LeBron James yerekeje muri LA Lakers aho azinjiza asaga miliyari 134 Frw

Yanditswe na Manzi Rema Jules
Kuya 2 Nyakanga 2018 saa 01:43
Yasuwe :
1 0

LeBron James ufatwa nk’umukinnyi wa mbere muri Shampiyona ya Basketball muri Leta Zunze Ubumwe za Amerika (NBA), yongeye gutandukana na Cleveland Cavaliers yerekeza mu Burengerezuba mu ikipe ya Los Angeles Lakers aho yahawe umushahara wa miliyoni 154 z’amadolari ya Amerika mu myaka ine.

Los Angeles Lakers, ikipe ya kabiri mu mateka ya NBA ifite ibikombe byinshi, 16 inyuma ya Boston Celtics ifite 17, yamaze kugura LeBron James wari wasoje amasezerano muri Cleveland Cavaliers akanga kuyigumamo nyuma yo gutsindirwa ku mukino wa nyuma na Golden State Warriors inshuro ebyiri zikurikirana (2017 na 2018).

Kugira ngo uyu mukinnyi yemere gusinya amasezerano y’imyaka ine muri Los Angeles Lakers yemerewe akayabo ka miliyoni 154 z’amadorali ya Amerika nk’umushahara muri icyo gihe (asaga miliyali 134 Frw).

LeBron James w’imyaka 33 yatangiye gukina muri NBA ubwo yatoranywaga na Cleveland Cavaliers yo mu Mujyi wa Ohio avukamo mu 2003 binyuze muri NBA draft, aba umwe mu bakinnyi bakomeye cyane mu 2009, ahabwa igihembo cya MVP acyisubiza mu 2010, uwo mwaka ahita ayivamo ajya gukinira Miami Heat atanzweho miliyoni 110 z’amadolari ya Amerika.

Iyi kipe yayihesheje shampiyona ebyiri, 2012 na 2013 aba ari nawe utorwa nka MVP iyo myaka yombi. Mu 2014 yafashe icyemezo cyo gusubira gukinira ikipe y’iwabo, Cleveland Cavaliers ayifasha kugera ku mukino wa nyuma mu 2015 ariko itsindwa na Golden State Warriors imikino 4-2.

Mu 2016 LeBron James yanditse amateka afasha Cleveland Cavaliers kwihimura kuri Golden State Warriors n’ubundi zahuriye ku mukino wa nyuma, yegukana igikombe yari imaze imyaka 52 itazi uko gisa.

Uyu mukinnyi kuri ubu ufatwa nk’uwa mbere ku Isi muri Basketball, yongeye gufasha ikipe ye kugera ku mukino wa nyuma mu 2017 itsindwa na Golden State Warriors na 2018 ku kazi gakomeye ka LeBron James iyi kipe yongera kuhagera ariko n’ubundi itsindwa na Golden State Warriors ari nabwo yafashe icyemezo cyo kutongeramo amasezerano.

Los Angeles Lakers agiye gukinira mu myaka ine iri imbere na yo ni ikipe y’ubukombe yagiye igira n’abakinnyi bakomeye barimo umunyabigwi Kobe Bryant ariko ikaba iheruka kwegukana igikombe cya shampiyona mu 2010.

LeBron James w'imyaka 33 yerekeje muri Los Angeles Lakers
LeBron James yavuye muri Cleveland Cavaliers nyuma yo gutsindirwa ku mukino wa nyuma wa NBA inshuro ebyiri zikurikirana
LeBron James wakiniraga Cleveland Cavaliers nyuma yo gutakaza umukino wa kane muri NBA wahuje ikipe ye na Golden State Warriors mu 2018
Lebron James yerekeje muri LA Lakers aho azinjiza asaga miliyari 134 Frw mu myaka ine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza