00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwatoranyijwe nka hamwe mu hazakingirirwa abazitabira imikino Olympique

Yanditswe na Iradukunda Serge
Kuya 3 Kamena 2021 saa 09:10
Yasuwe :
0 0

Komite y’imikino Olympique ku Isi yatangaje ko yahisemo u Rwanda na Qatar nk’ahazashyirwa ibigo bizajya bitangirwamo inkingo za Coronavirus ku bakinnyi bazitabira iyi mikino iteganyijwe kubera i Tokyo mu Buyapani muri Nyakanga 2021.

Ibi bigo bizashyirwa mu Rwanda na Qatar bizakoreshwa mu gukingira abakinnyi bazaba batarabasha gukingirirwa mu bihugu bakomokamo. Abazakingirwa bazahabwa urukingo rwa Pfizer-BioNTech binyuze mu masezerano Komite Olympique ku Isi yagiranye n’iki kigo.

Mu itangazo Komite Olympique ku Isi yashyize hanze ku wa 2 Kamena 2021 yavuze ko iyi gahunda igamije kubungabunga ubuzima bw’abazitabira iyi mikino ndetse n’ubw’abaturage b’u Buyapani buzayakira muri rusange.

Iti "Igitekerezo ni ugutegura urugendo rujya Doha na Kigali ku bakinnyi batagize amahirwe yo kugerwaho na gahunda yo gukingirwa, nubwo byaba bisaba ko igiciro cy’urugendo rwabo kizishyurwa na Komite Olympique."

"Ubu buryo bw’inyongera bwo gutanga inkingo buzatuma imikino ya Olympique izabera mu Buyapani itekana bitari ku bazayitabira gusa, ahubwo no ku baturage b’u Buyapani."

Umuyobozi wa Olympic Solidarity ishinzwe gukurikirana Komite Olympique z’ibihugu, James Macleod, yashimiye u Rwanda na Qatar kubera umusanzu byemeye gutanga mu migendekere myiza y’iyi mikino.

Ati "Ntidushobora kubona uko dushimira Komite Olympique z’ibihugu byombi, Guverinoma zabyo na Pfizer kubera ubumuntu n’ubushake bwo gufasha bagaragaje. urwego rw’imitegurire rw’aho imikino izabera rugeze ku kigero cyiza."

Uretse abazitabira iyi mikino, Komite Olympique ku Isi yatangaje ko umubare munini w’abaturanye n’aho izabera wamaze gukingirwa. Kugeza ubu ngo hamaze gukingirwa abagera kuri 75% ndetse n’abasigaye hari kurebwa uburyo bakingirwa.

Biteganyijwe ko imikino Olympique izatangira ku wa 23 Nyakanga 2021. Izahuza abantu baturutse mu bihugu bitandukanye no mu mikino itandukanye, barimo n’Abanyarwanda bo mu mikino irimo Amagare, gusiganwa ku maguru (Imikino Ngororamubiri) no Koga, yagombaga kuba umwaka ushize isubikwa kubera icyorezo cya Covid-19 cyavuzaga ubuhuha.

U Rwanda rwatoranyirijwe nka hamwe mu hazakingirirwa abazitabira imikino Olympique izabera mu Buyapani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .