Ferwaba yasinyishije umuyobozi wa tekiniki wakinnye anatoza muri NBA

Yanditswe na Ishimwe Israel
Kuya 10 Mutarama 2017 saa 09:53
Yasuwe : XX
0

Ishyirahamwe ry’Umukino wa Basketball mu Rwanda, FERWABA, ryasinyishije amasezerano y’imyaka ibiri Joseph Wright uzwi ku izina rya “Joby” wakinnye ndetse anatoza muri Shampiyona ya Basketball ikunzwe kurusha izindi ku Isi ya NBA, ku mirimo y’umuyobozi wa tekiniki.

Joby Wright yahawe inshingano zitandukanye zirimo by’umwihariko kuzamura impano z’abakiri bato mu mukino wa Baskteball.

Ubuyobozi bwa FERWABA butangaza ko mu byo bamusabye harimo gushyiraho gahunda yo kuzamura basketball mu bana bato, gutegura uburyo buhamye bwo kwigisha no kongerera ubushobozi abatoza, kujya inama mu gutoranya abatoza b’amakipe y’igihugu, gushaka abafatanyabikorwa mu bikorwaremezo n’ibikoresho ndetse no gushaka amahugurwa hanze y’u Rwanda.

Mu mpera za 2015 mu kwezi k’Ugushyingo nibwo FERWABA na Komite Olempike bashyize umukono ku masezerano y’ubufatanye n’Ikigo cyo muri Leta Zunze Ubumwe za Amerika cyitwa Center for Global Sports Advancement kiri mu mujyi wa Indianapolis mu bijyanye no kuzamura impano z’abakiri bato.

Uyu muhango witabiriwe na Joby Wright wari Umuyobozi wungirije w’icyo kigo ndetse akaza ku isonga ry’abazatanga ubufasha mu bikorwa byo guteza imbere Basketball mu bice bitandukanye by’u Rwanda.

Biteganyijwe ko Joby Wright azasesekara mu Mujyi wa Kigali ku mugoroba wo kuri uyu wa Gatatu tariki 11 Mutarama 2017.

Ibyo wamenya kuri Joby Wright

Joseph "Joby" Wright ni Umunyamerika wavutse kuya 5 Nzeri 1950. Yatangiye gukina Basketball yiga muri Kaminuza ya Indiana mu 1970, mbere y’uko mu 1972 atoranywa mu bakinnyi beza bajya gukina muri NBA mu gikorwa kizwi nka “NBA draft”, yerekeza mu ikipe ya Seattle Supersonics.

Kuva mu 1972 kugeza mu 1975 yanyuze mu makipe nka Memphis Tams, San Diego Sails na Virginia Squires muri Shampiyona ya Amerika yitwaga American Basketball Association mbere yo guhinduka NBA ( National Basketball Association) mu 1976.

Mu 1978, Wright yasubiye muri Kaminuza ya Indiana aho yamaze imyaka icyenda yungirije Umutoza Bobby Knight.

Joby yabaye umutoza Mukuru wa Kaminuza ya Miami kuva mu 1990 kugeza mu 1993 aho yavuye ajya muya Wyoming muri Amerika ahamara imyaka ine.

Muri 1999, yabaye Umutoza Mukuru n’Umuyobozi w’amarushanwa muri Harlem.

Joby Wright yari Umutoza n’Umuyobozi wa Tekiniki muri NBA Africa, aho yanatangije Basketball mu bana muri Bafokeng muri Afurika y’Epfo.

Uyu mutoza ahawe inshingano nyuma y’iminsi ibiri, hasojwe amajonjora yo gutoranya abana bakiri bato baziga Basketball mu ishuri rya Musanze Polytechnic kuva mu mpera za Mutarama 2017.

Ni mu mushinga wo gushinga amashuri y’imikino wagizwemo uruhare n’Ikigo cy’Igihugu gishinzwe guteza imbere Ubumenyingiro n’imyigishirize y’imyuga (WDA), gifatanyije na Minisiteri y’Umuco na Siporo(MINISPOC) hamwe na Minisiteri y’Uburezi (MINEDUC).

Joby Wright yahawe inshingano zitandukanye zirimo by’umwihariko kuzamura impano z’abakiri bato mu mukino wa Baskteball

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza