00:00:00 IGIHE NETWORK KN KINYARWANDA EN ENGLISH FR FRANCAIS

Afrobasket 2021: Cap-Vert yiyongereye mu bihugu bigize itsinda ry’u Rwanda

Yanditswe na Eric Tony Ukurikiyimfura
Kuya 9 Nyakanga 2021 saa 01:46
Yasuwe :
0 0

Ikipe y’Igihugu ya Cap-Vert yiyongereye ku ya Repubulika Iharanira Demokarasi ya Congo n’iya Angola nk’ibihugu bitatu biri mu itsinda A ry’u Rwanda mu Gikombe cya Afurika cy’abagabo mu mukino wa Basketball (Afrobasket 2021) kizabera i Kigali hagati ya tariki ya 24 Kanama n’iya 5 Nzeri.

Ku wa Kane ni bwo habaye umukino wahuje Uganda na Maroc mu itsinda E ryo gushaka itike ya Afrobasket 2021 izabera mu Rwanda.

Uyu mukino utarabereye igihe kubera icyorezo cya COVID-19, watsinzwe na Uganda ku manota 77-65, ikatisha itike nk’ikipe ya kabiri inyuma ya Misiri ndetse izaba iri mu itsinda D hamwe na Sénégal, Cameroun na Sudani y’Epfo muri Afrobasket 2021.

Gutsindwa kwa Maroc byatumye ibura itike mu buryo budasubirwaho kuko yasoje imikino yayo ifite amanota arindwi ku mwanya wa gatatu mu gihe Cap-Vert ya kane n’amanota atandatu, isigaje umukino umwe izahuramo na Uganda ku wa 15 Nyakanga, kandi ikaba izayijya imbere nubwo yawutsinda.

Cap-Vert yahise ibona itike nk’ikipe izazamuka ari iya gatatu mu itsinda E ryo gushaka itike ndetse muri Afrobasket 2021, izaba iri mu itsinda A hamwe n’u Rwanda, Repubulika Iharanira Demokarasi ya Congo na Angola.

Ikipe y’u Rwanda yatangiye kwitegura iyi mikino, aho abakinnyi batandukanye b’imbere mu gihugu bakora imyitozo inyuranye ibafasha kuguma ku rwego rwiza nyuma y’uko Shampiyona ya Basketball yabaye ihagaze kubera ubwiyongere bw’ubwandu bwa COVID-19.

Amatsinda ya Afrobasket 2021 izabera i Kigali:

Itsinda A: U Rwanda, Repubulika Iharanira Demokarasi ya Congo, Angola na Cap-Vert.

Itsinda B: Tunisia, Centrafrique, Misiri na Guinée.

Itsinda C: Nigeria, Côte d’Ivoire, Kenya na Mali.

Itsinda D: Sénégal, Cameroun, Uganda na Sudani y’Epfo.

Inkuru bifitanye isano: Ingengabihe ya Afrobasket 2021 izabera muri Kigali Arena

Cap-Vert izaba iri mu itsinda ry'u Rwanda muri Afrobasket 2021
Uganda yabonye itike nyuma yo gutsinda Maroc
Repubulika Iharanira Demokarasi ya Congo ni indi kipe izaba iri mu itsinda ry'u Rwanda
Angola ni imwe mu makipe akomeye azitabira Afrobasket 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .