00:00:00 IGIHE NETWORK KN KINYARWANDA EN ENGLISH FR FRANCAIS

Afrobasket 2021: Cameroun yatewe mpaga kubera COVID-19

Yanditswe na Eric Tony Ukurikiyimfura
Kuya 25 Kanama 2021 saa 11:49
Yasuwe :
0 0

Ikipe y’Igihugu ya Cameroun yatewe mpaga mu mukino w’umunsi wa mbere wo mu itsinda D rya Afrobasket 2021, yari guhuriramo na Sudani y’Epfo kuri uyu wa Gatatu muri Kigali Arena kubera ko yarwaje COVID-19 kandi bikaba bigoye ko abakinnyi isigaranye bakina.

Cameroun yagombaga gukina na Sudani y’Epfo kuri uyu wa Gatatu guhera saa Cyenda z’amanywa mu mukino wo mu itsinda D.

Gusa, itangazo ryashyizwe hanze na Alphonse Bilé ukuriye Komisiyo y’ibijyanye na tekinike muri FIBA Afrique, rivuga ko Cameroun yatewe mpaga hashingiwe ku mabwiriza ajyanye na COVID-19 mu marushanwa ya FIBA

Rigira riti “Umukino wo mu itsinda D wari guhuza Cameroun na Sudani y’Epfo kuri uyu wa 25 Kanama 2021 saa Cyenda muri Kigali Arena, ntabwo ukinwa.”

“Ikipe ya Cameroun itakaje umukino kuri mpaga. Intsinzi y’umukino ihawe Sudani y’Epfo ndetse amanota y’umukino ni 20-0.”

Amakuru IGIHE yamenye ni uko aho Cameroun iri kuba, imaze kugeza abakinnyi batanu barwaye COVID-19 mu gihe muri iri rushanwa buri kipe iba yemerewe abakinnyi 12.

Iki gihugu kiri mu itsinda rimwe na Sénégal ndetse na Uganda, cyitabaje Beleck Bell usanzwe ukinira REG BBC kugira ngo asimbure umwe mu bakinnyi bacyo, ariko ubwandu bwa COVID-19 bukomeje kwiyongera.

Muri iki gitondo, bamwe mu bakinnyi ba Cameroun bari bicaye kuri hoteli ubona ko nta cyizere cyo gukina umukino bafite kandi bacitse intege.

Afrobasket 2021 iri kuba ku nshuro ya 30, yatangiye ku wa Kabiri, aho u Rwanda rwatsinze Repubulika Iharanira Demokarasi ya Congo amanota 82-68 mu itsinda A naho Cap-Vert itsinda Angola 77-71.

Mu itsinda B, Tunisia ifite irushanwa riheruka, yatangiye neza itsinda Guinea amanota 82-46 mu gihe Misiri yatsinze Centrafrique amanota 72-56.

Kuri uyu wa Gatatu, Nigeria na Mali zo mu itsinda C zirakina saa Sita, Sénégal na Uganda zo mu itsinda D zikine saa Kumi n’ebyiri mu gihe Côte d’Ivoire na Kenya zo mu itsinda C zikina saa Tatu z’ijoro.

Umukino wari guhuza Cameroun na Sudani y'Epfo muri Kigali Arena ntukibaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .