LeBron James yageze ku gahigo ka Kobe Bryant, umukino wa Orlando Magic na Hornets usiga amateka mashya muri NBA

Yanditswe na Eric Tony Ukurikiyimfura
Kuya 26 Mutarama 2021 saa 06:47
Yasuwe :
0 0

LeBron James yabaye umukinnyi ukuze wa Los Angeles Lakers watsinze amanota 40 mu mukino umwe kuva bikozwe na Kobe Bryant ubwo yasezerega mu 2016.

James w’imyaka 36, yabigezeho ubwo yatsindaga amanota 46 mu mukino LA Lakers yatsinzemo Cleveland Cavaliers amanota 115-108 kuri uyu wa Kabiri.

Kobe Bryant wakiniye Lakers imyaka 20, yatsinze amanota 60 mu mukino we wa nyuma yakinnye muri NBA ku wa 13 Mata 2016, ikipe ye ihura na Utah Jazz.

LeBron James yabigezeho kandi ku itariki Kobe Bryant yapfiriyeho, ku wa 26 Mutarama 2020, azize impanuka ya kajugujugu yahitanye abantu icyenda barimo n’umukobwa we w’imyaka 13, Gianna Bryant.

Aya manota ni aya kabiri menshi LeBron yatsinze akinira Lakers mu gihe ari yo menshi yatsinze ikipe yigeze gukinira muri NBA.

Yiyongeraho kandi imipira umunani yasamye ivuye ku nkangara, itandatu yatanze kuri bagenzi be ikavamo andi manota, ibiri yambuye n’indi ibiri yahagaritse.

LeBron James wakiniye Cleveland Cavaliers inshuro ebyiri mbere yo kujya muri Lakers mu 2018, yatsinze amanota 13 mu minota ine n’amasegonda 41 ya nyuma.

Ibi byafashije Lakers kwitwara neza no kubona intsinzi ya 10 mu mikino 10 yakiniye hanze uyu mwaka mu gihe izahura na Philadelphia 76ers ku wa Kane.

Anthony Davis yatsinze amanota 17, asama imipira 10 ivuye ku nkangara ku ruhande rwa Lakers mu gihe Montrezl Harrell yatsinze amanota 15 asimbuye.

Ku ruhande rwa Cavaliers, Andre Drummond yatsinze amanota 25, asama imipira 17 ivuye ku nkangara mu gihe Cedi Osman yatsinze amanota 20 naho Collin Sexton atsinda 17.

Mu yindi mikino yabaye, Orlando Magic yabonye intsinzi ya kabiri mu mikino 10 iheruka, aho yatsinze Charlotte Hornets amanota 117-108 mu mukino wa mbere w’umwaka usanzwe w’imikino wagaragayemo abasifuzi babiri b’abagore mu mateka ya NBA.

Natalie Sago na Jenna Schroeder, bari mu basifuzi barindwi b’abagore basifura muri NBA muri uyu mwaka w’imikino, bakoranye na Sean Wright muri uyu mukino wabereye muri Florida.

Indiana Pacers yatsinze Toronto Raptors amanota 129-114, Golden State Warriors inyagira Minnesta Timberwolves amanota 130-108 mu gihe Detroit Pistons yari imaze imikino ine idatsinda, yihereranye Philadelphia 76ers ikayitsinda amanota 119-104.

Oklahoma City Thunder yatsinze Portland Trail Blazers amanota 125-122, Brooklyn Nets itsinda Miami Heat 98-85, Denver Nuggets itsinda Dallas Mavericks 117-113 mu gihe Boston Celtics yatsinze Chicago Bulls amanota 119-103.

LeBron James yatsinze amanota 46, aba umukinnyi wa mbere ukuze ukinira Lakers ubashije kugeza ku manota 40 kuva bikozwe na Kobe Bryant mu 2016
Kobe Bryant yatsinze amanota 60 mu mukino wa nyuma yakiniyemo LA Lakers mu 2016
Kentavious Caldwell-Pope ahanganye na Jarrett Allen wa Cavaliers mu mukino wabaye kuri uyu wa Kabiri
JaVale McGee azibira Antony Davis wa LA Lakers
Natalie Sago na Jenna Schroeder babaye abagore babiri ba mbere basifuye umukino wa NBA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .