00:00:00 IGIHE NETWORK KN KINYARWANDA EN ENGLISH FR FRANCAIS

Ikipe ya Shyaka yatsinze iya Ndizeye Dieudonné mu mukino wa ’BK All-Star’ (Amafoto)

Yanditswe na Eric Tony Ukurikiyimfura
Kuya 20 Ugushyingo 2021 saa 08:48
Yasuwe :
0 0

Ikipe ya Shyaka Olivier ni yo yegukanye intsinzi mu mukino w’intoranywa wa "BK All-Star Game" wabaye kuri uyu wa Gatandatu muri Kigali Arena, aho yatsinze iya Ndizeye Ndayisaba Dieudonné amanota 77-73 bisabye kwitabaza iminota itanu y’inyongera.

Kuri iyi nshuro, Ishyirahamwe Nyarwanda ry’Umukino wa Basketball (FERWABA) ryongeye gutegura umukino wahuje abakinnyi b’intoranywa 24 bavuye muri Shampiyona ya 2021.

Ikipe yari igizwe na Shyaka Olivier yatsinze agace ka mbere ku manota 29-13 y’Ikipe ya Ndizeye Ndayisaba Dieudonné mu gihe agace ka kabiri karanzwe no kugaruka mu mukino kwa Ndizeye na bagenzi be batsinzemo amanota 24-15.

Wamukota Bush wari mu Ikipe ya Shyaka yagize uruhare mu kuyifasha gutsinda agace ka gatatu ku manota 15-11, byatumye amakipe yombi yinjira mu minota 10 ya nyuma harimo ikinyuranyo cy’amanota icyenda (49-58).

Habura amasegonda 14 ngo umukino utangire ni bwo Ndizeye Dieudonné yatsinze amanota atatu yatumye amakipe yombi anganya 68-68, hongerwaho iminota itanu yarangiye Ikipe ya Shyaka itsinze 77-73.

Wamukota Bush yatowe nk’umukinnyi w’umukino nyuma yo gutsinda amanota 18 akanasama imipira 13 iva ku nkangara ndetse yahembwe ibihumbi 500 Frw.

Kaje Elie wo mu Ikipe ya Ndizeye yatsinze amanota 20 muri uyu mukino mu gihe Shyaka Olivier wabaye Umukinnyi mwiza wa Shampiyona ya 2021, yatsinze 19.

Nkundwa Thierry ni we wahize abandi mu irushanwa rya ’slum dunk’ naho Ndizeye Ndayisaba Dieudonné ahiga abandi mu gutsinda amanota atatu. Buri umwe yahembwe ibihumbi 500 Frw.

Ikipe ya Shyaka Olivier yatsinze "BK All-Star Game 2021" yahembwe miliyoni 1 Frw, igihembo yatanzemo ubufasha kuri Rwampungu Meschack wahoze akina Basketball, ariko kuri ubu akaba akina Wheelchair Basketball nyuma yo gukora impanuka mu 2015 ubwo yakiniraga KBC.

Rwampungu yahawe kandi miliyoni 2 Frw n’Ishyirahamwe Nyarwanda ry’Umukino wa Basketball mu rwego rwo kumushyigikira uburyo atacitse intege nyuma yo gukora impanuka yamushegeshe none ubu akaba agendera mu kagare.

Ikipe ya Ndizeye yatozwaga na Henry Mwinuka, yari igizwe na: Ndizeye Dieudonné (Patriots BBC), Nijimbere Guibert (Patriots BBC), Kaje Elie (REG BBC), Niyonkuru Pascal (REG BBC), Nyamwasa Bruno (RP- IPRC Kigali), Bello Nkanira (RP- IPRC Kigali), Espoir Aganze (UGB), Muhizi Prince (REG BBC), Mutabaruka Victoire (RP-IPRC Kigali), Mugabe Aristide (Patriots BBC), Frank Kamndoh Betoudji (Shoot 4 Stars) na Nkundwa Thierry (APR BBC).

Ikipe ya Shyaka yatojwe na Benson Oluoch, yari igizwe na: Shyaka Olivier (REG BBC), Nshobozwabyosenumukiza Jean Jacques Wilson (REG BBC), Bush Wamukota (Patriots BBC), Belleck Bell (REG BBC), Sangwe Armel (APR BBC), Fortunat Mwanawabene ( 30 Plus), Sagamba Sedar (Patriots BBC), Mbanze Brian (RP- IPRC Huye), Muhayumukiza Eric ( RP- IPRC Kigali), Nijimbere Bénit (RP –IPRC Kigali), Niyonsaba Bienvenue (Patriots BBC) na Kubwimana Ally Kazingufu (APR BBC).

Uyu mukino urakurikirwa n’igitaramo cyatumiwemo umuhanzi Rema wo muri Nigeria n’Abanyarwanda barimo BullDogg, Kivumbi na Social Mulla.

Ikipe ya Ndizeye Ndayisaba Dieudonné yifotoza mbere y'umukino
Ikipe ya Shyaka Olivier yifotoza
Rwampungu Meschack yarebye uyu mukino yicaranye na Hagumintwari Steve usanzwe ukinira Patriots BBC
Shyaka Olivier aganira na Sangwe Armel (3), Sagamba Cédric (5) n'a Mbanze Brian
Nijimbere Guibert atanga umupira kuri Ndizeye Dieudonné
Ndizeye Ndayisaba Dieudonné yagerageje gufasha ikipe ye ariko birangira batsinzwe
Mugabe Aristide ashoreye umupira mu kibuga hagati
Kaje Elie abuza Ikipe ya Shyaka Olivier gutsinda
Mutabaruka Victoire atera lancer franc
Ikipe ya Shyaka Olivier yahawe miliyoni 1 Frw nyuma yo gutsinda umukino wa "BK All-Star" ku wa Gatandatu
Igihembo cy'ikipe yatsinze, cyashyikirijwe Rwampungu Meshack kuri ubu utagikina Basketball kubera impanuka yakoze mu 2015 akinira Kigali Basketball Club
Rwampungu Meshack asuhuzanya n'Ikipe ya Shyaka yarimo abo bakinanaga Basketball mbere y'uko akora impanuka
FERWAWABA yahawe Rwampungu andi miliyoni 2 Frw

Amafoto: Igirubuntu Jean Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .