00:00:00 IGIHE NETWORK KN KINYARWANDA EN ENGLISH FR FRANCAIS

J. Cole uheruka mu Rwanda yanyuzwe n’uburyo yarwakiriwemo

Yanditswe na Habimana Sadi
Kuya 28 Gicurasi 2021 saa 08:47
Yasuwe :
0 0

Umuraperi wo muri Leta Zunze Ubumwe za Amerika, Jermaine Lamarr Cole, uherutse mu Rwanda ubwo yakiniraga ikipe ya Patriots BBC, yashimiye Abanyarwanda kubera urugwiro bamwakiranye mu gihe gito yahamaze.

Ni nyuma y’iminsi itatu gusa Jermaine Lamarr Cole asubiye iwabo muri Leta Zunze Ubumwe za Amerika, nyuma yo gukinira ikipe ya Patriots BBC imikino itatu yo mu matsinda.

Uyu muraperi abicishije ku rukuta rwe rwa Instagram, yagaragaje ko hari byinshi ashimira abanyarwanda, cyane cyane bagenzi be bakinanye muri Patriots BBC.

Ni ubutumwa yatanze mu ijoro ryo ku wa Kane tariki ya 27 Gicurasi 2021, ubwo ikipe ya Patriots BBC yari imaze kubona itike ya ½ mu mikino ya BAL iri kubera mu Rwanda.

Ati “Ndashimira BAL na Patriots BBC ku mahirwe bampaye. Ndashimira bagenzi banjye, abatoza ndetse n’abagize Staff yose muri rusange uburyo bamfashe nko mu muryango. Nize byinshi mu byumweru bike twamaranye. Muryoherwe n’intsinzi y’iri joro kandi amahirwe masa ku mukino utaha.”

Uyu muraperi kandi yanashimiye uruganda rumwambika rwa PUMA, cyane ko yanazaniye inkweto zarwo abakinnyi ba Patriots BBC.

Ati “Ndashimira PUMA k’ubwo kunshyigikira kuva ku munsi wa mbere kugeza ngeze mu Rwanda amahoro nzanywe n’indege yihariye ya PUMA.”

Yakomeje ashimira abanyarwanda muri rusange n’uburyo yakiriwe mu Mujyi wa Kigali n’abantu beza yahabonye.

Ati “Ndashimira nanone uburyo nakiriwe mu Rwanda n’uburyo twakiriwe mu Mujyi wa Kigali. Imihanda myiza, abantu beza. Ndashimira buri umwe.”

Mbere yo gusubira muri Leta Zunze Ubumwe za Amerika, Jermaine Lamarr Cole yakiriwe na Perezida Paul Kagame ubundi afata urugendo.

J. Cole yashimiye cyane bagenzi be bakinanye muri Patriots BBC n'abatoza bamutoje muri iyi kipe
J. Cole yakiniye Patriots BBC imikino itatu mbere yo gusubira muri Leta Zunze Ubumwe za Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .