Kwamamaza

Bahufite John werekeje muri REG BBC yageneye ubutumwa abafana ba Espoir BBC yatozaga

Yanditswe kuya 27-10-2016 saa 18:15' na Manzi Rema Jules


Bahufite John wari usanzwe atoza Espoir BBC yasabye abafana bayo kutamufata nk’umugambanyi nyuma yo kuyivamo akerekeza mu ikipe nshya ya REG BBC kuko ari impamvu z’akazi no gushaka imibereho.

Shampiyona ya Basketball mu mwaka wa 2016/2017 itaramenyekana igihe izatangirira, Bahufite John azaba atoza ikipe y’ Ikigo cy’Igihugu gishinzwe Ingufu mu Rwanda, REG BBC igiye kuyitabira bwa mbere.

Mu kiganiro na IGIHE uyu mutoza wahesheje Espoir BBC ibikombe bine bya shampiyona byikurikiranya kuva muri 2012, yavuze ko nubwo yayisezeyemo, ikimuri ku mutima kuko yayigiriyemo amateka nk’umukinnyi ndetse nk’umutoza ayibamo neza.

Ati “Abagabo niko tubaho, iyo ubonye amahirwe yo kugerageza ahandi kandi hisumbuye ugomba kuyakoresha. Espoir ni ikipe nziza, nayibayemo imyaka myinshi twagiranye ibihe byiza n’abafana ariko niko mu kazi bimera. Nta kibazo mfitanye nabo, ni inshuti zanjye n’ubwo ngiye kugaruka duhanganye kandi nshaka igikombe.”

Uko yavuye muri Espoir BBC

Bahufite yavuze ko kuva muri Espoir BBC byatewe n’ibibazo bitandukanye yagize umwaka ushize ndetse byari batumye mu Ugushyingo asezera ariko aza kugaruka nyuma y’aho ubuyobozi bumwijeje ko bizakemuka, ndetse n’abafana babimusabye.

Ati “Murabizi ibibazo nagize umwaka ushize ndetse nari nanasezeye. Ubuyobozi bwansabye kugaruka nibura ngatoza shampiyona ikarangira noneho nazabona umwuka ari mwiza ngakomeza nabona nta cyahindutse nkigendera, ni byo nakoze rero. Nasanze ari byiza ko najya kugerageza n’ahandi.”

REG BBC ntabwo dushaka igikombe cya shampiyona gusa!

Bahufite wemeza ko ari umwe mu batoza bafite ibigwi bikomeye muri Basketball y’u Rwanda kugeza ubu, yavuze ko ku bunararibonye bwe n’ubushake abayobozi b’ikipe ye nshya bagaragaza intego zabo zidashobora kugarukira mu Rwanda ahubwo bashaka igikombe cya Zone 5 n’icya Afurika.

Ati “Ntabwo twifuza igikombe cya shampiyona gusa. Nitugitwara tuzasohoka kandi yaba irushanwa ry’Akarere ka Gatanu n’igikombe cya Afurika turabishaka. Ubushake mu buyobozi burahari, abakinnyi turabafite nanjye mbimazemo imyaka myinshi, uko bitwarwa ndabizi.”

Iyi kipe ya REG BBC yamaze kugura amazina akomeye mu gihugu mu mukino wa Basketball barimo Ali Kazingufu Kubwimana, umukinnyi mwiza muri shampiyona y’umwaka ushize (MVP), akanafasha Patriots BBC yari abereye Kapiteni gutwara igikombe, Bienvenue Ngandu wakiniraga Espoir BBC, Regis Gatoto wa UGB, na Benjamin Mukengerwa wavuye muri DR Congo.

Mu bandi bakinnyi yasinyishije barimo Armel Sangwe wakiniraga ikipe y’Igihugu y’Abatarengeje imyaka 18, Deo Nkurikiyinka , François Gahuranyi, Patrick Nshizirungu, Didier Abimana na Valery Kajeguhakwa.

Bahufite John yahawe amasezerano y’umwaka umwe, ndetse ubuyobozi bwa REG BBC bumusaba gutwara igikombe cya shampiyona.

Uyu mutoza uretse ibikombe bine bya shampiyona yegukanye, yanatwaye kimwe cya FIBA Africa Zone V muri 2012 anagera ku mukino wa nyuma mu 2013.

Bahufite John yemeza ko ikipe ye ije guhatanira ibikombe bikinirwa imbere mu gihugu no hanze yacyo
Bahufite yiseguye ku bafana ba Espoir BBC yahoze atoza mbere yo kwerekeza muri REG BBC
Ally Kazingufu wabaye MVP muri shampiyona y'umwaka ushize akinira Patriots BBC ari mu bakinnyi bashya ba REG BBC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved