U Buyapani bwemeye kwakira Abanyarwanda mu myiteguro y’Imikino Olempiki buzakira mu 2020

Yanditswe na Cyprien Niyomwungeri
Kuya 15 Gicurasi 2018 saa 02:39
Yasuwe :
0 0

Abakinnyi b’u Rwanda bazitabira imikino Olempiki izabera mu Murwa Mukuru w’u Buyapani, Tokyo mu 2020, bemerewe kuzakorera imyitozo muri iki gihugu kugira ngo bazajye kurushanwa bariteguye bihagije.

Kuri uyu wa Kabiri, Umuyobozi w’Umujyi wa Hachimantai mu Buyapani, Masahiko Tamura na Perezida wa Komite Olempiki y’u Rwanda, Amb. Munyabagisha Valens, basinyanye amasezerano y’ubufatanye, azatuma uyu mujyi wakira Abanyarwanda bitegura imikino Olempiki ya Tokyo.

Amb. Munyabagisha yasobanuye ko abakinnyi u Rwanda rushobora kuzajyana mu mikino Olempiki, bazajya kwitoreza mu Mujyi wa Hachimantai, mbere y’uko imikino itangira.

Yagize ati “Birashoboka ko bajyayo n’inshuro zigeze kuri ebyiri ku buryo bashobora kujyayo umwaka utaha wa 2019, bakamarayo nk’ukwezi hanyuma no mu 2020 bakaba bajyayo mbere y’uko imikino itangira bakamarayo ukundi kwezi, kugira ngo bashobore kuzajya kurushanwa bariteguye bihagije.”

Uyu mujyi wemeye kuzakira abo bakinnyi ukabatunga, ukabaha ibikoresho byose bakeneye bizabafasha kwitegura, hanyuma u Rwanda rukabarihira itike ibagezayo gusa. Abakinnyi b’u Rwanda kandi bazaba bashobora kuba bagira imikino bakina n’abo muri uyu mujyi.

Umuyobozi w’Umujyi wa Hachimantai, Masahiko Tamura, yavuze ko uyu ari umusaruro w’ubufatanye busanzwe hagati y’ibihugu byombi. Iyi gahunda ikaba yaratangiye kuganirwaho mu mezi atanu ashize.

Umujyi wa Hachimantai, usanzwe ufitanye ubundi bufatanye n’u Rwanda, binyuze mu mushinga w’ubuhinzi bw’indabo za Gentian, zisanzwe zera cyane mu Buyapani ariko no mu Rwanda bikaba byaragaragaye ko zihera ku buryo zigiye gutangira koherezwa mu mahanga.

Ambasaderi w’u Buyapani mu Rwanda, Takayuki Miyashita, yashimangiye ko ubu bufatanye n’imibanire hagati y’abatuye ibihugu byombi ari ingenzi, kandi bizatuma abakinnyi b’u Rwanda bitwara neza mu mikino Olimpiki ya 2020.

Yagize ati “Nshimiye ubumuntu Umujyi wa Hashimantai ufite bwo gufasha abakinnyi b’u Rwanda, bitwara ikiguzi kinini yaba mu macumbi, ingendo, aho gukorera imyitozo n’ibindi, ndizera ko abakinnyi b’u Rwanda bazitwara neza mu mikino ya Olimpiki izabera Tokyo.”

Imikino Olempiki ya Tokyo izatangira ku wa 24 Nyakanga isozwe ku wa 9 Kanama 2020. Yaherukaga kubera mu Buyapani mu 1964, ari nayo nshuro ya mbere yari ibereye muri Aziya.

Ambasaderi Takayuki Miyashita, uhagarariye u Buyapani mu Rwanda yashimangiye ko ubu bufatanye n’imibanire hagati y’abatuye ibihugu byombi ari ingenzi
Umuyobozi w’Umujyi wa Hachimantai mu Buyapani, Masahiko Tamura na Perezida wa Komite Olempiki y’u Rwanda, Amb. Munyabagisha Valens, basinya amasezerano y’ubufatanye
U Buyapani bwemeye kwakira Abanyarwanda mu myiteguro y’Imikino Olempiki buzakira mu 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza