00:00:00 IGIHE NETWORK KN KINYARWANDA EN ENGLISH FR FRANCAIS

Imibare y’ingenzi muri BAL 2021 iri gukinirwa i Kigali

Yanditswe na Eric Tony Ukurikiyimfura
Kuya 17 Gicurasi 2021 saa 06:24
Yasuwe :
0 0

Ku nshuro yaryo ya mbere, irushanwa rya Basketball Africa League (BAL 2021) riterwa inkunga na Shampiyona ya Basketball muri Amerika (NBA), riri kubera muri Kigali Arena kuva tariki 15 kugeza ku ya 30 Gicurasi 2021.

Iri rushanwa ryitabiriwe n’amakipe 12, aho buri imwe igizwe n’abakinnyi 13 barimo umwe udashyirwa ku rupapuro rw’umukino.

Umukino waryo wa mbere wabaye ku Cyumweru, warangiye Patriots BBC yo mu Rwanda itsinze Rivers Hoopers yo muri Nigeria amanota 83-60.

Imibare yihariye muri iri rushanwa:

1- Ni ku nshuro ya mbere ku bufatanye na NBA na FIBA, Shampiyona ya NBA itegura irushanwa hanze ya Amerika y’Amajyaruguru.

1- Ben Uzoh uri gukinira Rivers Hoopers yo muri Nigeria, ni we mukinnyi wa mbere wakinnye muri NBA wagaragaye muri BAL. Yakiniye New Jersey Nets, Cleveland Cavaliers na Toronto Raptors hagati ya 2010-12. Yakinnye kandi Imikino Olempike ya 2016 ari kumwe na Nigeria, Igikombe cy’Isi cya Basketball mu 2019 na FIBA AfroBasket mu 2013 na 2015.

3 - Abakinnyi batsinze amanota atatu bahabwa ibiti bitatu n’Ikigo New Fortress Energy Inc. (NFE) kigamije kubungabunga ibidukikije. Batatu mu basifuzi 22 bazasifura iyi mikino ni abagore.

8- Ibitangazamakuru umunani biri kwerekana iri rushanwa rya BAL mu bice byose by’Isi: Canal+, ESPN, beIN SPORTS, NBA TV, Tencent Video, TSN, American Forces Network (AFN) na Voice of America (VOA). Iyi mikino kandi yerekanwa kuri application ya NBA, urubuga rwa internet rwa NBA (NBA.com) n’urwa BAL (theBAL.com).

9- BAL iri gukorana n’abafatanyabikorwa icyenda bakomeye mu kumenyekanisha iri rushanwa barimo: Agence France Development (AFD), Flutterwave, Hennessy, Jordan Brand, New Fortress Energy (NFE), NIKE, Rwanda Development Board (RDB), Social Nation Africa (SNA) na Wilson.

9- Abakinnyi icyenda banyuze muri NBA G League bazagaragara muri BAL iri kuba ku nshuro ya mbere. Abo ni Brandon Jay Costner na Prince Ibeh (Rwanda, Patriots BBC); Myck Kabongo na Demarcus Holland (Mozambique, Ferroviàrio de Maputo), Ibrahima Thomas (Mali, AS Police); Uzoh, Taren Sullivan na Robert Christopher Daniels (Rivers Hoopers); na Ater Majok (Tunisia, US Monastir).

12 – Ku nshuro ya mbere, irushanwa rya BAL ryitabiriwe n’amakipe 12 yo mu bihugu 12 bitandukanye: Algeria, Angola, Cameroun, Misiri, Madagascar, Mali, Maroc, Mozambique, Nigeria, Rwanda, Sénégal na Tunisia.

20 – Abakinnyi 20 banyuze muri gahunda ya Basketball itagira umupaka (BWB) muri Afurika, bitabiriye BAL ndetse barimo umwe wavuye muri Académie ya NBA muri Afurika (Mohab Yasser Abdelaty Abdallatif wa Zamalek yo mu Misiri).

21- Muri iri rushanwa harimo abakinnyi 21 bakinnye muri U.S. NCAA Division I, aho amakipe 11 muri 12 ari gukina BAL, afite byibuze umwe mu bakinnye icyo cyiciro.

22 – Irushanwa rya BAL riri kuba ku nshuro ya mbere, rizayoborwa n’abasifuzi 22 bakomeye muri Afurika. Muri bo 19 muri bo ni abagabo n’abandi batatu b’abagore, bose baturutse mu bihugu 16, aho batoranyijwe hagendewe ku mikino basifuye n’amashusho ku bufatanye bwa NBA, FIBA na FIBA Afrique.

26- Muri uyu mwaka, hazakinwa imikino 26. Amakipe 12 yitabiriye iri rushanwa yagabanyijwe mu matsinda atatu y’amakipe ane. Umunani ya mbere mu matsinda azakomeza mu cyiciro cyo gukuranamo hakinwa umukino umwe kugeza ku wa nyuma.

154- Abakinnyi 154 ni bo bitabiriye irushanwa ry’uyu mwaka, baturutse mu bihugu 24 bitandukanye byo muri Afurika, u Burayi, Asia na Leta Zunze Ubumwe za Amerika.

215- Iri rushanwa rya mbere rya BAL rizagera ku bafana bo mu bihugu 215 mu ndimi 15.

7,621- Ibibuga bibiri biri gukoreshwa muri BAL byagenze ibilometero 7,621 kuva muri Dollar Bay- Michigan kugera i Kigali mu Rwanda.

23,724 Umubare w’ibilometero byakozwe n’amakipe 11 kugira ngo agere i Kigali.

36,975 Buri kibuga mu byazanwe muri BAL, kigizwe n’uduce 255, kigapima hafi toni 16.7 (36,975 lbs.).

Prince Ibeh wa Patriots BBC ni umwe mu bakinnyi banyuze muri NBA G League/ Ifoto: NBAE /Getty images

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .