Kevin Durant agiye kuva muri Golden State Warriors

Yanditswe na Eric Tony Ukurikiyimfura
Kuya 2 Nyakanga 2019 saa 11:55
Yasuwe :
0 0

Kevin Durant wafashije Golden State Warriors kwegukana ibikombe bibiri bya shampiyona ya Baksetball muri Amerika, NBA, yatangaje ko agiye kwerekeza muri Brooklyn Nets, aho bivugwa ko ashobora guhabwa miliyoni $164 ku masezerano y’imyaka ine.

Uyu musore ukina imbere w’imyaka 30, yafashije Golden State Warriors gutwara NBA mu 2017 na 2018 ndetse atorwa nk’uwahize abandi mu mikino ya nyuma muri izi nshuro ebyiri.

Sosiyete akorana na yo ya The Boardroom yatangaje ko uyu mukinnyi agiye kwerekeza muri Brooklyn Nets mu ntangiriro z’uku kwezi.

Kevin Durant yongeye kuvunikira mu mukino wa gatanu Golden State Warriors yahuyemo na Toronto Raptors hakinwa imikino ya nyuma ya NBA, hari nyuma yo kumara ukwezi kurenga na bwo yaravunitse ndetse ashobora kumara umwaka wose w’imikino wa 2019/20 adakinnye.

Kevin Durant yageze muri Warriors avuye muri Oklahoma City Thunder mu 2016, aho yatsinze impuzandengo y’amanota 25.8, asama imipira 7.2, ari na ko atanga indi 5.4 kuri bagenzi be mu gihe cy’imyaka itatu yari amaze muri Oakland.

Brooklyn Nets yatsinze imikino 42 muri 82 yakinnye, ntiyashoboye kurenga ijonjora ribanza mu gace k’Uburasirazuba mu gushaka itike yo gukina imikino ya nyuma ya NBA’

Iyi kipe yabashije kwegukana Durant ihigitse Warriors yifuzaga kumugumana mu myaka itanu, imuhaye miliyoni $221. Andi makipe yamwifuzaga ni New York Knicks na Los Angeles Clippers.

Umwe mu bayobozi ba Golden State Warriors, Joe Lacob, yavuze ko mu gihe azaba akiri muri iyi kipe nta we uzongera kwambara nimero 35 yambarwaga na Kevin Durant.

Kevin Durant yatangaje ko agiye kwerekeza muri Brooklyn Nets

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza