 34-25, aka kabiri karangira zinganya 27-27, aka gatatu igatsindwa 25-13 naho aka kane igatsindwa 22 kuri 20.

Stephen Curry wazonze Cavaliers muri iyi mikino ya nyuma yongeye kwigaragaza, atsinda amanota 37 wenyine; mugenzi we Kevin Durant atsinda 20 naho Andre Iguodala atsinda 11 mu gihe ku ruhande rwa Cavaliers, LeBron James nk’ibisanzwe ariwe watsinze menshi, yinjije 20 akurikiwe na Kevin Love winjije 13.

Warriors yegukanye igikombe itsinze imikino ine yose ikurikirana, bikaba byaherukaga kubaho muri iyi shampiyona mu 2007 nabwo bikorewe kuri Cavaliers yatsinzwe imikino ine ku busa na San Antonio Spurs.

Kibaye igikombe cya gatandatu Golden State Warriors yegukanye mu mateka yayo, habariwemo n’ibyo yatwaye yitwa Philadelphia cyangwa San Francisco, ikaba ari iya gatatu ifite byinshi muri shampiyona nyuma ya Boston Celtics ifite 17 na Los Angeles Lakers yahoze yitwa Minneapolis, ifite 16.

Kevin Durant nyuma yo kwigaragaza cyane mu muikino ya nyuma, niwe watowe nk’umukinnyi mwiza muri yo “Finals MVP” kikaba ari igihembo yegukanye inshuro ebyiri zikurikirana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza