00:00:00 IGIHE NETWORK KN KINYARWANDA EN ENGLISH FR FRANCAIS

Musanze na Kicukiro zatangiye neza muri Shampiyona ya Wheelchair Basketball

Yanditswe na Eric Tony Ukurikiyimfura
Kuya 8 Ugushyingo 2021 saa 03:10
Yasuwe :
0 0

Ikipe ya Musanze mu bagabo n’iya Kicukiro mu bagore, zatangiye neza muri Shampiyona ya Wheelchair Basketball ikinwa n’abafite ubumuga bicaye mu tugare, yatangiye ku Cyumweru, tariki ya 7 Ugushyingo 2021.

Iyi Shampiyona ya 2021/22 yitabiriwe n’amakipe atatu mu bagabo ari yo Bugesera, Musanze na Gasabo mu gihe mu bagore hari amakipe abiri ari yo Gasabo na Kicukiro.

Ku Cyumweru, tariki ya 7 Ugushyingo 2021, hakinwe igice cya mbere muri bine bizaba bigize iyi Shampiyona ya Basketball ikinwa n’abafite ubumuga bari mu tugare.

Umukino wabimburiye iyindi mu nzu y’imikino ya NPC i Remera ni uwahuje amakipe y’abagore, aho Kicukiro yatsinze Gasabo amanota 14-6.

Mu bagabo, ikipe ya Musanze yabanje gutsinda Gasabo amanota 29-14 mbere y’uko itsinda Bugesera amanota 27-19 mu wundi mukino wakurikiyeho.

Umukino wa gatatu wabaye muri iki cyiciro cy’abagabo ni uwo Bugesera yatsinzemo Gasabo amanota 25-20.

Biteganyijwe ko igice cya kabiri cy’iyi shampiyona kizakinwa tariki ya 22 Mutarama 2022.

Ikipe izagira amanota menshi kurusha ayandi nyuma y’ibice bine bizakinwa ni yo izegukana igikombe.

Wheelchair Basketball ni umukino umeze nka Basketball isanzwe, aho ukinwa n’abakinnyi batanu kuri buri ruhande, ariko itandukaniro rikaba ko wo ukinwa n’abafite ubumuga bicaye mu tugare.

Kicukiro (yambaye umukara) yatsinze Gasabo mu bagore
Abakinnyi ba Kicukiro bishimira intsinzi babonye ku munsi wa mbere wa Shamiyona ya Wheelchair
Mu bagabo, Musanze yatsinze Gasabo mbere yo gukurikizaho Bugesera
Ikipe ya Musanze yongeye kwerekana ko ishobora gutwara Shampiyona y'uyu mwaka w'imikino
Ikipe ya Gasabo ikina n'iya Bugesera mu bagabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .