00:00:00 IGIHE NETWORK KN KINYARWANDA EN ENGLISH FR FRANCAIS

BK All -Star Game: Ikipe ya Ndizeye Dieudonné izahangana n’iya Shyaka Olivier mu mukino w’intyoza

Yanditswe na Eric Tony Ukurikiyimfura
Kuya 15 Ugushyingo 2021 saa 10:46
Yasuwe :
0 0

Ishyirahamwe ry’Umukino wa Basketball mu Rwanda (FERWABA) ryamaze gushyira ahagaragara abazaba bagize amakipe abiri azahatana mu mukino w’intyoza muri Shampiyona y’u Rwanda “BK All-Star Game’’ uzaba ku wa Gatandatu tariki ya 20 Ugushyingo 2021 muri Kigali Arena.

Amakipe abiri azahangana muri uyu mukino, imwe izaba iyobowe na Ndizeye Ndayisaba Dieudonné usanzwe ukinira Patriots BBC ndetse akaba yarabaye Umukinnyi mwiza w’umwaka mu 2019 mu gihe indi izaba iyobowe na Shyaka Olivier ukinira REG BBC, akaba ari we wabaye Umukinnyi mwiza w’umwaka mu 2021.

Team Ndizeye izaba igizwe na: Ndizeye Dieudonné (Patriots BBC), Nijimbere Guibert (Patriots BBC), Kaje Elie (REG BBC), Niyonkuru Pascal (REG BBC), Nyamwasa Bruno (RP- IPRC Kigali), Bello Nkanira (RP- IPRC Kigali), Espoir Aganze (UGB), Muhizi Prince (REG BBC), Mutabaruka Victoire (RP-IPRC Kigali), Mugabe Aristide (Patriots BBC), Frank Kamndoh Betoudji (Shoot 4 Stars) na Nkundwa Thierry (APR BBC).

Iyi kipe izatozwa na Mwinuka Henry usanzwe utoza REG BBC yatwaye Shampiyona iheruka gusozwa ndetse akaba ari we wabaye Umutoza mwiza w’umwaka.

Team Shyaka izaba igizwe na: Shyaka Olivier (REG BBC), Nshobozwabyosenumukiza Jean Jacques Wilson (REG BBC), Bush Wamukota (Patriots BBC), Belleck Bell (REG BBC), Sangwe Armel (APR BBC), Fortunat Mwanawabene ( 30 Plus), Sagamba Sedar (Patriots BBC), Mbanze Brian (RP- IPRC Huye), Muhayumukiza Eric ( RP- IPRC Kigali), Nijimbere Bénit (RP –IPRC Kigali), Niyonsaba Bienvenue (Patriots BBC) na Kubwimana Ally Kazingufu (APR BBC).

Aba bazatozwa na Benson Oluoch Ogolla wa Patriots BBC yabaye iya kabiri muri Shampiyona iterwa inkunga na Banki ya Kigali Plc.

Aba bakinnyi bose bazagaragara muri “BK All-Star Game 2021” batoranyijwe hifashishijwe imbuga nkoranyambaga (abo abafana bifuza), abanyamakuru ndetse n’abatoza b’amakipe.

Mu bari batoranyijwe ariko batagaragaye kuri uru rutonde harimo Kenneth Gasana, Hagumintwari Steven, Hubert Kabare Bugingo, Adonis Filer, Amisi Saidi na Manga Pitchou kuko bagaragaje ko batazaboneka ku munsi w’umukino.

Kwinjira kuri uyu mukino bizaba ari 5000 Frw mu myanya isanzwe ya Kigali Arena mu gihe mu myanya y’icyubahiro bizaba ari ibihumbi 10 Frw n’ibihumbi 20 Frw, buri wese akanerekana ko yipimishije COVID-19 mu masaha 72.

Kuri uyu mukino kandi hazaba hari abahanzi batandukanye barimo Rema wo muri Nigeria, Kivumbi King, Bulldog, Social Mula, Kayihura na DJ Marnaud.

BK All-Star Game yaherukaga kuba mu 2019, aho ikipe ya Nijimbere Guibert yatsinze iya Mugabe Aristide amanota 89-83.

Ndizeye Ndayisaba Dieudonné azaba ayoboye imwe mu makipe azakina All-Star Game ku wa Gatandatu tariki ya 20 Ugushyingo
Shyaka Olivier (10) wabaye MVP wa Shampiyona ya 2021 azayobora indi kipe muri uyu mukino
Kenneth Gasana na Adonis Filer ntibazagaragara muri BK All-Star Game ya 2021
Henry Mwinuka azatoza Ikipe ya Ndizeye Dieudonné

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .