LeBron James yanditse amateka mashya muri NBA ubwo LA Lakers yatsindaga Oklahoma City Thunder

Yanditswe na Eric Tony Ukurikiyimfura
Kuya 20 Ugushyingo 2019 saa 02:33
Yasuwe :
0 0

LeBron James yabaye umukinnyi wa mbere mu mateka ya Shampiyona ya Basketball muri Amerika ‘NBA’ ubashije gutsinda amanota, gusama imipira iva ku nkangara no gutanga indi ivamo amanota kuri bagenzi be, byose biri hejuru ya 10 mu mukino umwe, akabikora kuri buri kipe ikina muri iyi Shampiyona.

Uyu mukinnyi w’imyaka 34 yabikoze mu mukino ikipe ye ya Los Angeles Lakers yatsinzemo Oklahoma City Thunder amanota 112-107 kuri uyu wa Gatatu.

James yatsinzemo amanota 25, asama imipira 11 iva ku nkangara mu gihe kandi yatanze imipira 10 yavuyemo andi manota kuri bagenzi be.

Uyu wabaye umukino wa 86 abashije gutsindamo amanota, gusama imipira iva ku nkangara no gutanga indi ivamo amanota kuri bagenzi be, byose biri hejuru ya 10 (triple-double).

LeBron James yavuze ko yishimiye kuba abashije gushyiraho aka gahigo, ashimira abo bakinannye n’abatoza bamutoje.

Ati” Mu by’ukuri nanjye ntabwo mbiyumvisha, ariko ni imibare myiza kandi biranshimishije ko bibaye. Bagenzi banjye barakoze cyane, abatoza baramfashije kugira ngo mbashe kubigeraho. Ndizera ko muri ibi ngezeho harimo n’agahigo ko gutsinda imikino myinshi kuko ni cyo cy’ingenzi.”

Russell Westbrook wa Houston Rockets ni we ugwa mu ntege LeBron James, aho we amaze gutsinda amanota, gusama imipira no gutanga imipira ivamo amanota ari hejuru ya 10 kuri bagenzi be mu mukino umwe, ku makipe 29 muri 30 akina iyi Shampiyona.

Gutsinda uyu mukino byafashije LA Lakers gufata umwanya wa mbere mu gace k’Iburengerazuba, aho imaze gutsinda imikino 12, igatsindwa ibiri.

Golden State Warriors yugarijwe n’imvune uyu mwaka nyuma y’uko mu mwaka ushize w’imikino itakaje igikombe itsinzwe na Toronto Raptors, yashyize iherezo ku mikino irindwi yari imaze itsindwa, itsinda Mpemphis Grizzlies amanota 114-95.

Ibi byatumye yuzuza intsinzi eshatu n’imikino 12 imaze gutakaza uyu mwaka, aho iri ku mwanya wa nyuma muri aka gace k’Iburengerazuba.

Reba uko LeBron James yitwaye muri uyu mukino yakoreyemo amateka

LeBron James yabaye umukinnyi wa mbere utsinze Triple-double ku makipe yose (30) akina muri NBA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza