00:00:00 IGIHE NETWORK KN KINYARWANDA EN ENGLISH FR FRANCAIS

Umunya-Uganda yabaye uwa mbere wasanganywe COVID-19 mu bamaze kwitabira Imikino Olempike ya Tokyo 2020

Yanditswe na Bukuru JC
Kuya 20 Kamena 2021 saa 06:58
Yasuwe :
0 0

Umwe mu bagize itsinda rya Uganda rizitabira Imikino Olempike ya 2020 i Tokyo, yabaye uwa mbere wasanganywe COVID-19 ubwo bageraga mu Buyapani kwitegura irushanwa rizatangira tariki ya 23 Nyakanga 2021.

Imikino Olempike yari kuba mu mwaka ushize, yimuriwe muri uyu mwaka wa 2021 kubera icyorezo cya COVID-19 nubwo kuri ubu kigikajije umurego mu Buyapani.

Uganda iri mu bihugu byugarijwe cyane na COVID-19 ndetse guverinoma y’iki gihugu iherutse gufata icyemezo cyo gushyiraho gahunda ya Guma mu Rugo ku wa Gatanu.

Umwe mu bagize itsinda ry’Abanya-Uganda icyenda bitabiriye Imikino Olempike mu Buyapani, yasanganywe COVID-19 nubwo bose bakingiwe.

Iri tsinda ririmo abakinnyi b’iteramakofe, abatoza n’abayobozi, ryari ryasanzwe bose ari bazima ubwo bapimwaga mbere yo kuva muri Uganda.

Gusa, umwe muri bo utatangajwe amazina, yasanganywe COVID-19 ubwo bageraga ku Kibuga cy’Indege cya Narita i Tokyo ku wa Gatandatu, ashyirwa mu kato.

Abasigaye bagize iryo tsinda, bahawe imodoka ibajyana mu Mujyi wa Osaka, mu Burengerazuba bw’u Buyapani, aho bazitoreza mbere y’Imikino Olempike.

Abanya-Uganda bari itsinda rya kabiri ry’abakinnyi b’abanyamahanga bageze mu Buyapani nyuma y’ikipe yo muri Australia yagezeyo tariki ya 1 Kamena.

Abafana b’abanyamahanga bakumiriwe mu Mikino Olempike ya 2020 mu gihe ku wa Mbere aribwo hazafatwa icyemezo niba ab’imbere mu Buyapani, bo bazemererwa kureba iyi mikino.

Inzobere z’abaganga mu Buyapani zagiriye guverinoma yabo inama yo kwakira iyi mikino nta bafana kugira ngo hagabanywe ibyago by’ikwirakwira ry’ubwandu bwa COVID-19 nubwo hari abayobozi bifuza ko Abayapani bareba iyi mikino.

Kuri uyu wa 20 Kamena 2021, Tokyo yatangaje ko habonetse abarwari 376 ba COVID-19 n’umwe wahitanywe nayo, abo banduye bakaba biyongereyeho 72 ugereranyije n’ababonetse mu cyumweru gishize nk’uko byatangajwe n’ikinyamakuru Asahi Shimbun.

Abayobozi n’abakorerabushake bazakora mu Mikino Olempike batangiye gukingirwa ku wa Gatanu mu gihe kuri ubu 16% by’Abayapani ari bo bamaze guhabwa urukingo nk’uko byatangajwe n’Ibiro Ntaramakuru by’Abongereza, Reuters.

Umwe mu bagize itsinda rya Uganda ryitabiriye Imikino Olempike, yasanganywe COVID-19 bakigera mu Buyapani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .