00:00:00 IGIHE NETWORK KN KINYARWANDA EN ENGLISH FR FRANCAIS

Ibyihariye muri ’BK-All Star Game’ izaririmbamo abahanzi barimo Rema

Yanditswe na Eric Tony Ukurikiyimfura
Kuya 19 Ugushyingo 2021 saa 12:31
Yasuwe :
0 0

Ishyirahamwe Nyarwanda ry’Umukino wa Basketball (FERWABA) ryatangaje ko amatike yo kwinjira ku mukino w’intoranywa muri Shampiyona ya Basketball wa "BK All-Star Game" uzitabirwa n’abahanzi barimo Rema wo muri Nigeria, yashize ku wa Gatatu w’iki cyumweru.

Uyu mukino uzaba ugizwe n’ikipe ya Ndizeye Ndayisaba Dieudonné usanzwe ukinira Patriots BBC n’iya Shyaka Olivier ukinira REG BBC, uzabimburirwa n’umukino w’abato bakina ari batatu (3x3), uwa Wheelchair no kuririmba k’umwe mu bahanzi mu gihe nyuma yawo ari bwo hateganyijwe igitaramo.

Mu kiganiro n’abanyamakuru cyabaye kuri uyu wa Gatanu, Jabo Landry ushinzwe ibikorwa bya FERWABA, yavuze ko impamvu uyu mukino watumiwemo umuhanzi Rema ari ukubera ko imikino ijyana n’imyidagaduro.

Ati "Twabihuje n’igitaramo kuko imikino ijyana n’imyidagaduro muri rusange. Imyidagaduro ni ijambo rigari, ni uguha ibyishimo Abanyarwanda mu gihe dusoza umwaka. Ni mu rwego rwo kugaruka mu buzima busanzwe, ikindi ni ukwereka abakunzi ba Basketball ko ari ikintu kinini kandi ni no kubagarura ku kibuga "

"Ibihembo ni ibihumbi 500 Frw ku bazitwara neza mu byiciro birimo Slum dunk, gutsinda amanota atatu na MVP."

Yakomeje avuga ko amatike y’uyu mukino yashize ku wa Gatatu ndetse abatazashobora kuwureba, bashobora kuzawukurikira kuri televiziyo ku Cyumweru.

Ati "Turi mu bufatanye na RBA ariko ntabwo umukino uzatambuka uri kuba, ahubwo uzahita ku Cyumweru. Amatike yashize ku wa Gatatu, ubu nta matike ahari."

"Abafite itike, abipimishije COVID-19 mu masaha 72 n’abikingije byibuze urukingo rumwe ni bo bemerewe kwitabira uyu mukino."

Abajijwe umwihariko w’umukino w’uyu mwaka ugereranyije n’uwaherukaga kuba mu 2019, Jabo yavuze ko kuba amatike yarashize kare ari kimwe mu byo wihariye.

Yongeyeho ko ibindi ari imitegurire iri hejuru, igitaramo n’imikino ya Basketball 3x3 na Wheelchair izabanziriza umukino wa "All-Star".

Agaruka ku bihembo bizahabwa ikipe izatsinda uyu mukino, yavuze ko abakapiteni b’amakipe bahisemo ko byazatangwamo ubufasha kuri Rwampungu Meschack wahoze akina Basketball.

Ati "Igihembo kigenewe ikipe izatsinda umukino, abakapiteni bahisemo ko kizahabwa Meshack, umukinnyi wa KBC wakoze impanuka mu 2015, nk’ubufasha."

Kazera Audrey ushinzwe iyamamazabikorwa muri Banki ya Kigali, yavuze ko uyu mukino wa All-Star wongeye gutegurwa mu rwego rwo kwishimira ubufatanye bwa BK na FERWABA.

Ati "Turi hano twishimira ubufatanye buhari kuva mu 2018 n’uburyo twakomeje guteza imbere Basketball. Mu 2020 inkunga ya BK yariyongereye iva kuri miliyoni 100 Frw igera kuri miliyoni 135 Frw, ubu ariko hari abandi bafatanyabikorwa bajemo ngo bigende neza ariko BK ni we muterankunga mukuru."

Shyaka Olivier uzaba ari Kapiteni w’imwe mu makipe azakina uyu mukino, yavuze ko bateganya gushimisha abafana bazaba bari muri Kigali Arena ku wa Gatandatu.

Mugenzi we, Ndizeye Ndayisaba Dieudonné, na we yavuze ko uyu mukino ugiye kugaragaramo abakinnyi bakomeye ndetse bazagaragaza guhangana.

Biteganyikwe ko ibikorwa bizaba ku wa Gatandatu bizatangira saa kumi n’imwe n’igice hakina abakiri bato.

Abandi bahanzi bitezwe kuri uyu mukino ni Kivumbi King, Bulldog, Social Mula, Kayihura na DJ Marnaud.

BK All-Star Game yaherukaga kuba mu 2019, aho ikipe ya Nijimbere Guibert yatsinze iya Mugabe Aristide amanota 89-83.

Kuri uyu wa Gatanu ni bwo habaye ikiganiro n'itangazamakuru kigaruka ku mukino wa All-Star uzabera muri Kigali Arena ku wa Gatandatu
Jabo Landry ushinzwe ibikorwa bya FERWABA yemeje ko amatike ya "BK All-Star Game 2021" yashize ku wa Gatatu
Kazera Audrey ushinzwe Iyamamazabikorwa muri Banki ya Kigali Plc
Ndizeye Ndayisaba Dieudonné yavuze ko unukino uzaba urimo guhangana
Shyaka Olivier yavuze abazitabira uyu mukino bazishima
Aba Kapiteni bombi berekanye imyambaro amakipe yabo azambara

Amafoto : Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .