00:00:00 IGIHE NETWORK KN KINYARWANDA EN ENGLISH FR FRANCAIS

Milwaukee Bucks yageze bwa mbere ku mikino ya nyuma ya NBA mu myaka 47 (Amafoto)

Yanditswe na Eric Tony Ukurikiyimfura
Kuya 4 Nyakanga 2021 saa 08:34
Yasuwe :
0 0

Nubwo yari idafite Giannis Antetokounmpo wabaye umukinnyi w’umwaka (MVP) wa 2020, Milwaukee Bucks yageze ku mikino ya nyuma ya NBA bwa mbere kuva mu 1974, ni nyuma y’uko yatsinze Atlanta Hawks amanota 118-107 mu mukino wabaye mu rukerera rwo kuri iki Cyumweru, iyisezerera ku mikino 4-2.

Amakipe yombi yari ahanganiye kuvamo imwe izahagarira Agace k’Iburengerezauba ku mikino ya nyuma ya Shampiyona ya Basketball muri Amerika ‘NBA’.

Khris Middleton yatsinze amanota 32 muri uyu mukino, arimo 16 yinjije mu nkangara yikurikiranya, afasha ikipe ye gutsinda uyu mukino wa gatandatu.

Milwaukee yatsinze agace ka mbere ku manota 28-24, mu ka kabiri amakipe yombi anganya amanota 19-19. Ikinyuranyo kigaragara cyabaye mu gace ka gatatu katsinzwe na Milwaukee ku manota 44-29 mu gihe agace ka nyuma katsinzwe na Atlanta Hawks kuri 35-27.

Gutsinda uyu mukino byatumye Milwaukee Bucks ikomeza ku mikino ya nyuma ya NBA itsinze Atlanta Hawks imikino 4-2 mu gace k’Iburasirazuba.

Iyi kipe yakinnye imikino ibiri iheruka idafite kabuhariwe Giannis Antetokounmpo wavunitse, izahura na Phoenix Suns ku mikino ya nyuma izatangira ku wa Kabiri hakinwa uwa mbere.

Phoenix ni yo yabaye iya mbere mu Burengerazuba ubwo yasezereraga LA Clippers iyitsinze imikino 4-2.

Umutoza wa Milwaukee, Mike Budenholzer, yashimiye abakinnyi be uko bitwaye, avuga ko kugera ku mikino ya nyuma babiharaniye umwaka wose.

Ati “Birashimishije. Aba basore babikoreye umwaka wose. Sinzi uko nasobanura uburyo ntewe ishema na bo. Nkunda kubatoza. Turacyafite akazi kenshi ko gukora.”

Mu myaka 47 yari ishize itagera ku mikino ya nyuma ya NBA, Milwaukee yasezerewe na Philadelphia mu 1983 na 2001, Boston mu 1984 na 1986. Nubwo yaherukaga kuba iya mbere mu Burasirazuba mu 1971 na 1974, igikombe cya NBA yatwaye ni icyo mu myaka 50 ishize ubwo yari imaze imyaka itatu gusa ishinzwe.

John Collins wa Atlanta Hawks ashaka uburyo ashyira umupira mu nkangara ubwo yari asatiriwe n'abarimo Jrue Holiday na Pat Connaughton ba Milwaukee
Trae Young wa Atlanta yubitse umutwe mu gihe Brook Lopez na Jrue Holiday bishimiraga amanota batsinze
Jeff Teague yishimira amanota yari amaze gutsindira Milwaukee Bucks
Giannis Antetokounmpo ntiyakinnye uyu mukino wa gatandatu kubera imvune afite mu ivi
Clint Capela atanguranwa umupira wari uvuye ku kangara hamwe na Tucker na Khris Middleton ba Milwaukee
Brook Lopez yitegura gutera umupira mu nkangara ubwo yari asatiriwe na Oneka Okongwu wa Atlanta Hawks
Abafana ba Atlanta Hawks bari bitabiriye umukino ku bwinshi
Bobby Portis atsinda lancer franc ku ruhande rwa Milwaukee Bucks nyuma y'ikosa yari akorewe
Brook Lopez na Bobby Portis bahoberana ubwo umukino wari urangiye
Giannis Antetokounmpo yishimira na bagenzi be igikombe cyo mu Gace k'Iburasirazuba begukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .