00:00:00 IGIHE NETWORK KN KINYARWANDA EN ENGLISH FR FRANCAIS

ESPOIR BBC na SPENN basinyanye amasezerano y’ubufatanye (Amafoto)

Yanditswe na Habimana Sadi
Kuya 27 Gicurasi 2021 saa 09:56
Yasuwe :
0 0

Nyuma y’ibiganiro byabanje guhuza impande zombi, Ubuyobozi bw’ikipe ya Espoir Basketball Club n’ubwa SPENN, bashyize umukono ku masezerano y’ubufanye afite agaciro ka Miliyoni 15 Frw.

Ni umuhango wabaye kuri uyu wa gatatu, wari witebiriwe n’ubuyobozi bwa SPENN bwari buhagarariwe na Haguma Norbert Umuyobozi Mukuru ushinzwe abakiriya n’ikoranabuhanga muri I&M Bank plc, Visi Perezida wa Espoir BBC, Dr Tuyishime Nolbert, n’uwari uhagarariye Ferwaba, Visi Perezida, Mugwaneza Pascale.

Ni amasezerano Ikipe ya ESPOIR BBC izahabwamo miliyoni 15 Frw mu gihe cy’umwaka umwe ushobora kwiyongera, mu gihe Ubuyobozi bwa SPENN buvuga ko bwahisemo iyi kipe kubera ko ari ubukombe.

Aganira n’itangazamakuru, Umuyobozi Mukuru ushinzwe Abakiliya n’Ikoranabuhanga muri I&M Bank Plc, Haguma Norbert, yasobanuye impamvu bahisemo gusinyana amasezerano y’ubufatanye na Espoir BBC n’icyo biteze muri ubu bufatanye.

Ati “Uyu munsi turishimye kuko twabashije gutangira imikoranire na ESPOIR BBC nk’ikipe y’ubukombe mu Rwanda mu mukino wa Basketball ikaba igiye kumara hafi imyaka 60 ishinzwe. Twumva gukoresha SPENN muri ESPOIR BBC byabafasha mu buryo bwinshi.”

“Ni amasezerano y’umwaka umwe ushobora kongerwa, SPENN izaha ikipe ya ESPOIR BBC miliyoni 15 Frw. Twishimiye ubu bufatanye.”

Abajijwe icyo nka SPENN bazungukira muri ubu bufatanye, Haguma yasubije ko bizeye neza kuzunguka abandi bakiliya.

Yagize ati “Ku byerekeye inyungu, twebwe nka SPENN twizeye ko tuzunguka abafana ba ESPOIR BBC bagera ku bihumbi 20. Twizeye ko tuzabona abantu bakoresha SPENN biyongera.”

Impamvu yo guhitamo kugirana amasezerano y’ubufatanye na ESPOIR BBC kandi idahagaze neza, uyu muyobozi yasubije ko iyi kipe ifite abakunzi benshi kandi n’ubuyobozi bwayo bukunda umukino wa Basketball.

Ati “Twebwe nka SPENN twarebye amakipe yose ahari, tubona ko ESPOIR BBC ari yo kipe ifite abantu bayikunda benshi kandi ifite abayobozi bakunda ikipe yabo cyane. Twabonye ko dukoranye na ESPOIR BBC ari bwo ubufasha bwacu bwagira akamaro kurusha uko twari kujya gukorana n’indi kipe ikomeye.”

Visi Perezida wa FERWABA nk’urwego ruyobora umukino wa Basketball mu Rwanda, Mugwaneza Pascale, yavuze ko bishimiye ubu bufatanye bwa SPENN na ESPOIR BBC.

Ati “Twese tuzi agaciro ka Espoir BBC. Kuri twebwe uyu munsi ni ibyishimo kuko Espoir BBC igiye kubona ubushobozi buyifasha gukora ibyo yahoze ikora mu myaka ishize.”

“Kuri twebwe nk’abafite inshingano zo kuzamura ubushobozi bwa buri kipe, ni ibyishimo gusa kuko Espoir BBC ni ikipe ifite igisobanuro kinini. Icyo nabwira umuterankunga SPENN, mwahisemo neza kuko muri ESPOIR BBC ni abantu bakora ibyo bakunze kandi bakabikora kinyamwuga.”

“Kuba mwahisemo kuza muri Basketball, bisobanuye byinshi bijyanye n’icyerekezo cy’u Rwanda kuko buri Munyarwanda akangurirwa kutagendana amafaranga mu ntoki. Twizeye ko ubu bufatanye buzahoraho ndetse bukaguka ku buryo mwanakorana n’andi makipe arimo n’ay’abagore.”

Ku ruhande rwa ESPOIR BBC, Visi Perezida wayo, Dr Tuyishime Norbert, yavuze ko muri iyi kipe hazabamo impinduka nubwo hari abakinnyi iyi kipe yatakaje.

Ati “Muraza kubona impinduka zizaterwa n’ibintu byinshi, harimo n’ubu bufatanye bwacu na SPENN. Hashize iminsi bitameze neza kubera gutakaza abakinnyi bishingiye ku mikoro ariko ubu turaza gutanga ubutumwa mu minsi iri imbere.”

“Ubu bufatanye tugiranye na SPENN, buraza kudufasha mu byerekeye n’ubushobozi, yaba ubushobozi bwo kugira abakinnyi beza no kubategura no kubashakira iby’ibanze byose. Umukinnyi araza kubona ibikoresho byose akeneye bimufasha kwitegura.”

Ku bufatanye na I&M Bank, SPENN iri mu Rwanda kuva mu 2018, ikaba imaze kunguka abakiliya bagera ku bihumbi 300 bayikoresha, bakaba bafite intego nyamukuru yo kugeza ubukungu kuri buri wese utuye Isi.

SPENN ubu ikorera mu bihugu bine ku Isi, bakaba bafite serivisi zitandukanye zirimo kwishyura amazi, umuriro, kwishyura inguzanyo, kubitsa no kubikuza kandi ku buntu.

Ikindi Haguma Norbert yavuze ni uko ubu bufatanye bwa SPENN na ESPOIR BBC, buzatuma abakunzi bayo bitabira gukoresha SPENN mu buzima bwa buri munsi bakaba abagabo bo guhamya ibyiza byinshi igeze kuri buri wese, ari nako bashyigikira ikipe yabo kuko buri mufana uziyandikisha byuzuye kuri SPENN akoresheje ijambo ritumira “espoir”, ikipe izajya ihabwa amafaranga 500 Frw.

ESPOIR BBC na SPENN byasinyanye amasezerano y'ubufatanye mu gihe cy'umwaka umwe ushobora kongerwa
Aya masezerano afite agaciro ka miliyoni 15 Frw azamara umwaka umwe ushobora kongerwa
Visi Perezida wa FERWABA, Mugwaneza Pascale, yashimiye SPENN yateye inkunga ikipe y'ubukombe nka ESPOIR BBC
Umuyobozi wa SPENN mu Rwanda, Haguma Norbert yizeye ko bazunguka abandi bantu 20 000 kubera ubufatanye bagiranye na ESPOIR BBC
Umuyobozi ushinzwe abakiliya n’ikoranabuhanga muri I&M Bank, Norbert Mwanangu yavuze ko bishimiye ubu bufatanye
Visi Perezida wa ESPOIR BBC, Dr Tuyishime Norbert, yavuze ko ubufatanye bwabo na SPENN buzatuma ikipe yongera kugaruka mu makipe akomeye nk'uko byahoze
Impande zombi zishimiye ubufatanye bwabayeho hagati ya SPENN na ESPOIR BBC
Hanabaye igikorwa cyo guhemba uwatsindiye moto muri tombola ya poromosiyo ya SPENN

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .