00:00:00 IGIHE NETWORK KN KINYARWANDA EN ENGLISH FR FRANCAIS

BAL 2021: Umukino wa Zamalek na GSP wasubitswe

Yanditswe na Eric Tony Ukurikiyimfura
Kuya 19 Gicurasi 2021 saa 06:38
Yasuwe :
0 0

Umukino w’umunsi wa kabiri mu itsinda B rya Basketball Africa League, wagombaga guhuza Zamalek yo mu Misiri na GS Pétroliers yo muri Algeria kuri uyu wa Gatatu saa Tatu z’ijoro, wasubitswe mu rwego rwo kubahiriza ingamba z’ubuzima zashyizweho muri iri rushanwa.

Itangazo ryashyizwe hanze n’abategura iri rushanwa, rivuga ko “Umukino wa Basketball Africa League wari uteganyijwe kuri uyu wa Gatatu tariki ya 19 Gicurasi hagati ya Zamalek na Groupement Sportif des Pétroliers (GSP) wasubitswe hashingiwe ku ngamba z’umutekano n’ubuzima zashyizweho n’irushanwa.”

Risoza rivuga ko “uyu mukino uzashyirwa ku yindi tariki.”

Ni wo mukino wa mbere wasubitswe ndetse wari uwa cyenda muri 26 izakinwa kuri gahunda y’iri rushanwa ryatangiye tariki ya 16 Gicurasi, rikazasozwa tariki ya 30 Gicurasi 2021.

Zamalek ihagarariye Misiri muri iri rushanwa riri kuba ku nshuro ya mbere, yari yatangiye neza itsinda Ferroviario de Maputo yo muri Mozambique amanota 71-55 mu gihe GSP yatsinzwe na AS Douanes yo muri Sénégal amanota 94-76 ku wa Mbere.

Ubwo uyu mukino wasubikwaga, habaga undi wo muri iri itsinda rya kabiri wahuje Ferroviario de Maputo na AS Douanes yo muri Sénégal.

Muri iri rushanwa ryitabiriwe n’amakipe 12 agabanyije mu matsinda atatu, amakipe yose aba muri Kigali Convention Centre mu rwego rwo kubahiriza ingamba zo kwirinda ikwirakwira rya COVID-19.

Abafana bake bipimishije COVID-19, bemerewe kwitabira iyi mikino muri Kigali Arena, ariko hubahirizwa ingamba zitandukanye zirimo guhana intera, kwambara neza agapfukamunwa no gukoresha umuti usukura intoki.

Umukino wa Basketball Africa League wari guhuza Zamalek na GSP muri Kigali Arena, wasubitswe
Zamalek yari yatsinze Ferroviario de Maputo ku mukino wa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .