00:00:00 IGIHE NETWORK KN KINYARWANDA EN ENGLISH FR FRANCAIS

Imbere y’abafana, REG na Patriots BBC zatsinze imikino ya mbere ya ½ cya Play-offs

Yanditswe na Eric Tony Ukurikiyimfura
Kuya 17 Ukwakira 2021 saa 08:13
Yasuwe :
0 0

Amakipe ya REG na Patriots BBC mu bagabo, yiyongereye amahirwe yo kurenga ½ cya Play-offs za Shampiyona iterwa inkunga na Banki ya Kigali Plc nyuma y’uko yatsinze imikino ya mbere ku wa Gatandatu ndetse ashobora kugera ku mukino wa nyuma naramuka yitwaye neza kuri iki Cyumweru.

Ku wa Gatandatu, tariki ya 16 Ukwakira 2021, ni bwo hatangiye gukinwa imikino ya ½ cya Play-offs muri Shampiyona ya Basketball, yitabiriwe n’abafana muri Kigali Arena.

Mu mukino wabanje mu bagabo, Patriots BBC ifite igikombe giheruka yitwaye neza itsinda APR BBC amanota 71-56 na ho REG BBC itsinda IPRC Kigali amanota 73-65.

Mu bagore, The Hoops ifite igikombe giheruka, yatsinze APR WBBC amanota 59-52 mu gihe IPRC Huye yatsinzwe na REG WBBC amanota 70-42.

Kuri iki Cyumweru ni bwo aya makipe yose akina umukino wa kabiri ushobora gutanga ikipe zigera ku mukino wa nyuma dore ko muri iki cyiciro cya ½, hatanguranwa intsinzi ebyiri mu mikino itatu.

Mu bagabo, IPRC Kigali irakina na REG BBC saa Cyenda naho APR BBC ikine na Patriots BBC guhera saa Moya z’umugoroba.

Mu bagore, REG WBBC irakina na IPRC Huye guhera saa Saba naho APR WBBC ikine na The Hoops guhera saa Kumi n’imwe z’umugoroba.

Mu gihe buri kipe yatsinda umukino umwe, tariki 22 Ukwakira 2021 ni bwo hazaba umukino wa gatatu uzatanga igera ku mukino wa nyuma.

FERWABA yemereye abafana kwitabira iyi mikino. Gusa, abemerewe kuyitabira ni abipimishije COVID-19 nibura mu masaha 48 mbere y’umukino ndetse bakaba baranahawe urukingo rwa COVID-19 nibura doze imwe.

Ibiciro byo kwinjira muri Kigali Arena ni ibihumbi 10 Frw, 7000 Frw na 5000 Frw, yose akubiyemo igiciro cyo kwipimishiriza COVID-19 kuri Stade Amahoro. Amatike agurirwa kuri https://ticqet.rw/#/.

Adonis Filer ni umwe mu bitwaye neza ubw REG BBC yatsindaga IPRC Kigali ku wa Gatandatu
Abakinnyi ba REG WBBC bishimira intsinzi babonye kuri IPRC Huye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .